O o Tatou Faifeau Faamisiona Matutua
O i latou ua “pei o le sau mai ia Ieova, pei o le ua foi i luga o vao iti.”
I le avea ma se sui o le Au Peresitene o le Eria i Asia, ua ia te au se avanoa faapitoa e auauna atu ai i se eria o le lalolagi na ou alofa i ai ao avea au ma se faifeautalai talavou i le silia ma le 45 tausaga ua mavae. Ua i ai suiga talu mai lena taimi. O le Misiona a Saute Sasae Mamao sa i ai i lena taimi ua aofia ai nei le silia ma le 25 o misiona. O sina faitauaofai o tagata i nai paranesi ua tuputupu ae i le 750,000 tagata auai. Ua tele falelotu i le atunuu, ma ua mafai ona maua e tagata o le Ekalesia i Asia le avanoa e o atu ai e tapuai i le malumalu.
A o tuputupu ae le Ekalesia i Asia, na amata ona ou alofa ma talisapaia se vaega o tagata o e e le saili mo se taui, se viiga, ma soo se isi lava totogi faalelalolagi. Na pau lava le mea latou te sailia o le viia o lo tatou Tama o i le Lagi. O i latou o o tatou faifeau faamisiona matutua: o uso ma tuafafine lelei, ma tele le tomai o e o loo fesoasoani le leoa ma le maelega “e faataatia le faavae o lenei ekalesia, ma ia aumaia i fafo nai le mea lilo ma le pogisa” (MFF 1:30).
O o latou aafiaga, faatuatua, molimau, ma le alofa ua mafai ai ona latou faia vavega matagofie i le faatuina ma le faamalosia o le Ekalesia i la matou itu o le tovine a le Alii—mai Ulaanbaatar i New Delhi. O i latou ia na faamatalaina e Mika, “E i ai foi e ua totoe o Iakopo i nuu e tele e pei o le sau mai ia Ieova, pei o le ua foi i luga o vao iti” (Mika 5:7).
I le tele lava o tulaga sa latou tetei i nofoaga na valaauina i ai latou. O nisi o i latou, atonu e pei o le perofeta o Iona, e ono filifilia Tasesa nai lo Nineva, e pei ona sa i ai. Ae latou te lei “sosola i Tasesa ai luma o Ieova” pe nonofo “i le manava o le i’a i le tolu ao tolu foi po” (Iona 1:3, 17). Nai lo lena, i le iloaina lea o o latou valaauga na sau mai le Alii, “ona [latou] tuua loa lea o [latou] upega, a e mulimuli atu ia te ia” (Mataio 4:20).
O nisi o o latou tofiga e tele ma e eseese foi e aofia ai le galulue i malumalu, faiaoga i le seminare ma le inisitituti, galulue i ofisa o misiona, faafoeina o le Tupe Faaagaga mo Aoga, galulue i paranesi (aoaoina, faia o aoaoga faamasani, faatoaagaina, ma le faasoaina atu), faufautua ma fesoasoani i tagata e faaleleia ia tomai faafaigaluega ma faalautele ia auaunaga, galulue i a latou matata faapitoa (tulafono, tupe, enisinia, aoaoga, soifua maloloina), faamaopoopo auaunaga agaalofa, ma tuuina atu le toomaga i taimi o lologa, mafuie, ma isi mala faalenatura. O nisi o i latou e mafai foi ona auai i le sailia, aoaoina, ma le papatisoina o tagata fou o le ekalesia!
O Elder Phil ma Sister Brenda Frandsen o se tasi lea o ia ituaiga ulugalii. Sa la auauna atu i Kaohsiung, Taiuani. E faaopoopo atu la i isi ona tiutetauave, sa galue Elder Frandsen o se fesoasoani i le peresitene o le misiona. O le faatalanoaga puupuu lenei ma le au Frandsen e faailoa atu ai manatu ma lagona o le tele o ulugalii ma e atonu e tuuina atu ai sina malamalamaaga mo i latou o e o mafaufau e auauna atu faafaifeautalai.
O a ni o oulua manatu a o oulua mafaufau ai e auauna atu i se misiona?
