Tararake
Te kakaewenako ibukira ni kabane bwa ti na aki taraa rarikira n taraia bwa a kanga tabeman n taraa aron maiura ma ti na tararake n taraia bwa e kanga ana taratara Tamara are i Karawa ibukira.
Ngke te kairake n ataeinimwaane ngai I weteaki bwa N na nako ni mitinare i Hamburg, Germany. N te Tabo ni Kataneiai n te Taetae—te tia mwakuri mai imwaina n te tienta ni kataneiai ni mitinare ni boong aikai—I korakai n reirei te taetae. Ngke e a bane te moan ao te kauoua ni wiiki, I kunea bwa tabeman man au mwakoro a rangin ni waekaoa ni kai bwaati nakoiu. Ngke a nakon riki reirei aika a rangin ni kanganga riki, au dies, ders, ao das es ai bon te kanganga.
I moanna n tabeaianga—ao ni bwarannano. N na kanga n riki bwa te mitinare ae nakoraoi ngkana I aki kona n reitaki ma aomata ake I weteaki bwa N na reireiniia?
I tataro ibukin buokau ao n ukoukora ana kakabwaia te nakoanibonga, are e katauraoa te nano ae matoatoa. Ma I teimatoa ni ukeuke ao ni kekeiaki mwaaka, ao n te bong teuana I a namakina riki te tabeaianga ao te raraoma. Ngke ngai ma toau ti uaia n nakonako rikaaki ni kawain te mwaneaba, I tei irarikin ana kabwate te tia kaitiaki. I tuanga toau bwa e na tataningaai teutana te tai. I karaurau n nakon te tabo ae uarereke arei ao ni katorobubua iaon te mwaobu. I moana au bubuti ma te onnon nakon Tamara are i Karawa ibukin buokau.
E kaeka te tataro anne te Uea. I namakina te iango aei n roko n au iango: “I tuai ni weteiko bwa ko na bwaati te taetae n Tiaman. I ti weteiko bwa ko na beku ma nanom, am iango, ao korakoram ni kabane.”
I waekoa n iango, “I kona ni karaoa anne. I kona ni beku ma nanou, au iango, ao korakorau ni kabane. Ngkana ngaia anne ae e a tia ni weteai iai te Uea, I kona ni karaoa anne.” I teirake ao n namakina te kabebeteaki ae korakora.
Man te tai anne ni karokoa ngkai, au kai ni baire e bitaki. I aki manga kabotaua aron au mwakuri ao nakoraoiu ma toau ke membwa n au mwakoro ake tabeman. Ma, I kabanea au iango n taraa ana namakin te Uea n te bwai ae I karaoia. I rarikin are N na taraa rarikiu ni kabotauai ma tabeman, I moanna n tatararake, n taetae, n ataa Ana iango n au kekeiaki.
I aki ataia bwa I a reiakina te taetae ni waekoa riki ke n nakoraoi riki man te tai anne ni karokoa ngkai, ma akea namakinan tabeaianga ake I a tia ni karekei. I a ata te bwai ae tangiria te Uea bwa N na karaoia, ao boni korakorau karaoana.
I moana au maroro ma Tamara are i Karawa n te moaningabong, n Tuanga bwa I aki ataia bwa tera ae na riki n te bong anne ma N na karaoa au kabanea ni kona. “Tera ae I kona n reiakinna, e kariaia bwa N na reiakinna,” I tataro, “n aki tabe bwa tera ae na riki, N na Anganna au kabanea ni kona n te bong aei.”
N te tairiki ao N na tataro riki n tuanga te bwai ae I a tia n reiakinna ao te bwai ae I a tia ni karaoia. I tibwauaia ma Tamau are i Karawa au kekeiaki ao au tokanikai. I a tia ni moanna n rairaki Nakoina—tiaki nakoia tabeman ke ni bon nakoiu—ni kamatoa au kekeiaki.
