Faaaogaina o Sauniga po o Fonotaga a le Aualofa e Aoao Ai ma Uunaia

Saunia e Julie B. Beck

Peresitene Aoao o le Aualofa

E faaaoga e au peresitene musuia o le Aualofa ma taitai perisitua ia sauniga a le Aualofa e faataunuuina ai faamoemoega ma galuega a le Aualofa.

Ua iloa e uso mai i itu uma o le lalolagi e faapea, o sauniga a le Aualofa e mafai ona fesoasoani e aoao ai tamaitai o le Au Paia o Aso e Gata Ai ma faaaofia ai i latou i le galuega o le faaolataga a le Alii.

I Filipaina, sa mananao taitai o le Aualofa e lagolago atu i le Au Peresitene o le Eria i lo latou manao e saunia tagata o le ekalesia e auai atu i le Malumalu o Cebu i Filipaina ina ua maea ona faapaiaina. Sa latou talanoaina ma lo latou epikopo ni manatu. O se taunuuga, sa latou faia ni fonotaga faaopoopo a le Aualofa e faatatau i sauniuniga i le malumalu, o le faia o laei talafeagai, ma faamanuiaga o le totogiina o sefuluai.

I le Aai o Mekisiko, lea e masani lava ona lolovaia i le taimi o timuga mamafa, sa faatulagaina ai e taitai o le Aualofa ni galuega faatino e fesoasoani ai i uso ma o latou aiga e saunia e tuua vave o latou fale. I se isi uarota o loo i ai ni tina se toa 20 ua maliliu a latou tane, sa faatulagaina ai e taitai se fonotaga a le Aualofa e fesoasoani e lagolagosua ma faamalosia na tamaitai.

I Kalefonia, i le ISA, sa faaaogaina e se tasi o peresitene o le Aualofa ni vasega faifai pea i tulaga faamatua e faamalosia ma aoao ai tina talavou. Ua latou amataina nei na vasega i le FaaSipaniolo.

I Moscow, i Rusia, sa mananao ai uso o se tasi o Aualofa e taulai atu i le faamalolosia o o latou aiga ma auaiga e ala lea i le aoaoina o tomai faigofie faatausi aiga. Sa latou amataina i vasega o le kuka, suisui, ma le faamatagofieina o o latou fale.

O aafiaga faapenei na oo mai o se taunuuga o le faataunuuina e taitai o le Aualofa o le faatulagaga fou mo fonotaga po o sauniga a le Aualofa, lea sa fofogaina mai i le taimi o le fonotaga aoao a le Aualofa i le aso 26 o Setema, 2009.¹

Galulue Faatasi

O le Aualofa o le faalapotopotoga aupito toatele lea i le lalolagi. O le iloa ai e galue i lalo o le taitaiga a le perisitua ua tulaga ese ai lava. E mafai ai e le Aualofa i le lalolagi atoa ona aoga i aganuu uma.

O epikopo po o peresitene o le paranesi taitasi ua i ai lo latou tiutetauave mo lana lava iunite. O peresitene taitasi o le Aualofa e valaauina e lagolagosua i se epikopo po o se peresitene o le paranesi se tasi. Ua vaetofiaina taitai perisitua taitoatasi ma au peresitene taitoatasi o le Aualofa ma faamanuiaina ia maua musumusuga mo ona lava tiutetauave faapitoa—ae e le mo se isi lava uarota po o le paranesi po o se vaega o uso o le Aualofa. O se taunuuga, o Aualofa uma lava—pe o i ai i Chile, Hong Kong, Ghana, po o fea lava—e mafai ona latou fuafuaina mea o loo manaomia e o latou uso.

O faataitaiga nei o auala na galulue soosoo tauau ai ni peresitene se toalua o le Aualofa ma o laua epikopo:

Sa fono se au peresitene o le Aualofa i Pleasant Grove, i Iuta, ma lo latou epikopo e talanoaina sini a le uarota a o lei fuafuaina vasega a le Aualofa. E faatatau i na sini, sa fuafuaina ai e taitai o le Aualofa se fonotaga lea na faasoa mai ai e se tasi o uso i le uarota le ala o loo ia faaaogaina ai le Tala’i La’u Talalelei mo afiafi faaleaiga. Sa latou faatulagaina foi ni nai mafutaga faaleaoaoga i le faiga o togalaau, e aofia ai le ala e teu ai meaai mai se faatoaga a se tagata. Fai mai le peresitene o le Aualofa e uiga i le latou fonotaga faaleau peresitene ma le epikopo, “Matou te lagonaina le alofa o lo matou epikopo, ma iloa o loo tatalo o ia i le Alii e fai ma o matou sui.”

O se peresitene o le Aualofa i Liae, i Iuta, sa ia faaaogaina faamatalaga mai le reliefsociety.lds.org, e fautuaina atu ai i le epikopo ni fonotaga mo le ono masina. Fai mai a ia, “Sa ou faamalosiau i lo’u fesoasoani e fai ni aoaoga faamasani a le matou taitai faamaopoopo o fonotaga a le Aualofa ia taulai atu i faamoemoega o le Aualofa, a o la fuafuaina a matou vasega i masina taitasi. Ina ua latou fono ma le komiti a le Aualofa, sa la talosaga atu ia i latou e tatalo mo ni auala e mafai ona matou faaaogaina ai faamoemoega o le Aualofa e taulimaina ai manaoga o le matou uarota. Sa toe foi mai le komiti ma le tele o manatu. Ma faatasi ai ma le sao ma le faamaoniga a le epikopo, sa faamautuina ai loa a matou fuafuaga.

