O Le Mea Ua Tatou Talitonu I Ai

O Le a Talai Atu le Talalelei i le Lalolagi Uma

A o soifua Iesu Keriso i luga o le fogaeleele, na Ia aoao atu i isi se auala e ola ai e mafai ona taitaiina atu ai i latou i le fiafia i lenei olaga ma le olaga a sau. O Lana savali o se savali o le filemu, alofa, ma le usiusitai i poloaiga a le Atua. “Na femaliuai o Ia i aai ma faoa aai, ua talai ma folafola le tala lelei o le malo o le Atua” (Luka 8:1). Na Ia aoao atu foi o sauniga, e pei o le papatisoga, e manaomia mo lo tatou toe foi atu i le Tama Faalelagi (tagai Ioane 3:5).

Na Ia fetalai atu i Ona soo o le a “talaiina atu foi lenei talalelei o le malo i le atulaulau uma” (Mataio 24:14). O le mea lea, na Ia auina atu ai i latou “e talai” [atu le talalelei] (Mareko 3:14). O le galuega lava lea e tasi ua Ia tuuina mai ia i tatou i le aso—faasoa atu Lana talalelei i isi. I le tausaga e 1831 na Ia faaalia mai ai e ala i le Perofeta o Iosefa Samita, “O le a talaiina atu foi lenei talalelei i atunuu uma, ma ituaiga, ma gagana, ma nuu” (MFF 133:37).

E mafai ona tatou vaai atu i lo tatou Faaola o se faataitaiga i le auala e faasoa atu ai le talalelei. Na Ia aoao atu ma le manino le talalelei (tagai Mataio 5–7). Na Ia faaaogaina tatau avanoa faigofie e lei fuafuaina e faasoa atu ai le talalelei (tagai Ioane 4:4–42). Ma na Ia faaalia le alofa moni ma le popole mo isi (tagai 3 Nifae 17). E mafai foi ona tatou faia faapea.

Na valaaulia e Iesu Keriso tagata uma e o mai ia te Ia. E mafai ona tatou fesoasoani atu i tagata ia o mai ia te Ia e ala i le faasoaina atu o Lana talalelei ia i latou. O nisi nei o auala e faia ai:

1. Faaali atu le olioli tatou te lagonaina a o tatou ola ai i le talalelei a Iesu Keriso.

2. Ia faaali atu le agaga faauo i tagata uma.

3. Valaaulia uo i sauniga, gaoioiga, ma auaunaga faatino a le Ekalesia.

4. Faasoa atu kopi o le Tusi a Mamona po o le Liahona ia i latou e le auai i la tatou tapuaiga.

5. Faaaoga le Initoneti e faasoa atu ai le talalelei. Mo se faataitaiga, e mafai ona tatou faasoa atu a tatou molimau i se lautusi faaletagata i le initoneti pe faasino atu tagata i Uepi saite a le Ekalesia e pei o le Mormon.org .

6. Ia saunia o ni alii talavou, tamaitai talavou, ma ni tagata matutua e auauna atu i ni misiona.

7. Valaaulia uo ma tuaoi ina ia aoaoina e faifeautalai.

Mo nisi faamatalaga, tagai i le Mataupu Faavae o le Talalelei (2009), 189–95; Faamaoni i le Faatuatua (2004), 75–77.

“Ua valaauina oulua e alagaina le salamo i lenei nuu.

“Afai foi e faapea ona oulua galulue i o oulua aso uma i le alagaina o le salamo i lenei nuu, ma aumaia, tau lava o se agaga e toatasi ia te au, faauta i le tele o lo outou olioli faatasi ma ia i le malo o lo’u Tama!” (MFF 18:14–15).

“Ou te talosaga atu ina ia faaauau pea lo outou faatuatua ma tatalo mo eria e utiuti so tatou aafiaga o i ai, ma nofoaga e le o faatagaina ona tatou faasoa saoloto atu ai le talalelei i le taimi nei. E mafai ona tutupu vavega pe a tatou faia lena mea.”

Peresitene Thomas S. Monson, “Susu Maia ma Talaaao Mai i le Konafesi,” Liahona, Nov. 2009, 6.

Ata na tusia e Steve Bunderson; Iesu Keriso, saunia e Harry Anderson © IRI