Te reirei anne are I a tia n reiakinna n te tabo ae uarereke n te maan ae raka iaon 35 te ririki n nako e a tia n tiku irou inanon maiu, rinanon tabeua wewete ao tibwanga. N te tai are I tuangaki bwa N na karaoa te bwai teuana ae taraa n riaon are I kona ni karaoia, I uringa te bwai are e a tia n riki anne ao n taku nakoiu, “Taninga. Antai ae weteiko? Antai ae ko beku ibukina? Antai ae ko kataia ni kakukureia?”
N te aonaaba ae ti maeka iai ngkai iai inanona aekan taraan arora—angiina maibuakoia bon mai tinannikura. N au iango ao te aeka n taratara anne e kona ni kanganga nakoia kairake n ikawai. Ko nakon te reirei ni karekea am bui, ma akea inanon anne te bwai ae ko a tia ni karekea man am kiraati ake tabeua ke n am utu ke inanon maium. N tabetai a motikaki taekara man aron taraakira ke man te kaa ae ti kabutia. Ti kona ni kabotoa arora bwa iraman raoraora aika a koroboki i aon ara webpage n ara tabonreitaki n te intanete. Ti raraoma bwa tera aia iango tabeman ibukin te aomata are ti kareketangira ma ngaia ke tera aia iango aomata ngkana ti mare imwain ae bane ara reirei. Ko kona n reke n te kanganga ngkana ko kataia ni kakukureia tabeman, ma tiaki kona ni kakoauai taratara mai itinaniku; e kona te aonaaba ni waekoa ni kakoaua ao ni kaitaraa.
I taku bwa te kakaewenako ibukira ni kabane—ma ngaia bon ti ibukiia riki kairake n ikawai—tai kataia n taraa rarikim n taraia bwa a kanga tabeman n taraa aron maiura ma tararake n taraia bwa e kanga ana taratara Tamara are i Karawa ibukira. E aki tarataraa tinanikun te aba ma e tarataraa te nano (taraa 1 Tamuera 16:7). Ao E atatai, riki nakoia tabeman, tera ngaira n tatabemaniira ae ti kainnanoia.
Ngaia ae ti na kanga n “tararake”? Aikai tabeua reirei aika a kona n ibuobuoki.
Kabongana te Mwaaka n Tamnei
Ti kona ni kabongana te mwaaka n tamnei aika ti kainnanoi ni karaoi babaire man moanakin kanoan te bong ma te tataro ao kamwatebwaiakan booki aika tabu ni katoabong. E kona ni karinaki inanon te tataro te bubuti bwa ti na kariaia ana babaire te Atua ibukira. E ngae ngke tiaki nora kanoan te babaire ni kabane, ti kona ni bubuti bwa ti na riki bwa mwakoron te babaire anne are e na roko n te bong anne. Ngkana ti butimwaia, ao ti na kona n nori uan ara rinerine n Iria. Ti na kona ni karaoa te mwakuri nakon iango ake ti karekei. Ao ti na kona ni karaoi bwaai aika kanganga ao ni karaoia, ibukin riaina aika eti, nakon are kainnanoaki.
Teimatoa n Irii Kaetieti Aika Ko Karekei
Ti kona n “tararake” man teimatoara n irii kaetieti aika ti karekei mairoun Tamara are i Karawa ae tangira rinanon oin ara kaotioti. N tabetai tabeman a na kabwarai nanora man karaoan te bwai ae ti karekea, ao e ngae ngke iai nanoia aika tamaroa, ti riai ni koaua nakon te bwai are ti a tia n namakinna.