Sister Frandsen: “E masani lava ona ma talatalanoa e uiga i le auauna atu i se misiona pe a matutua le ma fanau. Ina ua oo mai le taimi, sa faigata ona ma malilie i se mea o le a ma o i ai ma po o le a foi se mea o le a ma faia. Ina ua maea le tele o talanoaga, sa fautua mai Elder Frandsen ma te tuuina atu le filifiliga i le Alii. Ina ua maua le ma valaauga o le misiona, sa leai se isi mea na sili atu le faagaeetia. Sa ma mafaufau i ai o se faamanuiaga e matuai faapitoa lava!”
O a ni ou lagona e uiga i le toe foi i lau misiona sa e i ai muamua?
Elder Frandsen: “O le toe foi atu i le mavae ai o le 44 tausaga o toesea mai, o se aafiaga e sili ona faamalie loto. I se eria lea sa i ai muamua se tamai paranesi i se fale mautotogi, ua tu ai nei se fale autu matagofie o le siteki. O se tamaitiiti sa valu tausaga i lena taimi ua avea nei o se peresitene tuuto o le siteki. O le agai i luma i lenei vaega o le lalolagi ua matuai ofoofogia lava. E i ai lava i aso uma se aafiaga fou faaleagaga a o ma galulue ai ma Sister Frandsen e fesoasoani i tagata taitoatasi ia maua pe faamalosia a latou molimau.”
Pe lua te manatu o faaaogaina lelei oulua?
Elder Frandsen: “Ua mafai ona faaaoga a maua taleni ma poto masani, ma ua mafai ona ma iloaina taleni ma te lei iloa sa ia i maua. Ua mafai ona ou toe aoaoina le tele o la’u faaSaina. Ua mafai e Sister Frandsen ona tali le telefoni i le faaSaina ma ua mafai ona ia faitauina igoa e auina atu i ai ia meli. Ma te lagona o le aoaoina o tomai fou i lo ma matutua ua i ai nei, e lelei lea mo faiai ua fai sina matutua!”
Ae faapefea lo oulua aiga?
Sister Frandsen: “Sa ou popole lava i le toesea mai le fanau ma a latou fanau. Ae peitai, o loo i ai tekinolosi maoae mo fesootaiga o loo avanoa mo faifeau faamisiona matutua. I nisi o tulaga, ua sili atu ona ou faalogo ma vaai soo i lo matou aiga nai lo le taimi sa ma i ai i le fale. O le a le itiiti ifo ma le toafa ia fanau a le ma fanau o le a fananau mai a o ma i ai iinei, lea ma te faitauina o se tasi lea o faamanuiaga silisili o faamanuiaga uma lava. E ui lava o le a ou misia le siiina o pepe fou faatoa fananau mai, ae o le a ma vaai i ata ma vitio pe a tutupu nei mea. Nai lo le aveesea mai o i maua mai le aiga, o le tele lava o itu, ua atili aumai faatasi ai i matou e le ma misiona.”
Elder Frandsen: “O le mea moni lava, ma te lagona ua faatoateleina lo ma aiga e ala i le o i se misiona. O i maua o ‘matua matutua’ i faifeautalai. E faagaeetia i maua i aso taitasi i le faasoa mai e faifeautalai talavou ia i ma’ua o a latou misiona. Ma te alolofa ia i latou—ma e latou te alolofa foi ia i maua! E te fiafia ea e faalogo o lipoti mai e faifeautalai ua maea se misiona o latou aafiaga o le faasoaina atu o le talalelei? Ma te faalogo i na aafiaga i aso uma a o fou ma a o tele foi ina lei faasa’osa’oina. O le vaavaai atu i faifeautalai ua faatagata matutua ma tutupu ae o ni faiaoga ma ni taitai mataalia e le mafaatauina o le talalelei!”
Sister Frandsen: “A o ma toesea, sa ma faia lava galuega faamisiona i Arisona. E toalua a ma uo mamae na valaauliaina ia faifeautalai i o laua aiga. Ma le isi, sa filifili le ma tama teine ma lona toalua e faasoa atu le talalelei i se tasi tagata. O se taunuuga, e lei leva atu ona papatisoina se tasi o a laua uo. O le tele lava o le ma taumafai e auauna atu, o le tele foi lea o faamanuiaga ma te maua. E faigata ona e muamua i le Alii.”
