E Sili Atu Nai Lo se Taiala a se Faifeautalai
I suesuega faaletagata lava ia. I le aiga. I lesona o Aso Sa. Ma, e moni lava, i le galuega faamisiona. O auala nei o loo faaaogaina ai e tagata o le Siteki a Hingham Massachusetts le Tala’i La’u Talalelei.
I le avea ai ma se faifeautalai i Farani, sa auauna atu Chris Ivie i se paranesi laitiiti lea e lei i ai ni tagata sailiili na auai atu i le lotu mo le toeitiiti lava atoa le tausaga. Ma le isi, e le manatua e tagata o le ekalesia le taimi mulimuli na papatiso ai se tagata.
Sa tatalo Elder Ivie ma lana soa po o le a le mea e tatau ona fai ma na lagona le uunaia ina ia mautinoa o loo faaaogaina e aiga taitasi—o le paranesi—se kopi o le Tala’i La’u Talalelei. I lena taimi i le amataga o le 2006, pe tusa e sili atu ma le tausaga na maua ai le “Taiala mo le Galuega Faafaifeautalai”. Na galulue Elder Ivie ma lana soa e tusa ai ma musumusuga na la maua ma okaina ma tufatufaina atu kopi o lena tusi.
O le amataga lena o suiga tetele mo le paranesi. E ui lava sa toe lua masina o Elder Ivie i le paranesi, ae sa ia vaaia le faaliliuina e le Tala’i La’u Talalelei o uiga o tagata o le Ekalesia—e tutusa lava le autalavou ma tagata matutua—e uiga i le galuega faafaifeautalai.
“Sa aoga!” na manatua ai e Chris. “Sa mafaufau tagata o le ekalesia e uiga i le galuega faafaifeautalai ma taumafai e faasoa atu le talalelei ma mauaina ni aafiaga maoae. Sa sili atu le malosi o le galuega faafaifeautalai na vaaia e le paranesi nai lo tausaga ua alu.”
Na amata ona lipoti soo atu e tagata o le ekalesia i faifeautalai e uiga i talanoaga faaletalalelei na latou faia ma tagata o aiga, uo, po o tagata e masani ai. A malilie na uo e o mai i gaoioiga a le paranesi, e faafeiloaia i latou ma le mafanafana e isi tagata o le paranesi. Mo Elder Ivie ma lana soa, o lona uiga ua tuuitiitia le la tuitui i faitotoa ae ua sili atu le la aoaoina atu o le talalelei. O se tasi o tagata sailiili sa amata ona la aoaoina na mulimuli ane papatiso.
“O nisi o taimi tatou te maua ai se manatu le sa’o i le Ekalesia e faapea, o le galuega faafaifeautalai e na o faifeautalai lava e faia,” o le tala lea a Chris. “Ae ina ua saunia tagata o lenei paranesi e ala i le suesueina o le Tala’i La’u Talalelei, na latou iloa ai e i ai sa latou matafaioi i le sailia o tagata ina ia aoaoina. Na fesoasoani le Tala’i La’u Talalelei e tuuina atu ia i latou le agaga o le talaiga.”
Ua toeitiiti atoa le tolu tausaga talu ona foi Chris i lona aiga i Medway, Massachusetts, ae o loo ia faaaogaina lava le Tala’i La’u Talaleleii ana suesuega i aso uma e avea o se faitotoa i tusitusiga paia. “Ua fesoasoani e avea ai au ma se faifeautalai lelei atu. Ua fesoasoani e avea ai au ma se faiaoga lelei atu o le talalelei. Ma o loo fesoasoani ia te au ia avea ma se tagata lelei atu, ma avea atili e faapei o Keriso,” o lana tala lea.
E le na o Chris le tagata o le Siteki o Hingham Massachusetts ua iloaina le mana o le Tala’i La’u Talalelei i fafo atu o faatulagaga o le galuega faafaifeautalai faamisiona. E ui lava o punaoa ua faatatau tonu lava mo faifeautalai faamisiona, ua iloa e faifeau faamisiona o le siteki o Hingham e mafai ona faamanuia ma faatamaoaiga ai foi o latou olaga.