Ngai ma kaain abau iai natira te aine ae beku bwa te mitinare ae bwanin ana tai i Spain. Te nati te aine anne e kabanea ana reirei ae rietata i New Zealand, ngke I beku bwa te beretitenti n te mition. Ngke e koro ana 21, e taku, “Dad, Mom, I taku bwa I kainanoia n nako ni karaoa au mwakuri ni mitinare.” Ngaia anne, ti rangin ni kukurei n te babaire ae eti aei, ma n ataakina ae na riki bwa kitanakiia raoraona ao ana utu n ana ririki ni kairake, I tuanga, “Ko a kaman tia ni karaoa am mwakuri nii mitinare.”
E ngare ao e taku, “Tiaki, Dad, ko a tia. Ngkai I tangiria n nako ni beku ibukin te Uea.”
“Ngaia,” I ngare. “Kanoa te mition anne. Ira te wirikiriki anne n nako ni mwakuri.”
N te bong aei ao I kaonaki ma te kukurei bwa e aki ti beku ibukin Tamana are i Karawa natira are i Spain ma e ira naba te iango are e namakinna. E aki kariaiai naba—te karo ae korakora nanona—kaira nanona ni karaoa te bwai ae tangiria i rarikin ae namakinna bwa e eti ibukin maiuna ao ana baire Tamara are i Karawa ibukina.
Tai Maaku ni Karaoia
E kakawaki n aron reiakinan ana babaire Tamara are i Karawa ibukin maiura, n tabetai ti taku bwa ti atai ni kabane bwaai, mai moana nakon tokina, are e a karika te maaku bwa ti na karaoia. Tai mwane n te bwai ni kamwane aei. Karaoi rinerine aika raraoi ni kabonganai oin am babaire aika tamaroa ao waaki rake ma maium. Ti na kakabwaiakaki ngkana ti karaoi rinerine. Tai maku ni karaoi rinerine bukina bwa ko maku ni karaoi bwaai aika kairua. Tai maku ni karaoi bwai aika bou. Man karaoakina, ao ko na karekea te kimwareirei inanon kawaim.
Tei n Am Tabo ni mwakuri
Ngke a maeka ara utu i New Zealand, n tabetai ao ti karawawataki man taian kakaewenako ake a a tia n rinanona taan kakaae, aika tibwa rairaki, mitinare, ao tabeman riki. N tainako ao ti na tataro ibukin rekeia—ao ni kantaningai rekeia n te tai ae waekoa!
Ngaira ni kabane ti kainnanoa te ibuobuoki. Ao n tabetai kaekaia a roko ni waekoa. Ma n tai tabetai a roko ni kawai aika ti aki kantaningai. Ke a roko imwin are ti kantaningaia iai. Ao n tabetai, e tara, n ae e na bon aki roko.
Ibukin kanganga aikai, karekea te anua n “tei n am tabo ni mwakuri” ni karokoa e kanakoi tabeua ibuobuoki te Uea, n aki tabe bwa maanra ae na roko iai. Ma te tei n am tabo ni mwakuri tiaki nanona bwa ko na tei n aki kakamwakuri. N aron are I a tia n taekinna, tai maku ni karaoia. Teimatoa ni kakaraoi bwai aika tamaroa. Teimatoa ni kawakin tuua. Teimatoa n tataro ao ni kamatebwai ao ni karaoa am kabanea n tamaroa ni karokoa ae ko karekei kaetieti riki tabeua. Tai kitana am tabo ni mwakuri. N Ana tai ao te Uea e na kariai bwai ni kabane bwa ana mwakuri ibukin raoiroim.
“Tararake” e a tia ni kakabwaia maiu n tainako man te tai are I rinanona iai n te Mition ni Kataneiai n te Taetae. N aron are e kabwarabwara Moomon n Ereman 3:27, “E nanoanga te Uea nakoia ni kabane ake, a na wetea arana ae tabu, ma nanoia ni koaua.” I a tia n namakina ao n rinanon Ana nanoanga ao Ana tangira. I ataia bwa e na roko Ana nanoanga nakoira ni kabane ngkana ti kakoaua ao ni wetea Arana.
Kamatata n te tamnei iroun Matthew Reier