Kakaean Kaeka inanon ana Boki Moomon
Maiura iaon te aonaaba e kona ni kakaewenako, ma Tamara ae tangiraki are i Karawa e aki kanakoira n nakomai bwa ti na kaitaraa buakan te maiu n tii ngaira. Teuana mai ibuakon ana ibuobuoki ae te kabanea ni korakora are E anganiira bon ana Boki Moomon. E aki tii anganiira te reirei iaon bwaninin te euangkerio ma e kairiira naba inanon kangaanga ake ti aitara ma ngaai. Ngkai ti ukeuke n ana boki Moomon, te Tamnei e na buokiira ni kunei kaeka nakon ara kangaanga ao ara titiraki.
Unimwaane M. Russell Ballard man te Kooram n Abotoro n te Tengaun ma Uoman
“Ana Boki Moomon, iaon boki ni kabane ake tabeua ake I ataia, bon te kabanea n tamaroa ni bwai ni ibuobuoki are iai iroura ibukin kaekaan kangaanga ake a bon riki. …
“Iraua te tai te rau n tia n roko inanon maiuia te koraki ake a inimaki ma kangaanga aika koaua ngke a wareka ana Boki Moomon! Taian kabootau ibukin ana kairiiri te tamnei ake a riki man te boki a bon aki kona ni warekaki.”1
N te rongorongo ae imwiina, membwa a tibwaua aron kaeka ake a kakaai n ana Boki Moomon.
Namakinan te Bitaki n te Nano
E ngae ngke e reireinaki te euangkerio man ngke e uarereke, Greg Larsen (te ara e a tia ni bitaki) mai California, USA, e a manga bwaka imwiina. E irekereke ma te turaki ao mwakuri ake a tabu iaan te tua ao n te tai ae e aki maan e a karinaki n te karabuuti. E tangiria ni bita maiuna ma e aki koaua bwa ni kangaa.
“Aomata man te uoote are e tei iai te karabuuti a anga te Reirei n Taabati,” e koroboki Greg. “Temanna mai ibuakoia e tuangai bwa maiu e na rikirake n tamaroa ngkana I wareka ana Boki Moomon. Ao anne are I bon karaoia.
“Ngke I a otinako man te karabuuti, I oki rikaaki nakon te ekaretia, ma bon iai irou te nano ni kan okira arou are mai mwaaina. Ngkai I a reitanako warekan ana Boki Moomon, I a reireinai taekaia ana aomata te Uea ae Ramonaai n Aramwa 19:33, ake ‘nanoia a tia ni bitaki; bwa a akea riki tangiran karaoan te buakaka.’ I a moanna n tataro ibukin te bitaki n nano aio.”
Greg e kunea kaekaan ana tataro n Ereman 15:7, are e anga reirei bwa “te onimaki ao te rairannano e uota te bitaki n nano.”
“Ngkai I wareki taeka aikanne, rannimata a baro rikaaki mai matau. Te Tamnei e kakoaua bwa Tamau are i Karawa e tangirai ao e na buokai. I namakinna bwa ngkana iai au onimaki ae tau n na taetae nakon au bitiobi, e na bon rangi n tau. Ngkai I a kawenei au bure iwaen te Tia Kamaiu, I karekea te bitaki n nano ni koaua.”
Kakaean Kawain Neierei
Laura Swenson mai Idaho, USA, e roko ni mweengana n te taina ma te bwarannano ao te tang. E tuai n iein, ao ana babaire ibukin ana reirei ao te mwakuri are e a tia ni miia e a uruaki. “I a mimii ngkana n na wakirake nakon au kouru n te maiu aei,” e koroia.
“I bon tuangaki bwa N na okira ana Boki Moomon. N ana moan kibu aika aua n 1 Nibwaai 18, I kunea te kaeka nakon au raraoma. Kiibu aikai a kabwarabwaraa te kaibuke are e kabaia Nibwaai ni uotiia ana utu nakon te aba ni berita. E bon ‘kamimii aron karaoana’ ao e aki kabaaki n ai aron aia mwakuri aomata’; ma, e kabaaki n aron are e a tia ni kaotia te Uea’ (kiibu 1–2). Nibwaai e aki toki n reitaki ma te Uea n tain kabaakin te kaibuke. Ngke e a tia te kaibuke, ‘e bon tamaroa, ao … ao moan te tamaroa aron karaoana’ (kibu 4).
“I ataia bwa mwanangau e bon ‘kamimii karaoana.’ E aki bootau ma aia banna aomata ma e na karokoai n te tabo are I tangiria n nako iai ngkana I kakaea ana kairiiri te Uea. Kiibu aikai bon taian biikan n te oota inanon te tai ae rotongitong. Au kangaanga a aki waekoa n toki, ma I kunea te taratara are I kainanoia. I a mena ngkai inanon te mwakuri are e a reke kaniwangana ibukin are I aki kaman baireia.”
Kuneakin te Kakoaua Teuana
Ngke te kairake n ataeinimwaane, Adrián Paz Zambrano mai Honduras e miimi bwa ibukin tera te Baibara e mwanewea tii te aono ni katobibiia Ierutarem ao ni miiakinna ngkana Iesu e kawarii aba ake tabeua.
“Ririki ake imwiina uoman mitinare man ana Ekaretia Iesu Kristo Ibukiia Aika Itiaki ni Boong Aika Kaitira a roko n au auti,” e koroia Adrián. “A kaotia nakoiu ana Boki Moomon ao a kaoai bwa nna wareka 3 Nibwaai, are e kaota rokon Iesu i America.