Mai le Misiona i le Aiga
O James Setterberg sa avea foi ma vaega o le tupulaga muamua o faifeautalai e faaaogaina le Tala’i La’u Talalelei. Ina ua taunuu atu o ia i le Misiona a Texas Houston Sasae i le tausaga e 2005, ua mavae ni nai masina talu ona faaaogaina e ona uso a faifeautalai lea punaoa. Peitai ona o le faataitaiga a se taitai perisitua i le lotoifale, na iloa ai e Elder Setterberg o le aoga o lenei mea faigaluega sa le i faatapulaaina i faifeautalai.
“I se tasi o eria, sa nonofo ai i matou o faifeautalai i le maota o le peresitene o le siteki ma lona aiga. O taeao uma lava, latou te alafa’i mai ai mo le suesuega o tusitusiga paia, lea na aofia ai le suesueina o mataupu eseese o le Tala’i La’u Talalelei. O iina na ou iloa ai o lenei tusi e mo tagata uma,” o lana tala lea.
O se lesona lea na ia aumaia i le fale. “A o lei alu la’u misiona, ou te lei faatutuina ni au sini faapitoa mo lo’u olaga; ou te matea ou te lei manao e fuafua mamao tele atu,” na ia tautino mai ai. “Peitai ona o le faamamafaina mai e la’u peresitene o le misiona ma le mataupu e 8 o le Tala’i La’u Talalelei, le faatutuina o sini o lea na amata ai ona suia lena tulaga.”
O fuafuaga faalevaiaso ma fonotaga i le faatutuina o sini mo le lua tausaga, na fatuina ai se mausa lea o loo tumau ai pea ia James talu ona foi mai i le aiga. Mo se faataitaiga, na ia faatuina ma galue i sini faaleaoaoga ma le faaleagaga. Fai mai a ia, “Ua ou iloa nei a aunoa ma le faatutuina o sini, e le mafai ona e iloa moni po o fea o e i ai i le olaga, i le tulaga o le alualu i luma. Peitai a e faatuina ma galue i au sini, e te faalauteleina oe lava ma avea ai oe ma se tagata sili atu ona lelei. Ou te faafetai ai i le Tala’i La’u Talalelei mo le aoaoina mai o lena mea.”
I le Aoaoina Atu i le Ekalesia ma totonu o le Aiga
E oo lava i tagata o le ekalesia e lei faaaogaina le Tala’i La’u Talalelei a o avea ma faifeautalai ua iloaina lona mana. O Jake Peterson o se tasi o le paranesi a le autalavou nofofua matutua a le siteki. E ui lava na ave lana misiona a o lei maua le Tala’i La’u Talalelei, ae fai mai Jake o le tusi ua tele lona aoga ia te ia i lona valaauga o se taitai misiona a le paranesi, ona o loo faamatala mai ai mafuaaga tatou te faasoa atu ai le talalelei: “O nisi o taimi i le avea ai ma tagata o le ekalesia tatou te mafaufau ai faapea, ‘O le a lava le mea e taua ai le galuega faafaifeautalai? O loo lelei lava olaga o ou tuaoi ma o loo lelei mea o loo latou faia. Aisea o le a ou amataina ai se tulaga le manaia i lo’u talanoa atu ia i latou e uiga i le Ekalesia?’ O loo talanoaina i le Tala’i La’u Talalelei lena tulaga. O loo faamatala mai ai le mafuaaga tatou te faasoa atu ai le talalelei ma talanoa atu ai ia tatou uo: aua o le talalelei a Iesu Keriso o le a faamanuiaina ai aiga, faafetaiaia ai o latou manaoga faaleagaga, ma fesoasoani ia i latou e faataunuu o latou faanaunauga loloto.’”1
E fesoasoani foi i tagata uma o le ekalesia ia tumau i mataupu faavae o le talalelei, o lana tala lea. “E i ai se upusii ou te fiafia lava i ai mai ia Ailama Samita e uiga i le aoaoina atu o uluai mataupu faavae o le talalelei, ona toe aoao atu lea ma saga aoao atu ai pea lava pea.2 O lena faamatalaga ma aoaoga faavae o loo i ai i le Tala’i La’u Talalelei ua ou maua ai se malamalamaaga sili atu o le malosi o aoaoga faavae ma se agaga talisapaia mo le malosi e mafai ona tatou maua mai i le suesueina o mea e pei o le Toefuataiga, faatuatua, o le Togiola, po o le salamo. E i ai se malosiaga silisili i na mea.”
