Iango Ibukin te Kai n Utu n te Tairiki
Te bwai ae taekinaki aio kanoana bwaai ao mwakuri ake ana kona ni kamanenaaki ibukin te botaki ni utu n te tairiki. Aikai taiani kakairi aika oti imwina.
“Kinakin ana Tararua te Atua inanon Kakabwaiakira ni Katoabong,” iteraniba 24: Iangoa warekan ana Tataro te Uea (taraa Mataio 6:9–13) ao n titirakiniia kaain am utu tera n aia iango “ko na anganira karara ae ti a tau iai n te bong aei.” Imwina kauarerekea te moan mwakoro n te rongorongo, ike Unimwaane Christofferson e maroroakina “karara ni katoabong.” Iangoa reitan am koaua bwa Iesu Kristo bon te Berena ni Kamaiu.
“George Albert Smith: E Maiu n aron ae E Taekinna,” iteraniba 32: Beretitenti George Albert Smith “kakoaua bwa ngkana iai ara koaua ibukin ana euangkerio Iesu Kristo, e na boni kaotia inanon maiura.” Rinanon te rongorongo ma am utu. Ko na bae ngkanne ni bubutia membwa n am utu tera are a reiakinna man ana katoto Beretitenti Smith n tabeakinaia aomata ma te akoi. Titiraki bwa a na kanga ni kaota riki te akoi.
“Tararake,” iteraniba 42: Iangoa tibwakin te atatai are e rinanona Unimwaane Cook ngke te mitinare ngaia ngke te kairake ao imwina kauarerekea nikiran mwakoron te rongorongo. Titirakinia membwa n am utu bwa a na kanga ni kabanea aia tai iaon te bwai are e iangoia Tamara are i Karawa ibukia nako ae a iangoia aomata ibukia. Ko kona ni kainiin man warekan 1 Tamuera 16:7.
“Kawakinan Berita aika a Tabu,” iteraniba 48: Ngkana temanna man am utu e katauraoia ni karaoa ana mwakuri ni mitinare, ko na bae ni kabwanina warekan te rongorongo are inanona ao ni katauraoa te rinan ni botoniango aika a kakawaki are e karaoi Unimwaane Holland. Katuruturua te kibuntaeka “Te king nakon te mwakuri bon kawakinan ara berita aika a tabu.” Rinanona bwa tera te berita ae tabu ao titirakiniia ataei bwa a na kanga ni katauraoi ngkai ni karaoi berita aika a tabu.
“E Mena Ikekei,” iteraniba 69: Iangoa anenean “Ana Tataro te Ataei” (Aia Anene Ataei, 12). Wareka taekan ana atatai Titita Wixom ma te tataro, ao kaungaia membwa n te utu n tibwaua oin aia atatai ma aia tataro ae onoti. Ko na bae n titiraki, “Ko kona ni iangoa te tai ngke e rauaki nanom n te tataro?” Kainna ma am koaua n te tataro.
Te Waaki ni Kakukurei ae Kaunga, te Rongorongo ae Akea Tokina
N te roro ae tebwitabun I kaea te kainutu n te tairiki n akea nanou. I taku bwa iai baika a tamaroa aika n na karaoi.
Tairikin te Moanibong, imwin tabeua FHE, tinau e kaitiaka taiboran te umwanikuka ao ni katokaa te bwaai ae te tieeri ae uarereke imatara n tatabemanira nako. I taratara nako ni kakaei taian waiteke—ma bon akea teuana! Tinau e kabwarabwara bwa iai ara kaboo n te kang bwaai, ma ti na aki kona ni kabonganai bwainamwarake ke baira. Are e moanna iai inaomatana ni kamoamoaaki.
Ti kabaitira n amwarake n aron are ti kona. N te tai ae waekoa ti a karekei bwaai aika tieeri n rabuna aon te taibora, ni burunako iaon ubura, ao iaon naba iranatura. I aki uringnga bwa antai ae e moanna, ma I uringanga te ngarengare ae aki toki ao n unga n au utu. I aki noora bwaninna, ma ngkai I kakaitau bwa tamaroara karekean te tabo ae mano ao ni kakukurei ni wewete nakon te mwenga ao ni karekeia aomata ake a na tararuai.
I kakoaua bwa iai te anene ao te reirei n te tairiki anne, ao tinau e anaa te tai ae abwabwaki ni katauraoi ao ni kaitiaki. Ma I kakaitau ibukin te waaki ni kakukurei are e reiakina te rongoronngo ni kakaawakin te utu are I kainnanoia—ngkekei ao n aki toki.
Heather Mockler Teuscher, California, USA