“Ngke I warekia, I uringii titiraki ake iai irou ngke te kairake ngai. I a tia ni kunei kaeka. n ana Boki Moomon, I reireinaki bwa Iesu Kristo e kawari aban America imwiin Mangautina. I kaonakin te kukurei ibukina bwa I ataia bwa te Atua e tangiriia ni kabane Natina n aki tabeakina te tabo ke arona.”
Adrián ao buuna te aine a bootaki n tataro ni kan ataia bwa e koaua te Ekaretia, ao ngaiia ni kauoman a karekei aia kakaoaua. A bwabetitoaki ao a kamatoaki, ao teuana te ririki imwiina aia utu a bon kabaeaki n te Tembora.
Katauraoan Bwaai ibukin Ana Utu Teuaei
Ngke 30 ana ririki, Eric James mai New Mexico, USA, e kuneaki bwa iai aorakin ana kirine. Ngkai te kairake ni karo, e bon rangi n rootaki ao ni miiakinna ngkana e kona ni karekei bwaai ibukin ana utu.
E warekia n ana Boki Moomon bwa Nibwaai e miiakina te bwai ae titebo ngke e uruaka ana kai ni katebe ae karaoaki n te biti ae tamaroa. Ma imwiin karaoan ana kainikatebe man te kai, Nibwaai e a manga kona ni kamarakeia ana utu. (Taraa 1 Nibwaaai 16:18–23, 30–32.)
“Ana karaki Nibwaai e kaonrakea tamneiu n aron te oota ae raneanea,” e taku Eric. “Te marurung are I a tia ni kimwareirei iai ni karokoa te tai anne ai aron ana kainikatebe Nibwaai are te biti. Ngke e a bwaka marurungiu, ai aron au kainikatebe ngke e a uruaki. Ma I kinaa bwa te Uea e a tia ni kakabwaiaai ma te kainikatebe ae te kai rabwatana ae te korokoro ni kamwaingan te kirine. Te korokoro e na anganai te korakora n tararuaia au utu. Aio are e anganai te kantaninga. Ni kaania te 10 te ririki imwiina, I reitinako ni karekei bwaai ibukiia au utu ao ni beku ibukin te Uea n au kabanea n tamaroa are I kona.”
N reireiniia Ataei te Ongotaeka
Ngke a uarereke natina, Juan Jose Resanovich mai Argentina e rairaki nakon ana Boki Moomon ngke iai ana titiraki ibukin ae e na kangaa n reireiniia ao ni karikirakeia natina. “Kaainabau ao ngai ti kakaai iteranibaa ibukin te kairi ibukiia natira, ao ti aki toki ni kunei kaekaia,” e koroia.
Te Resanoviches a reireiniia natiia te ongotaeka man kairakiia nakon ana katotoo Nibwaai n 1 Nibwaai 3:5–6:
“A ngurengure tarim, ni kaangai e bon rangi ni kaangaanga te bwai are I a tia ni mwiokoiia iai; ma nooria I aki kainnanoa aei mairouia, ma bon ana tua te Uea.
“Mangaia ae ko na nako natiu, ao e na buokiko te Uea, ngkai ko tuai ni ngurengure.”
“Ti reireiniia natira bwa Nibwaai e karineia ana karo ake iaon te aonaaba ao ana bwai te Atua,” e koreia Juan. “Ti karaoa ara kouru bwa ngkai te utu ti na karekea anuan Nibwaai ni karinerine ao n ongotaeka.
“Ni kabane natira a nako ni mitinare. Ti aki kairii nanoia bwa a na mwakuri. A tia n riki bwa ataein te reirei aika tamaroa, rao aika tamaroa, ao naati aika tamaroa. Ara utu e bati ae a riai ni katamaroa, ma ana Boki Moomon bon te buoka ae rangi ni buubura aei ni karokoira n ara kouru.”
Ni Kamaiuko man Ana Kabaebae Tangiran te bwai ae ko rangi n tatangiria
Ngke I buakana tatangirakin te kan amwamwarake, Susan Lunt mai Utah, USA, e tataro ibukin te buoka. E rairaki nakon ana Boki Moomon ao ni warekia bwa Nibwaai e kamaiuaki man aia kabaebae tarina ake a kabaea iai baina ao waena:
“Te Uea, ni kaineti ma aron onimakinam irou, ko kona ni kamaiuai … ; eng, ao n anganai te korakora bwa I aonga ni kona ni motiki kabaebae aika I kabaeaki iai.
“Ao e koro bukina bwa … a kabwaraki kabaebae” (1 Nibwaai 7:17–18).
“Te taeka ae tabu aei e kabwarabwaraa raoi aron au namakin—kabaeaki ma kabaebae n te bwai are I tatangiria,” Susan e koroboki. “Nibwaai kabaeana ae matoatoa a waekoa ni kabwaraki ngke e bubuti ibukin kamaiuana. Kabaeakiu a aki matoatoa ao I aki kona au bwai ake I tatangirii n te tai ae uarereke, ma ngke I warekii taeka aikai, I namakina te bwai teuana ae e mwaing inanou. I namakina n ai aron ae kabaebae ake a katobibia nanou, iango, ao te rabwata e a tia ni kabwaraaki, ao I ataia bwa I a kona n tokanikai iaon te bwai are I tatangiria.”
Susan e a tia ni karaoa te waaki ae korakora ao, ibukin te kairi are e kunea n ana Boki Moomon, e a tia ni kona ni uruaka arona ake tabeua are e a tia ni kabaeaki iai, n ikotaki ma te unun, tiarobeke, ao te kamoamoa. “I ataia bwa ana Boki Moomon bon ana taeka te Atua,” e kabwarabwaraa, “ao bwa te kaeka nakon ana titiraki nakon te maiu aei e kona ni kuneaki inanon iteranibaan te boki anne.”
Kamataataki n te korobanna iroun Welden C. Andersen
Angatai: tamnei iroun Christina Smith