Te Rongorongo ibukin Reirei n te Kakawari
Taratara n tararua ao te Reirei rinanon te Reirei ni Kakawari
Kamatebwaia te karaki aio ao, n ae e angaraoi, maroroakinna ma taian tiitita ake ko kawariia. Kabonganai titiraki ni buokiko ni kakorakoraia am tiitita ao ni karaoa te Bootaki n Aine bwa iteran maium ae kakammwakuri.
Onimaki, Utu, Buoka
“Te Tangira ae kororaoi [nanona] e raka riki nakon namakinan te akoi,” reirei Beretitenti Henry B. Eyring, Moan Kauntira n te Moan Beretitentii. “Te tangira ae itiaki e roko man te onimaki i nanon te Uea Iesu Kristo ae kanakoraoaki man Ana Mwakuri ni Kamaiu.”1 Ibukiia Aine n te Bootaki n Aine, reirei ni kakawari e kona n riki bwa te mwakuri n tangira ae itiaki, te kawai ae moan te kakawaki ni karaoan ara onimaki i nanon te Tia Kamaiu.
Rinanon te reirei ni kakawari, ti karaoa te taratara n tararua man reitakira ni katoaia aine, n tibwa rongorongon te euangkerio, ao ni kan ata kainnanon neienne ke ana utu. “Te reirei ni kakawari e na riki bwa ana mwakuri te Uea ngkana ti kabanea riki ara iango iaoia aomata nakon te betienti” e kabwarabwaraa Julie B. Beck, te beretitenti n te Bootaki n Aine ni Kabuta. “N arona ni koaua, te reirei ni kakawari e aki kona n toki. Ai aron riki kawain te maiu nakon te mwakuri. Ara kakaonimaki n riki bwa te tia reirei ni kakawari bon kakoauaan nakoarantiareirei.”2
Ngkai ti kateimatoaia ao n tataromwaaka n taratara n tararua, ti na karekea aron te tamaroa riki n reirei ao ni karekeia kainnannoia aine n tatabemaniia nako ao aia utu. Te reirei e kona n roko n aaro aika a mwaiti—tabeua a bubura ao tabeua aki rangi ni bubura. “N tabetai mwakuri aika a uarereke bon ngaia ae rangi ni kainainnanoaki n tabekarake ao ni kakabwaiaa temanna: te titiraki ni kaineti nakon ana utu te aomata, taeka ni kaunganano ae tawe, te taeka ni karaunano ae nako man te nano, te mwakoro n taeka ni karabwarabwa, te tareboon ae kimototo,” e reirei Beretitenti Thomas S. Monson. “Ngkana ti taratara man tatauraoi, ao ngkana ti waekoa ni karaoi nanon wirikiriki ake a roko iroura, ti kona ni katiai mwaitin mwakuri aika raraoi. … Mwakuri aika aki warekaki bon mwakuri n ibuobuoki aika a katauraoaki irouia kaain ana taanga ni buaka taan reirei ni kakawari n te Bootaki n Aine.”3
Man Koroboki aika tabu
Ioane 13:15, 34–35; 21:15; Motiaea 2:17; Doctrine ao Covenants 81:5; Mote 1:39
Man Ara Rongorongo ni Kawai
N 1843, membwa n te Ekaretia i Nauvoo, Illinois, a tibwatibwaaki i nanon aua uoote. N Turai n te ririki anne, taan kairiiri n te Botaki n Aine a rineia kaain te komete ni kakawari aman aine man uoote nako. Taben te komete ni kakawari bon karekean kainnano ao rikoan anganano. Te Botaki n Aine e kabonganai anganano aikai ni karekei bwaai nakoia kainnano.4
Ngkai taan reirei ni kakawari aikoa manga rikoi anganano, a bon kawakina nakoaia are karekean kainnano—maiu n tamnei ao te maiu n rabwata—ao ni mwakuriia karekean kainnano akanne. Eliza R. Snow (1804–87), te kauoman ni beretitenti ni kabuta n te Bootaki n Aine, e kabwarabwaraa, “Te tia reirei … e riai ni karekea Tamnein te Uea ae korakora, ngke e rin inanon te auti n ataia bwa te tamnei raa are e kaitibo ma ngaia ikekei. … Bubutia te Atua ao te Tamnei ae Raoiroi ni karekea [te Tamnei] bwa ko aonga ni kona ni kaitibo ma te tamnei are e mena inanon te auti anne … ao ko na namakinna n taekin taeka n rau ao n akoi, ao ngkana ko namakinna bwa e mariri te aine, anaia mwanokaia i nanoam n aron are te ataei i nanoam ao ni kaabuea.”5
Kamatataki n te Korobanna iroun Matthew Reier