Tuuina Atu i Tamaiti se Avanoa e Auauna Atu Ai

Saunia e Jenny Baker

Soo se tasi lava o loo auauna atu i le Peraimeri e mafai ona ta’u atua ia te oe, e masani ona faigata i tamaiti le o mai i le Peraimeri e sauni e saofafai filemu ma aoao. E tusa lava po o le a le tomai o se taitai po o le a foi le alofa o faiaoga i a latou vasega, e tele lava ina ulavavale ia tamaiti.

Ua uma ona ta’u mai i le Au Paia o Aso e Gata Ai o tagata fou uma o le Ekalesia e manaomia se tiutetauave.¹ O le i ai o se tiutetauave latou te lagonaina ai le avea ma se vaega o le Ekalesia ma tuuina atu ai ia i latou le avanoa e aoao ai ma tuputupu ae. E mafai e tamaiti ona olioli i nei lava foi faamanuiaga pe a tuu atu ia i latou se avanoa e auauna atu ai.

E le tuuina atu i tamaiti ni valaauga, ae e mafai e taitai o le Peraimeri ona saili ma le agaga tatalo ni avanoa faaleauaunaga e oo lava i se tamaitiiti pito i laitiiti. O nisi nei o nai faataitaiga:

Tuu atu i se tamaitiiti matua e fesoasoani i se tamaitiiti laitiiti i le taimi o le fetufaaiga.
Valaaulia se tamaitiiti na vave taunuu mai e tu i le faitotoa ma faafeiloai i isi pe a o mai i le Peraimeri.
Tofi se tamaitiiti matua e nafa ma le vaaiga o le mea faaleotele leo po o ola.
Fai atu i ni nai tamaiti matutua e aumai ia sioka, solo o le laupapa, valigao, po o nisi mea mai le potutusi.
Fai atu i se tamaitiiti e ta piano e tata se pese a o lei amataina pe tata se pese pe a mae’a.
Tofi ni uo se toalua e nonofo i autafa o se tagata asiasi po o se tagata fou o le ekalesia ma fesoasoani i le tagata ia lagona le taliaina o ia.
Valaaulia se tamaitiiti e fesoasoani e taitai musika.
Tofi ni tamaiti e fesoasoani e faatulaga pe teu ia nofoa.
Talosaga i se tamaitiiti ma lona aiga e asiasi atu i se tamaitiiti fou o la outou uarota po o le paranesi.
Fai i se tamaitiiti e uu se ata.
Talosaga i se tasi e faaaoga le sioka e tusi ai se ata faigofie e o faatasi ma lau lesona.
Fai i tagata na filifilia o le vasega e fatu ni taga o se pese fou o loo latou aoaoina.
Fesoasoani i se tamaitiiti e 11 tausaga e fuafua se aso o le gaoioiga a le Peraimeri. O le a fesoasoani lea i le tamaitiiti e faatumu ai se vaega manaomia o le Faatuatua i le Atua.

Po o le a lava le tele po o le laitiiti o o latou tiutetauave, ia manatua e faafetai atu i tamaiti mo a latou auaunaga.

Ou te fiafia e galulue ma tamaiti a o latou aoao e auauna atu. O se lagona faamalie loto le vaai atu i lo latou tuputupu ae ma faaaogaina tomai i polokalama a Alii Talavou ma Tamaitai Talavou lea na amata ona latou atiina ae i le Peraimeri.

O Le a Le Mea e Matuai Taua

Sa faamatalaina e Elder Kenneth Johnson o se Fitugafulu se taimi na ia valiina ai fafo o lona fale, ae talosaga atu lona atalii e lima tausaga le matua e fia fesoasoani: “[Ina ua uma ona ou tuuina atu ia te] ia so’u ofutino tuai na ufitia atoa ai o ia, na toetoe lava ina a papai i le fola o le fale, ma afe i luga lima, sa ma o atu loa e galulue i le faitotoa e ulu mai ai i totonu o lo matou fale. Sa ia valiina le pito i lalo o le faitotoa, a o ou valiina le pito i luga. Sa ou iloa, ona o lona matua, ma lona fuaitino, sa le mafai ai ona ia valiina lelei, ma sa papanu ai le vali i nisi itu. O taimi uma e punou ai e fufui lana pulumu i le apa vali, e vave lava ona ou tago atu faalaulelei le mea sa ia valiina, ma ou toe foi atu i le mea sa ou valia e aunoa ma lona iloa o le mea sa ou faia. Ina ua mavae sina taimi, sa ou faapea loa, o le mea e sili atu le taua nai lo se galuega vali e sili ona manaia, o le avanoa lea ma te galulue faatasi ai ma lo’u atalii. O le vaavaai atu i ai, sa ou iloa ai le lelei o le galuega sa ia faia. Mulimuli ane, soo se taimi lava ou te lata atu ai i le faitotoa, ma ou vaaia le tulaga ese o le teuteuga o i ai, e faamanatu mai ai ia te au le mea e matuai taua i o tatou olaga.”

Mai le “O Tatou Uma e I Ai Se Tama e Mafai Ona Tatou Faalagolago I Ai,” Liahona, Me 1994, 38, 39.

Taumatau: ata na tusia e Robert Casey