Tatalo mo Musumusuga

O peresitene o le Aualofa e o ifo i o latou tulivae ma ole atu i le Tama Faalelagi e ta’u atu ia te i latou mea e ao ona latou aoaoina, o le a liligi mai ia i latou ia faamanuiaga i le matagofie ma le manino. Fai mai se tasi o peresitene o le Aualofa, “O loo silafia e le Alii loto ma mafaufau o o tatou uso taitoatasi. Na te silafia mea o latou tauivi ma o latou mafatiaga, o latou olioli ma o latou faanoanoaga. Ma e na o Ia lava na te silafia moni le mea sili o le a fesoasoani ia i latou. O lea, o le tatou tali o le ole atu lea i le faatuatua mo le taitaiga.”

O le faamoemoega o le Aualofa o le a tuuina atu ai se malosiaga fou mo taitai o le Aualofa, o uso, ma o latou aiga. O fonotaga a le Aualofa o le a avea ma se nofoaga e mafai ona aoao ai uso ma musuia ai i auala e tali atu ai i o latou manaoga ma, i le isi itu, o manaoga o le uarota po o le paranesi.

Otootoga o Suiga i Fonotaga po o Sauniga a le Aualofa

Ia ogatasia le igoa o fonotaga a le Aualofa ma faamoemoega ma galuega a le Aualofa.
Ia uunaia le fefautuaai i le va o le peresitene o le Aualofa ma le epikopo po o le peresitene o le paranesi.
Ia taulai atu tamaitai i le faamalosia o o latou faatuatua ma le amiotonu o le tagata lava ia.
Ia faamamafa le faamalolosia o aiga ma auaiga.
Tuu atu i uso ni avanoa e faatulaga ai a latou taumafaiga e saili atu ma fesoasoani ia i latou o loo manaomia le fesoasoani.

Otootoga o Aiaiga Faavae mo Fonotaga po o Sauniga a le Aualofa

O le peresitene o le Aualofa e na te vaaia fonotaga uma a le Aualofa; e mafai ona ia tuuina atu i le fesoasoani muamua po o le fesoasoani lua e fesoasoani ia te ia i fonotaga a le Aualofa.
E mafai ona valaauina se tamaitai o le uarota po o le paranesi e avea ma taitai faamaopoopo o fonotaga a le Aualofa. E mafai ona valaauina se komiti o le Aualofa e fesoasoani ia te ia.
O fonotaga po o sauniga faaopoopo a le Aualofa e masani ona faia faalemasina, ae e mafai ona fautuaina atu e le au peresitene o le Aualofa ina ia faia e le aunoa pe tuuitiitia foi. E tatau ona faia taumafaiga ina ia faia ia fonotaga po o ia sauniga ia le itiiti ifo i le tai tolu masina, ma e masani ona faia i se taimi e ese mai i le Aso Sa po o le afiafi o le Aso Gafua. Ia le itiiti ifo ma le toatasi se sui o le au peresitene o le Aualofa e tatau ona auai i fonotaga po o sauniga uma a le Aualofa.
I le fuafuaina o fonotaga, e tatau i taitai ona tuu atu le faamuamua i autu e faataunuuina ai faamoemoega o le Aualofa, e pei o faaipoipoga ma aiga, o le tausi aiga, o le ola fuafua lelei ma le faalagolago o le tagata ia te ia lava, galuega alofa, malumalu ma talafaasolopito o aiga, faasoaina atu o le talalelei, ma isi mataupu e talosagaina e le epikopo po o le peresitene o le paranesi.
E mafai ona taulai atu fonotaga i se autu e tasi pe vaevaeina i ni vasega po o se gaoioiga. I le aotelega, o faiaoga e tatau o se tagata o le uarota po o le siteki.
E mafai ona avea nei fonotaga po o sauniga o ni faaopoopoga taua i aoaoga o le Aso Sa, aemaise lava mo uso o loo auauna atu i le Peraimeri po o Tamaitai Talavou po o e e le mafai ona auai atu i sauniga o le Aso Sa.
E tatau ona mulimuli taitai o le Aualofa i tulafono ma aiaiga a le Ekalesia e uiga i tupe ma gaoioiga.

Fonotaga po o Sauniga a le Aualofa a le Siteki

Pe a faamaonia e le peresitene o le siteki, e mafai ona faia ni fonotaga se tasi pe lua e fuafuaina ma faataunuuina e le au peresitene o le Aualofa a le siteki i tausaga taitasi mo uso uma o le Aualofa i le siteki. O se tasi o nei fonotaga a le Aualofa a le siteki e mafai ona tuufaatasi ma le faasalalauga faaletausaga o le sauniga aoao a le Aualofa, lea o le a faia i le aso 25 o Setema o lenei tausaga.

Fefautuaai ma le Epikopo po o le Peresitene o le Paranesi

O le faaaogaina tatau o fonotaga a le Aualofa o le a faateleina ai le tomai o le Aualofa e galulue i ala mamana faatasi ai ma taitai perisitua i uarota po o paranesi taitasi.

Ia le aunoa ona saili atu le peresitene o le Aualofa mo ni fautuaga mai lona epikopo po o le peresitene o le paranesi e faatatau i auala e mafai ai e nei fonotaga ona faamalolosia tagata taitoatasi ma aiga.
E fautuaina atu e le au peresitene o le Aualofa ia fonotaga a le Aualofa i le epikopo po o le peresitene o le paranesi mo lana faamaoniga, ae ia tagatagai foi i tiutetauave faatulagaina o uso, tulaga i aiga, le mamao ma le tau o femalagaaiga, saogalemu, tupe faaalu a le uarota po o le paranesi, ma isi tulaga i le lotoifale.

Ata na tusia e Israel antunes