Олон нийтэд зориулсан үйл ажиллагаа
“Христэд жинхэнэ итгэгчид болох тэд Христийн нэрийг эсвээс Христийнх гэгдэхийг өөрсдийн дээр дуртайяа хүлээн авчээ” (Aлма 46:15).
Тойрог нь энэ жил Христийн Мэндэлсний Баярын нээлтийн ажиллагаа хийнэ гэж бишопыг зарлахад Алисон чих тавин сонирхож сонсчээ. “Нээлтийн ажиллагаа онцгой сайхан байхыг бид хүсч байна. Энэ бол найз нар, хөршүүдээ урих онцгой боломж байх болно” гэж бишоп хэллээ.
Алисон Христийн Мэндэлсний Баярт дуртай байлаа. Тэр гэрийнхэндээ болон найз нартаа бэлэг худалдаж авахаар дэлгүүрээр явах, Христийн Мэндэлсний Баярын магтуу дуу дуулах нь түүнд таалагддаг байв. Мөн Есүсийн төрөлтийн тухай түүх уншиж, Түүнийг нялх хүүхэд байхдаа ямар байсан бол гэж бодох дуртай байжээ.
Бишопын хэлсэн дараах үгс түүний анхаарлыг ихэд татжээ. “Олон нийтэд зориулсан үйл ажиллагаатай учраас бид энэ жил тойргийнхоо уламжлалт Христийн Мэндэлсний Баярын үдэшлэгийг хийхгүй.”
Алисон хөмсөг зангидав. “Үдэшлэг байхгүй гэнэ үү?” гэж тэр ээжээсээ шивнэн асуув. Тойргийн Христийн Мэндэлсний Баярын үдэшлэг бол түүний дуртай үйл ажиллагаануудын нэг байлаа.
Ээж нь хуруугаараа түүний уруул дээр дарав.
“Бидний зарим найз нар, хөршүүд биднийг Христэд итгэгчид гэдгийг ойлгодоггүй” гэж бишоп яриагаа үргэлжлүүлээд, “Бид Есүс Христэд итгэдгээ тэдэнд мэдүүлэхийг хүсч байна” гэв.
Алисон тэр тухай бодож үзлээ. Хамгийн дотны найз Эрика нь мормончууд бол Христэд итгэгчид биш гэж хэлснийг саналаа. Эрикагийн үг юу гэсэн утгатай болохыг тэр ойлгоогүй учир энэ тухай аав ээжээсээ асуусан аж.
“Олон хүмүүс Мормон эсвэл Хожмын Үеийн Гэгээнтнүүд гэдэг нэрэн дээр анхаарал төвлөрүүлдэг. Манай Сүм Есүс Христийн гэж нэрлэгддэгийг тэд мартдаг” гэж ээж тайлбарлав.
Алисон маргааш нь сургууль дээрээ итгэлийн нэгдүгээр тунхгийг Эрикад ярьж өгөв: “Бурхан Мөнхийн Эцэг, мөн Түүний Хүү Есүс Христ, мөн Ариун сүнсэнд бид итгэдэг.”
Гэвч Эрика мөрөө хавчаад, “Тэгвэл хүмүүс яагаад та нарыг Христэд итгэгчид гэхийн оронд мормончууд гэдэг юм бэ?” гэж асуув.
Алисон анхаарлаа дахиад бишопт хандуулав.
“Олон нийтийн үйл ажиллагаа Есүс Христ дээр анхаарал төвлөрүүлнэ” гэж тэр хэллээ. Бид Христийн төрөлтийг харуулсан жижигхэн жүжиг тоглож үзүүлэх учраас Христийн төрөлтийг харуулсан жижигхэн баримал дүрсүүд авчрахыг гэр бүлүүдээс хүсч байна.”
Олон нийтэд зориулсан үйл ажиллагаа дөхөх тусам Алисоны сэтгэл хөдөлж эхлэв. Аав ээж хоёр нь настай хөршөө олон нийтэд зориулсан үйл ажиллагаанд очихыг урив. Алисон Эрикаг урилаа.
Үйл ажиллагаа болох орой Алисон ээждээ Христийн төрөлтийг дүрсэлсэн баримлуудыг сонинд бооход туслав. Тэгээд аав, ээж хоёр нь Эрикаг очиж авахаар түүнийг машинаараа авч явав.
Тэд сүм дээр ирж, Алисон, Эрика хоёр Япон, Австри, Филиппин болон бусад олон орноос ирсэн Христийн төрөлтийг дүрсэлсэн баримлуудыг үзлээ.
Охид дараа нь залуу эрэгтэйчүүд, эмэгтэйчүүд Христийн төрөлтийн тухай жүжиг тоглож байгааг харахаар гадагшаа гарлаа. Үхэр, хонь, тэр байтугай эм ямаа байлаа. “Тэмээнээс бусад нь бүгд байх шив дээ” гэж Алисон хэлэв.
Бүх хүмүүсийг ариун ёслолын танхимд орохыг бишоп хүслээ. Алисон, Эрика хоёр Хүүхдийн Хэсгийн хүүхдүүдтэй хамт суув. Хүүхдүүд “Picture a Christmas (Христийн Мэндэлсний Баярыг дүрсэл)”1, “Есүсийн төрөлтийн дууг дуулж,”2 тойргийн найрал дуу Meссиагийн жүжгийн дүрүүдийг тоглож үзүүлэв.
“Үнэхээр мундаг тоглож байна шүү. Аав ээж хоёр ирсэн ч болоосой” гэж Эрика гэртээ харих замдаа ярилаа.
Алисон инээмсэглэн, “Ирэх жил очиж болно ш дээ” гэв. Олон нийтэд зориулсан үйл ажиллагааны тухай тэр бодоод Христийн Мэндэлсний Баярын үдэшлэгийг ганц ч удаа таслаагүйгээ мэдэв.
Зураг чимэглэлийг Грег Ньюболд