O Lo Tatou Avanoa
Faaosofia e le Tala’i La’u Talalelei
O se tasi o aso a o ou fesoasoani e tapena lo matou fale, sa ou tau ai i le tusi a lo’u tuagane o le Tala’i La’u Talalelei mai lana misiona. Sa ou iloa sa faaaoga e faifeautalai, ae ou te lei tilotilo lava i ai muamua. Sa amata ona ou faitauina ma na toetoe a le mafai ona ou tuuina i lalo. (Ae sa tatau ona ou tuuina i lalo ona sa tele au galuega e fai, ae ou te lei manao ai!)
Sa masani lava ona ou mafaufau pe faapefea ona fai e faifeautalai mea o loo latou faia. Ua ou iloaina o le Tala’i La’u Talalelei e mafai ona fesoasoani ia te au ou te malamalama atili ai i le galuega faafaifeautalai. Ua fesoasoani ia ou lelei atili i le alu atu i tagata ma talanoa i ai ma faasoa atu i ai le talalelei i se auala e sili atu ona lelei.
Alissa F. (luga), 19 tausaga, New Hampshire, ISA
Ina ua ou iloa maulu i le sami mo se taimi umi e faaaoga ai se tane ea e manava ai, sa ou aveina se mea pueata e faaaoga i lalo o le sami ma tapue ai ata o i’a taitasi sa ou vaai i ai. E ala mai i lenei mausa, na ou maua ai se molimau i le foafoaga silisili o le lalolagi. Pe a fesili tagata po o le a se faamaoniga o le i ai o se Atua, ou te mafaufau lava i le Mose 6:63, lea na fetalai ai le Alii, “Ua foafoaina ma faia mea uma ia latou molimauina au, o mea i la le tino, atoa ma mea i la le agaga; o mea o i luga i le lagi, o mea foi o i totonu o le lalolagi,… atoa ma mea o loo i lalo ifo o le lalolagi.”
Elder Bates, 20 tausaga, Misiona a Cauayan Filipaina
O Le Mau e Sili Ona Ou Fiafia i Ai
O loo faapea mai lenei mau, e moni lava o loo i ai se Atua. Fai mai, ana faapea e leai se agasala, e leai foi la se amiotonu. E tatau lava ona i ai le faafeagai. O se mau o loo molimau mai i le Atua.
Maria H. (lalo), 15 tausaga, Hesse, Siamani
Konafesi a le Autalavou
Ina ua ou auai i le konafesi a le autalavou i se tasi o tausaga, sa lilo ia te au se aafiaga o le a ou oo i ai. E tolu aso sa faatumulia i gaoioiga malie, ma sa ou fiafia ua ou toe vaai i au uo ua leva, feiloai i uo fou, ma aofia ai i gaoioiga. Ae o le vaega sa sili ona ou fiafia i ai o le sauniga molimau. Sa malosi le Agaga ao tuuina atu a matou molimau o le talalelei, ma e toatele i matou sa maligi loimata. O au lava ia, sa tele ni aso sa tumau ai pea lenei lagona matagofie ina ua mae’a le konafesi, ma sa ou manao ia tumau ai pea. Ou te lei toe matamata i le televise pe faalogologo foi i ni musika e le o ni musika a le Ekalesia. O lenei aafiaga sa faamalosia moni ai la’u molimau i le Ekalesia.
O le Agaga ua na o le pau lea o le auala tatou te iloa ai le moni o le Ekalesia. E tatau ona tatou faia ni mea e faatagaina ai le Agaga Paia e mafuta ma i tatou, e pei o le suesue i tusitusiga paia, tatalo faamaoni i aso uma, ma mafaufau i taimi na tatou lagonaina ai le Agaga. Pe a tatou ola i le Agaga, e mafai ona tatou lagonaina Lona mafanafana ma iloa ai e moni le Ekalesia. Ou te alofa i le talalelei; e maua ai tali ma le taitaiga. Ou te moomoo ia iloa e tagata uma o le lalolagi ia mea ua tatou iloa.
Tahnee H., 20 tausaga, Ausetalia i Saute
Ata o le tagavai © Getty Images; o isi ata na pueina e Melissa Merrill, J. Tyler Bates, ma David A. Edwards