O se isi tagata o le siteki e igoa ia, Rick Doane, na auauna atu o se taitai misiona o le uarota ina ua faatoa maua lava le Tala’i La’u Talalelei. Na vave lava ona iloa e Rick e mafai ona fesoasoani lenei mea faigaluega fou ia te ia i lona valaauga.
“Ou te fiafia i le mea moni e faapea, o le tusi o loo aofia ai se mataupu i auala e galulue faatasi ai ma taitai o le siteki ma le uarota. O faifeautalai e o mai ma toe o, ae o taitai o le uarota o le a i ai pea iina mo se taimi umi lava. O i latou ia o vaega e faatumauina pea. Ou te fiafia ona o loo faamamafa mai e le tusi le taua o lena tulaga,” o le tala lea a Rick.
Ua iloa foi e Rick ma lona toalua o, Moshi, le faamoemoe o le tusi e avea o se punaoa mo le aoaoina o le la fanau tama laiti. “E i ai se lesona e 15-minute i mataupu taitasi e mafai ona fetaui lelei mo afiafi faaleaiga,” na faamatala mai e Rick. “E taulai atu i mataupu faavae, ma e fesoasoani e te tumau ai i aoaoga faavae autu, lea e mafai ona fesoasoani ia te oe e fausia ai se faavae malosi mo oe lava ma lau fanau. O loo lisiina atu foi e le tusi ia mau ma gaoioiga e mafai ona e faaaogaina. O se punaoa maoae e utuvai mai ai, pe o e aoao atu i le aiga po o se isi lava nofoaga.”
I Le Sauniuniga mo le Lumanai
O Mark Wadsworth, e 19 tausaga, o loo auauna atu nei i le Misiona a Spain Bilbao ma o loo ia faaaogaina soo le Tala’i La’u Talalelei. Ae a o lei alu foi lana misiona, sa ia suesue mai ai. “O taimi uma lava ou te suesue i ai, e i ai lava se mea fou e maua mai ai,” o lana tala lea.
O le suesue i le Tala’i La’u Talalelei a o lei alu lana misiona na fesoasoani lea ia te ia e iloa ai avanoa faafaifeautalai. Na fesoasoani faifeautalai o lana eria ia te ia ma lona aiga i le atiina ae o se fuafuaga faaleaiga mo le misiona. “O lena mea na amata ai ona ou mafaufau e uiga i le galuega faafaifeautalai i se auala sili atu ona mautinoa,” o lana tala lea. O se taunuuga, na faateleina ana talanoaga ma uo e uiga i aoaoga faavae o le Ekalesia, lona talafaasolopito, ma gaoioiga e fesootai ma le Ekalesia.
“Atonu sa i ai se aofaiga o avanoa talitutusa e talanoa ai e uiga i le Ekalesia a o lei faia la matou fuafuaga, ae sa ese sa’u tali atu i ai,” o le tala lea a Elder Wadsworth. “Sa avea o se vaega e suia ai le mafaufau e uiga i mea o loo ou faia.”