Pe o le auauna atu i se misiona o se tulaga faamalieina lea ia te oe lava ia?
Elder Frandsen: “O le galuega faamisiona e leai lava se taimi e le manaia ai! E i ai lava i aso uma ni luitau fou ma ni aafiaga fou. E faaopoopo atu i o ma tiute i le ofisa, ma te faiaoga i se vasega Igilisi i taeao o Aso Toonai ma le vasega o le Mataupu Faavae o le Talalelei i taeao o Aso Sa. E faalua i le vaiaso ona ma faiaoga i vasega Igilisi e sauniuni ai mo le kolisi mo faifeautalai ua maea misiona. O loo ma aofia foi i le sailia ma le aoaoina o tagata sailiili. O avanoa uma lava e auauna atu ai e tatalaina ai faitotoa fou mo le aoaoina atu o le talalelei.”
Pe i ai se fautuaga mo ulugalii o loo mafaufau i se misiona?
Sister Frandsen: “Atonu o se tasi o o’u popolega tele sa i ai o le tulaga lea i le soifua maloloina; nai lo lena, ua ma mauaina ni faamanuiaga o le ola maloloina. O le ma faatulagaga faamisiona e matua maloloina lava. Ma te alapopō lava, vave foi ona momoe, faamalositino i aso uma, ma aai i meaai paleni. E faamanuiaina e le Alii faifeautalai i le malosi e faatino ai a latou galuega. E leai se mea e te fefe ai!”
Elder Frandsen: “O nisi o taimi ma te tōē ai pe a mafaufau i le faapea o lo matou aiga o loo ma faia se osigataulaga. E matua laitiiti lava le osigataulaga pe a faatusa lea i faamanuiaga, olioli, ma le loto malie lea e tuuina mai e le Atua ia i maua i aso taitasi.”
O aafiaga a le au Frandsen o manatu faaalia masani ia matou te faalogo i ai mai isi faifeau faamisiona matutua o loo auauna atu i Asia atoa. Talu ai nei lava, sa matua ootia lava se tasi o ulugalii matutua ina ua ta’u atu i ai e mafai ona faauma vave i se masina e tasi le la misiona ina ia mafai ona la i ai i lo latou aiga i le vaitaimi o le Kerisimasi. Sa matou manatu o o la loimata o loimata ia o le fiafia mo le avanoa e toe faatasia ai ma le la fanau ma a latou fanau i le Kerisimasi. Matou te lei iloaina o o laua loimata o loimata o le faanoanoa. O le iloaina atonu la te le toe maua se isi avanoa e auauna atu ai i lenei tulaga, sa la mananao ai e faaalu se Kerisimasi mulimuli se tasi i le misiona!
Ou te faamamaluina o tatou faifeau faamisiona matutua. E moni lava ua tuuina atu ia i latou le mana i nofoaga lea e manaomia ai ona faataatia le faavae o lenei Ekalesia ma ia aumaia i fafo nai le mea lilo ma le pogisa.
E auauna atu faifeau faamisiona matutua i le tele o tofiga eseese.
Luga, mai le agavale: O Elder ma Sister Frandsen ma faifeautalai o le latou itu; o Elder Frandsen o loo sauni e o ma alii faifeautalai talavou e talai tuitui i faitotoa; o Sister Frandsen o loo galue i le Peraimeri; o le Malumalu o Mekisiko i le Aai o Mekisiko, lea na galulue ai Brother ma Sister Ortíz (tagai i lalo); O Elder ma Sister Lopes na valaauina e fesoasoani e ao mai ma tusia le talafaasolopito o le Ekalesia i Pasila.
Ata na tusia e Steve Bunderson, Hyun Gyu Lee, Welden C. Andersen, Cody Bell, Farrell Barlow, ma David Stoker
Taumatau: o ata pue muamua e tolu mai faaaloaloga a Phil ma Brenda Frandsen; ata pue o le Malumalu o Mekisiko Aai a Mekisiko na saunia e Welden C. Andersen; ata na pueina e Laureni Ademar Fochetto