Reireinaki mairoun ae Mwaatai

Iroun George C. Robinson

Ngkai ataein te reirei ngai ibukin te korokoro, e aki toki ni iai temanna ae mena irarikiu ae rangi ni konabwai. Ngkai ngai natin te Atua, I karekea te aekaki ni kakabwaia ae ti te arona.

Ngkai te tia korokoro ngai angin te tai I titiraki bwa a kanga n reke irou te konabwai. Tabeman a taku bwa temanna e na mena n te kiraati, mataku n te korokoro, ao imwina n tauraoi ni karaoa te korokoro. Iai te taeka ni manikangare inanon te kataneiai:Taraa te korokoro, karaoa teuana, reiakina teuana. Ma e ngae n anne, akea ae raroa man te koaua.

I karekea rabakau ao au konabwai iaon au beebwa ian aia kairiiri taokita aika mwaiti aika a tarena man taotaonaki n nano. I moanna moa man tararuan taian anganibai ao imwina ni kaniia rake. Imwin teuana te ririki ni mamataku ma te taratara raoi, I anganaki teuana katabeau ae uarereke, ni buoka te tia korokoro ao ana “moan tia ibuobuoki”—te tia ibuobuoki ibukin te korokoro.

Imwin teuana te ririki I a kariaiakaki n tei ni kaitara te taibora mairoun te tia korokoro ao ni mwakuri bwa te moan tia ibuobuoki n tain korokoro aika a uarereke. Imwin teuana ke uoua te ririki, I a kariaiakaki bwa te moan tia ibuobuoki inanon korokoro aika a kanganga. Imwina I a moanna ni karaoi korokoro aika uarereke, n aron barongan te korokoro n te biroto, inanon are e riki bwa au moa n tia ibuobuoki te tia korokoro ae bane arona aei.

Inanon au kabanea ni kataneiai—itiua te ririki imwin are I tia ni kabanea n te reirei n taokita—I kariaiakaki ni karaoi korokoro aika a kanganga ngke e riki te tia korokoro bwa au moan tia ibuobuoki. I kunea bwa tia reirei aika a korakora a kona ni kanakoraoa te korokoro rinanon aia ibuobuoki ibukina ngkai a kona ni kaotia nakoiu bwa terana ae riai ni katiaaki n ae matata ao ae bebete—kawai ake a tia n reiakinaki rinanon te kataneiaki ae ti te arona aei.

E aki bati ni bwanin au kakaitau n aia kairiri taan korokoro aika a kamimi man tarena aikai ake boni ngaia au moan tia ibuobuoki nikarokoa ae bane au kataneiai ao I a bon tei iaon waeu. Ma e ngae n anne, e ngae inanon 30 te ririki imwina, au tia reirei a bon kaoti n au iango ngke I a kabonganai taian konabwai ake a tia ni kakorakorai n reiakin, ni kaoti, ao ni kaeti.

Reiakinan reirein te euangkerio bon akea okorona. Ti reireinaki teutana imwin teutana rinanon te taneiai ae ko rinanona—iroun te Tia Reirei ae rangin taotaonaki n nano. Ti tataraia, ira Ana banna ni katoto, bubuti ibukin te kairiiri, ao Tamara are i Karawa e kakabwaiaira ma te kairiiri—angin te tai mairoun te Tamnei ae Raoiroi, aia taeka burabeti aika a maiu, booki aika a tabu, ao temwaangina ake a tangira ao ni beku. Ara kairiiri e tei bwa te kanikina n ara itera ngkai ti karekea te onimaki, katamaroa kawaira, butimwaea te kaetaki, kaekai titiraki, ao n anga te onimaki ngkai ti kaotia bwa ti kororaoi iai.

Tabeman ataein te reirei aika taan korokoro a rangin ingainga ni mwakuri ma te inaomata, ni karaoi bwaai n oin aia kawai. N ae ti te arona, n tabetai ti kataia ni mwakuri n akea te tia Kairiiri ae mwaatai. I a tia n reiakinaki, ma e ngae n anne, inanon ririki aika a mwaiti ngkai te tia korokoro ngai I aki toki n tangiria ao n nora kakaawakin te moan tia ibuobuoki are e atatai riki nakoiu—ai moarara riki ngkana taian maiu ao tamnei a rangi ni kainnanoa buokakia!

Rikirakera n te euangkerio e moanaki man te aonaba n tamnei, n reitinako ikai, ao n reitinako n akea te nanououa ni maan imwin tokin maiura n rabwata ae mamate. Ma inanon wakin nako taneiai ake ti rinanona, ara Tia Kamaiu e a tia n rimoara, kaoti konabwai aika a kainnanoaki nakon te tokanikai. Ao E kaoia ni kabane bwa a na onimakinna ao Mwataina.