O Anetelea Melo, e 18 ona tausaga, o loo i ai lava ni nai masina a o lei tuuina atu ona pepa mo le misiona, ae e le faapea ai la e le o sauniuni malosi o ia i le taimi nei. Fai mai o ia, o le suesueina o le Tala’i La’u Talalelei, ua avea ma se tasi o auala sili ona lelei o loo ia faia [e sauniuni ai].
O nisi o sauniuniga ua oo mai e ala i suesuega a le tagata lava ia. O isi taimi e oo mai i aoaoga faamasani i lana korama a ositaulaga. O Aso Sa muamua o masina taitasi, e tofi ai se tasi o le korama e aoao atu se lesona mai le Tala’i La’u Talalelei i tagata o le korama ma le faufautua. O nisi taimi latou te aoao atu ai se lesona atoa e 45-minute, ae o isi taimi, ina ia faataitai ai, latou te aoao atu ai se vaega e 15 pe 5 minute o lesona eseese.
Ma a o faailoa mai e Anetelea o lenei sauniuniga o loo faaauupegaina ai o ia mo le galuega faafaifeautalai, o loo mafai foi ona ia vaaia ai le faamanuiaina o lona olaga i le taimi nei.
“Ou te mafaufau lava i mea mai le Tala’i La’u Talalelei i taimi uma lava,” o le tala lea a Anetelea. “E na o au lava le Mamona i la’u aoga maualuga, o lea e tele ai ina fesili mai tagata ia te au e uiga i o’u talitonuga. Na mafai ona ou faaaogaina lesona ma tomai mai le Tala’i La’u Talalelei e ta’u atu ai i uo po o e masani e uiga i le talalelei.
“E i ai nisi fesili po o talanoaga e mafai ona taitaiina atu ai i le tele o itu eseese,” na ia faaauau ai, “ae a mafai ona ou taialaina [na talanoaga] i se itu lelei ona o mea sa ou aoaoina, e matagofie lena lagona.”
E faapei foi o Anetelea Melo, o Anetelea Hovi, e 19 ona tausaga, na mauaina se kopi o le Tala’i La’u Talalelei i le vaitaimi ao i ai i le aoga maualuga, ae ana le oo lava i lona tausaga muamua i le iunivesite na te le talisapaiaina [lena tusi]. E ala atu i se faatosinaga a se faifeautalai ua maea lana misiona lea la te potu faatasi ma se vasega sauniuni mo le misiona, na amata ai e Anetelea ona sauni mo lana misiona i se tulaga lelei atu nai lo se isi lava taimi na muamua atu. O ana tatalo na sili atu ona patino ma anoa, na sili atu ona fitoitonu ana suesuega o tusitusiga paia, ma na sili atu ona moni ana fuafuaga mo lana misiona, o lana tala lea. O le mea na sili ai, sa amata ona ia faaaogaina le Tala’i La’u Talalelei e taialaina ai ana taumafaiga.
Talu mai lena taimi, ua atiina ae ai e Anetelea se faiga e makaina ai ma faailoga i lanu ia ana tusitusiga paia ina ia ogatasi ma mataupu faavae na ia aoaoina i le Tala’i La’u Talalelei faapea foi ma le tusitusia o manatu ma uunaiga na te maua i le taimi o ana suesuega. Ae na vave lava ona ia faailoa mai o le manatu e le o le i ai o se auala faatonuina e maka ai, pe valivali ai, po o le tusiaina foi o ni faamatalaga. Nai lo lena, “e mafai ona e faapatinoina le faiga o au suesuega i se auala e sili ona fetaui ma oe,” o lana tala lea. “O le mea lena e maoae ai le talalelei. Tatou te eseese uma lava, ae o le talalelei e faafetaui ai i tatou uma lava.
“E tutusa lava ma le Tala’i La’u Talalelei. E aoao mai ia aoaoga faavae autu i ni auala lautele ina ia mafai ai ona e faaaogaina o se taiala. E mafai ona tatou faaaogaina i le auala tatou te manaomia ai mo a tatou lava aoaoga pe aapa atu ai foi i se isi tagata.”
