Manatu mo Afiafi Faaleaiga

E tele ni tusitusiga i lenei lomiga o loo talanoaina ai galuega faamisiona. Ia manatu e faaaoga le afiafi faaleaiga e fausia ai se fuafuaga faafaifeautalai a le aiga, e aofia sini o le a fesoasoani i lou aiga e faasoa atu ai le talalelei. E mafai foi ona outou talanoaina ia saunoaga mai konafesi na sei mavae atu nei e uiga i galuega faafaifeautalai (tagai Thomas S. Monson, “O Sauniuniga e Aumaia ai Faamanuiaga,” Liahona, Me 2010, 64; Ronald A. Rasband, “O Le Valaauga Paia o se Faifeautalai,” Liahona, Me 2010, 51).

“O La’u Lava Tusi a Mamona,” itulau e 6: A uma ona faitauina lenei tala, mafaufau e valaaulia tagata o le aiga e tuu o latou igoa i se mau e fiafia i ai, e faaalia ai e mafai ona latou avea e faapei o alii ma tamaitai amiotonu o tusitusiga paia. Mo se faataitaiga, “Ua oo ina fai atu a’u [igoa o le tagata o le aiga], i lo’u tama: Ou te alu ma fai ia mea ua poloaiina e le Atua …” (1 Nifae 3:7).

“O Le Aumaia o Keriso i Totonu o o Tatou Aiga,” itulau e 14: A uma ona faitauina faatasi e lo outou aiga lenei tala, e mafai ona faatuina se sini e tauloto le “O Le Keriso Soifua” ma ao mai ni ata o le Faaola e fesoasoani ai i tagata o le aiga “ia manatua pea o ia” (Moronae 4:3).

E Faigofie Ae Maoae

E lei leva atu sa malaga mai ai lo matou aiga mai Korea i le Iunaite Setete. Sa le mautonu a o tau faamautu lo matou aiga. O le Aso Gafua muamua lava, sa faia ai se matou afiafi faaleaiga faigofie. Sa na o se seti o tusitusiga paia sa i ai, o lea na matou faitau ai i le 3 Nifae e uiga i le afio atu o Keriso i a Sa Nifae. Sa matou lagonaina e tusa lava po o le a le fou atoa o le tulaga ua matou i ai, le nofoaga, ma le atunuu, ae e manatu mai pea le Alii ia i matou, e pei foi lava ona Ia faia ia Sa Nifae.

Sa matou tootutuli i se li’o ma tatalo o se aiga. Sa tiga lava lo matou le lavava mai le malaga, ae sa matou lagonaina lava se lagona o le mafanafana, i lo matou iloa ai o loo i ai lava se isi tagata ma o le Tama Faalelagi ma le Faaola e faalagolago i ai. Sa matou iloaina o le a lelei mea uma. Ma sa faapena lava.

Yun Jung Nam, Texas, ISA