O Lo Tatou Tiutetauave le Faafaileleina o le Tupulaga Faia’e

Suesue i mea nei, ma pe a talafeagai ai, ia talanoaina faatasi ai ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga.

Faatuatua • Aiga • Toomaga

Mai Mau

Faataoto 22:6; Efeso 6:4; Enosa 1:1; Alema 53:20–21; 56:47; 57:27

A aunoa ma le faafaileleina, e ono lamatia o tatou tupulaga faia’e e pei o i latou o loo faamatalaina i le Mosaea 26. O le toatele o le autalavou e lei talitonu i upu a o latou tama ma ua avea o se nuu ese i lo latou faatuatua, ma na tumau ai lava faapena. E mafai foi ona taitaiina ese atu o tatou tupulaga faia’e pe afai latou te le malamalama i la latou vaega i le fuafuaga a le Tama Faalelagi.

Ia o le a la le mea o le a tausia ai le tupulaga faia’e ia saogalemu? I totonu o le Ekalesia, tatou te aoao atu ai mataupu faavae faaola, ma o na mataupu faavae o mataupu faavae a aiga, o mataupu faavae ia o le a fesoasoani i le tupulaga faia’e e atiina ae ai se aiga, aoao ai lena aiga, ma saunia lena aiga mo sauniga ma feagaiga—ona aoao atu lea e le tasi tupulaga le isi [tupulaga] ma faasolosolo ai lava.

I le avea ai ma ni matua, taitai, ma tagata o le Ekalesia, o loo tatou saunia ai lenei tupulaga mo faamanuiaga a Aperaamo, mo le malumalu. Ua ia i tatou le tiutetauave ina ia matua manino i manatu autu o aoaoga faavae o loo maua i le folafolaga i le aiga. O tulaga faatina ma faatama o ni matafaioi ma ni tiutetauave e faavavau. E tauave e i tatou taitasi le tiutetauave o le alii po o le tamaitai i le fuafuaga.

E mafai ona tatou aoao atu lenei mataupu faavae i soo se nofoaga. E tatau ona tatou talanoa ma le faaaloalo e uiga i le faaipoipoga ma le aiga. Ma e mai a tatou lava faataitaiga, o le a mafai ai e le tupulaga faia’e ona maua le faamoemoe lelei ma le malamalama—e le na o upu tatou te tautatala ai ae mai le ala o loo tatou lagona ma faaali atu ai le agaga o le aiga.

Julie B. Beck, peresitene aoao o le Aualofa.

Mai lo Tatou Talafaasolopito

I le sauniga aoao a le Aualofa i le aso 23 o Setema, 1995 na saunoa ai Peresitene Gordon B. Hinckley i tamaitai e faapea: “Ua i ai nei i tatou i se lalolagi faigata, i le fesuisuiai o mataupu taua. O leo malolosi o loo valaau mai mo se tasi mea po o se isi mea e taitaiese ai [tatou] mai aoaoga sao ua faamaonia i taimi lo latou aoga.”¹ Ona folasia mai lea e Peresitene Hinckley i tamaitai, i le Ekalesia, ma mulimuli ane ai i tagata i soo se atunuu “O Le Aiga: O Se Folafolaga i le Lalolagi.”

I tausaga na mulimuli ane ua faaliliuina ai lenei pepa o faamatalaga faaperofeta i le tele o gagana ma ua tufatufaina atu i taitai o le lalolagi. O loo talosaga atu ai i tagatanuu ma taitai o malo “ina ia faalauiloa atu na fua faatatau ua fuafuaina ina ia faatumauina ma faamalosia le aiga o se iunite faavae o malo.”²

O le folafolaga ua avea ma faavae o talitonuga o le Au Paia o Aso e Gata Ai e uiga i le aiga, o se faamatalaga e mafai ona tatou taofi mau i ai ma iloa o le ola ai i ona aoaoga, ua tatou faamalosia ai o tatou aiga ma auaiga.

Taumatau: ata na tusia e Christina Smith