O Paterika Samita, o se isi foi alii talavou mai le siteki a Hingham, na tau mai e faatasi i le masina i le taimi o fonotaga a le au Perisitua Arona a lana paranesi, ona lipoti mai alii talavou i soo se aafiaga faafaifeautalai na latou maua ona faatulaga lea o ni taimi e galulue ai ma faifeautalai faamisiona.
“E lei leva atu sa matou o ai ma faifeautalai e aoao se aiga ua uma ona aoaoina i le tala ia Iosefa Samita,” na fai mai ai Paterika. “Sa fai mai faifeautalai ou te aoaoina atu le afio mai o Keriso i le lalolagi ma le faatuina o Lana Ekalesia. Na faailoa manino mai e le Tala’i La’u Talalelei mea uma ma lisiina ia mau e lagolago ai. Sa otooto uma mai lava iina.
“Sa ou iloaina nei mea ma sa i ai sa’u molimau e uiga i ai, ae o le Tala’i La’u Talalelei ma le o faatasi ma faifeautalai, na fesoasoani ia te au e aoao atu ai nei mataupu faavae i se auala e lelei atu,” o le tala lea a Paterika. “O aoaoga faavae o loo faataatia mai i le tusi ua faamausaliina ai mea na ou aoaoina i le aiga ma i le Peraimeri mo le umi ou te manatuaina ai. Ma o mea na o loo aoaoina i le Tala’i La’u Talalelei e valaaulia ai le Agaga, o le mea pito sili lea ona taua e mafai ona tatou maua pe a tatou talanoa e uiga i le Ekalesia.”
E Fesoasoani e Faataunuu le Galuega ma le Mamalu o le Tama Faalelagi
O Toma, o le uso matua o Paterika, na foi mai mai le Misiona a Ventura Kalefonia ia Aokuso 2009. Ua ia lagonaina o le Tala’i La’u Talalelei o se tasi lea o meafaigaluega e sili ona lelei mo le galuega faafaifeautalai. E ui na fiafia Toma i le auala na fesoasoani ai le tusi ia te ia ao avea o se faifeautalai, na ia matauina e toetoe lava o saunoaga uma faaperofeta i le galuega faafaifeautalai o loo i itulau e 12–13 o le Tala’i La’u Talalelei o loo talanoa mai e uiga i le matafaioi a tagata o le ekalesia i le faasoaina atu o le talalelei. Fai ma a ia, o se faailoaga lea o le tatau ona fai e tagata o le ekalesia le galuega faafaifeautalai, ae le na o faifeautalai faamisiona.
“Ao lata ona faaiuina la’u misiona,” na ia manatua ai, “sa ou suesue e uiga i tiutetauave o faifeautalai ma le pogai ua tuuina mai ai ia i tatou—o faifeautalai ma tagata o le ekalesia—e faia lenei galuega. Sa ou faitau i le Mose 1:39 ma mafaufau i le galuega faafaifeautalai mai le finagalo o le Tama Faalelagi. Pau lava le mea o loo Ia finagalo ai, ia toe foi atu Lana fanau ia te Ia. O le mea ua tofia ai i tatou ina ia faia, sa ou iloaina, o le fesoasoani atu lea i lo tatou Tama e faataunuu Lana galuega.
“I le avea ai nei la ma se faifeautalai o le uarota, ua ou iloa o le suesue e le aunoa i tusitusiga paia (e aofia ai le suesueina o le Tala’i La’u Talalelei), tatalo, ma le sailia o le Agaga, o le a mafai ai ona faamanuiaina i tatou i soo se taumafaiga. Ma a tatou tuuina le talalelei i le totonugalemu o o tatou olaga ma galulue ina ia faaleleia lo tatou malamalama i ai, o le a faigofie ona faasoa atu ma molimau atu e uiga i ai.”
Ata o tagata o le ekalesia na pueina e Melissa Merrill