O Le Pulelaa i le Maota Autu mo Konafesi

Mai ia Peresitene Gordon B. Hinckley (1910–2008), “Molimau Atu i le Lalolagi Atoa,” Liahona, Iulai 2000, 6.

O le pulelaa i le Maota Autu mo Konafesi e i ai sona talaaga uigaese. O le saunoaga lenei a Peresitene Gordon B. Hinckley e uiga i ai:

“Ou te fiafia tele i laau. A o ou laitiiti, sa matou nonofo i se faatoaga i le taumafanafana, o se faatoaga o laau suamalie. O tausaga uma lava i le vaitau lenei, matou te totoina ai ni laau. Ou te masalo ou te le’i misia lava se tautotogo talu ona ou faaipoipo, sei vagana ai ni tausaga pe lua pe tolu foi, sa matou le i ai i le aai, ou te le’i totoina ai ni laau. …

“I le 36 tausaga ua mavae, sa ou totoina ai se uolanati uliuli [black walnut]. O se vaega putuputu na tupu sa’o a’e ai ma umi ia maua le susulu o le la. Ua tasi le tausaga talu ai, e le iloa le mafuaaga na pe ai. O le uolanati e taua tele lona ogalaau e fai ai meaafale. Sa ou telefoni ia Uso Banks, o le Fitugafulu, o le sa fai lana pisinisi falelaupapa a o lei tuuina atu atoa lona taimi i le Ekalesia. Na sau ma aumai ona atalii e toalua, o le tasi o se epikopo a o le isi faatoa faamalolo talu ai nei i le avea ai ma se epikopo, ma o ia lea ua vaaia nei le pisinisi, e vaai i le laau. Na pau le mea na mafai ona latou ta’u mai, o se laau malo, lelei, ma manaia. Na fautua mai se tasi o i laua e mafai ona fai ai se pulelaa mo lenei maota. Sa faagaeetia au i lea manatu. Sa tatuu i lalo le laau ona vaevaeina ai lea i ni ogalaau mamafa se lua. Ona faagasolo ai lea o le faiga umi o le faamagoina, muamua sa faamago i le la, ona ave ai lea i se ogaumu tele e faamago ai. Sa tatipiina ogalaau e fai ai laupapa i se ili i Salema, i Iuta. Ona auina atu ai lea o laupapa i le fale kamuta o Fetzer, i le mea na fuafuaina ai e kamuta tomai ma fausia ai lenei pulelaa matagofie i lena laau.

“E matagofie le taunuuga. Maimau pe ana mafai e outou uma ona vaavaai latalata i ai. O loo atagia mai ai se galuega taulima maoae, ma o lea ua ou tautala atu ia te outou mai le laau sa ou totoina i tua o lo’u fale i le mea sa taaalo ai la’u fanau ma ola ae ai.

“O se mea e ootia ai lo’u loto. Ua ou totoina nisi uolanati pe tasi pe lua. E umi se taimi o le a ou mavae atu ai ona faatoa matutua lea. Pe a oo mai lena aso, ma ua loa foi le tautua a lenei pulelaa, atonu o le a aoga se tasi o na laau e sui ai. Lau susuga Elder Banks ma ou alo, o Ben ma Bradley, ma kamuta tomai na mamanuina lenei pulelaa, ou te momoli atu la’u faafetai tele, ina ua mafai ona i ai sina a’u vaega itiiti i lenei maota tele, i le mea o le a momoli atu ai siufofoga o perofeta i le lalolagi atoa ao molimau atu e uiga i le Togiola o tagata.”