O Se Teineitiiti Faatuatua e Igoa ia Ema

Saunia e Mark Staker

Matagaluega o Talafaasolopito a le Ekalesia

O le a se tele o lou iloa e uiga i le teineitiiti faatuatua na tuputupu ae ma avea ma faletua o le Perofeta o Iosefa Samita?

Sa fanau Ema Hale i le aso 10 o Iulai, 1804. Sa ola ae i se faatoaga faatasi ma lona tama ma lona tina ma ona tuagane ma uso e toavalu. Sa nonofo latalata ane foi nisi o ona aiga ma tausoga.

O le faatoaga a le aiga o Hale sa i Heremoni, Penisilevania, i se vanu matagofie e lata i le auvai o le vaitafe o Susquehanna. Sa mafai ona tau apu Ema mai le toga apu. Sa mafai foi ona matamata i tamai mamoe e taaalo, ma sa mafai foi ona fesoasoani e tau mai fualaau faisua mai le faatoaga tele. A amata ona liusuavai le kiona, e matamata atu o ia a o aoina mai e lona tamā le sua o le laau faisuka i pakete lapopoa. Sa fesoasoani foi o ia i lona tina e tunu faapuna lea sua ina ia maua ai le suka.

A o pepe Ema, sa papatiso o ia i se lotu Kerisiano, ma sa alu i le Aoga Aso Sa ao laitiiti. O le taimi lea e lei toefuataiina mai le Ekalesia a Iesu Keriso.

I se tasi o aso pe a ma le valu tausaga o Ema, sa alu ai o ia i le togavao e tatalo. Sa popole o ia mo lona tama aua e lei malosi lona faatuatua ia Iesu Keriso. A o tatalo Ema, sa sau lona tama i le togavao e tulimanu. Ina ua faalogo atu o loo tatalo lona afafine laitiiti mo ia, sa matuai ootia o ia. Sa faamalosia ai lona faatuatua i le Alii.

Sa tuputupu ae Ema o se teine umi ma le atamai. O ia o se tamaitai na lelei tele i le faitautusi ma le tusitusi. Ina ua 21 ona tausaga, sa sau ai se alii talavou galue malosi ma atamai e igoa ia Iosefa Samita ma nofo i le aiga o Hale. O Ema Hale o se tamaitai tausaafia ma gaoioi vave. O ia o se tamaitai talavou amio mama. E leitioa a filifili e i la’ua ma Iosefa ia le tasi ma le isi e avea ma se tane ma se ava!

O Ema Ina Ua Matua

Su’e ata e fetaui ma nisi o mea taua sa faia e Ema ao tuputupu ae o ia. Ia tusi le numera o mea taitasi na tutupu i luga o ata e fetaui i ai.

1. Ina ua alu atu Iosefa i le Mauga o Kumora e aumai papatusi auro mai ia Moronae, sa la o faatasi ma Ema ona faatali atu lea [o Ema] i le taavale solofanua.

2. A o faaliliuina e Iosefa ia papatusi auro, o Ema o le tusiupu muamua lea. E ta’u atu e Iosefa ia te ia mea e tusi i lalo a o ia faaliliuina upu.

3. Sa tuufaatasia e Ema ia viiga mo le tusi pese muamua a le Ekalesia.

4. O ia o le uluai peresitene o le Aualofa i Navu.

5. Sa fesoasoani o ia i tagata sa mama’i ma talia tagata matitiva e nonofo i lona aiga.

6. Ina ua tuli faamalosi ese tagata o le Ekalesia mai o latou fale i Misuri, sa latou savalia faatasi ma lana fanau le vaitafe malulu o Misisipi e sosola ese ai. Sa nonoaina i lona puimanava ni ato taga se lua, sa ia tauavaeina ai ni pepa sa i ai le faaliliuga a Iosefa o le Tusi Paia.

7. O ia o se tina agaalofa o se fanau e toa 11, e aofia ai le toalua sa laua vaetamaina. E na o le toa 5 o i latou sa ola e avea ma ni tagata matutua.

8. Sa alofa Ema i lona toalua o Iosefa, i lona olaga atoa ma faia le tele o mea e lagolago ai o ia i lana galuega taua o le toefuataiina mai o le Ekalesia a le Alii.

Tauagavale: ata na tusia e Julie Rogers; taumatau: E Pele Mea Uma, saunia e Julie Rogers; O Se Taimi e Ata Ai, saunia e Liz Lemon Swindle, Foundation Arts, e le mafai ona kopiina; O Iosefa ma Ema i le Mauga o Kumora, saunia e Robert T. Barrett © 1987; Viiga a Ema, saunia e Liz Lemon Swindle, Foundation Arts, e le mafai ona kopiina; O Le A Faamafanafanaina Outou, saunia e Liz Lemon Swindle, Foundation Arts, e le mafai ona kopiina; Ema Samita, o le Tamaitai Filifilia, saunia e Theodore Gorka © 1996 IRI; Faalapotopotoga a le Aualofa, saunia e Dale Kilbourn © IRI; ata na pueina e Jed A. Clark; I Le Tasi o le Loto, saunia e Liz Lemon Swindle, Foundation Arts, e le mafai ona kopiina