Manga kuneakin Kamimiin te Aonaaba … ao Totokoan Kabuanibwai n te Maiu n Tamnei ae Bwarannano
Ciro Villavicencio e katautaua bwa inanon ana moan ririki ake teniua bwa te tia kairiia taan neweaba n te tabo ae Cusco i Peru, e kaira te kaneweaba ae kaania 400 nakon Machu Picchu, te “kawaa ae bua” ae kakannato n te Incas. Ni karokoa ngkai, e ngae imwiin kawarakina irouna ae bati, te tabo aio—e karinaki iaon aran kamimiin te aonaaba—e tuai ni bua kamimiina nakoina.
“N tainako ao e na iai te bwai teuana ae boou ae nna reiakinna,” e taku. N ni kabanean te aoa ae bati ni kairakin te kurubu n taan neweaba rinanon Machu Picchu bon te bwai ae e aki tataneiai iai Ciro. E ngae n anne, e a tia n noora bebeten kabuaan te kamimii anne. Tabeman mai ibuakoia raona ni mwakuri a karaoa aia kaneweaba ae bwanin inanon 45 te miniti. “A bwara nanoia,” e taku.
Ciro, te membwa n te Chasqui Uoote ao te kauntira ae rietata n te Cusco Peru Inti Raymi Titeiki, e kakoaua bwa ataakia raona ni mwakuri n aroia n akea ungan nanoia e kona ni buokiia kaain ana Ekaretia ni karikirakea nanoia ni kamimiin te aonaaba teuana—ae te kabanea ni kakaawaki—te mwakuri ae rangi n tamaroa ao ni kamimii man ana euangkerio Iesu Kristo ae e a tia ni kaokaki (2 Nibwaai 25:17).
Kaanganga man Kabuaan Kamimiina
E kitanaki te tabo aio inanon banen 1500s irouia Incas ao n aki kuneaki irouia taan buaka mai Spain, te kaawa ae e raroanako ae e tei n te tabo ae rietata n te Peruvian Andes e bon bua nakoia ni kabane ma tii tabeman ae a ataia. Ni banen te ka20 n tienture, kuneakina man te aonaaba are itinaniku e a karokoia taan kakaae ao taan neweaba.
Imwiin bwi n ririki ni kamatebwai, “tabeman aomata a taku bwa a tia ni kunei bwaai ni kabane ake a riai ni kuneaki i Machu Picchu,” e taku Ciro. “Ngke a taku aomata bwa bwaai ni kabane a tia ni kuneaki ke a tia bwaai ni kabane, a taenikai ke a kauarerekea bonganan te bwai ke te mwakuri.”
Ciro e raraoma bwa te kukurei n nano anne e kona n reke n te Ekaretia. E a tia n noora ae e kangaa aron te tai ao te taneiai ni kona ni kairiia tabeman membwa “n riki ni kekerikaakin mimiia n te kanikinaa ke te kamimii mai karawa, ni karokoa a riki ni matoatoa nanoia, ao ni mataki n aia iango, ao [ni moanna] n aki onimakini bwaai ni kabane ake a [tia] n ongo ao n noori” (3 Nibwaai 2:1).
Buan te kamimii aio e kona ni katukiia membwa bwa a na kai rootaki n ana kewe Tatan, n aron: Ko aki kainnanoa te kakauongo nakon te tia taetae anne; ko a kaman ataia ni kabane. Ko aki kainnanoa te nako n te Reirei n Taabati; ko a tia n ongo te reirei anne ngkoa. Ko aki kainnanoa kamatebwaian booki aika tabu n te bong aei; akea te bwai ae boou ikekei.
“Ao ai aron [ana mwakuri] Tatan n taua taekan nanoia aomata” (3 Nibwaai 2:2).
Namakinan te kukurei n taberan maunga ao mwanono ibukin reirein te euangkerio bon te bwai ae e aki tataneiai te aba. Ma te koraki ake a kariaia te kerikaaki n te reirei n tamnei bwa a na karekei bwa maiuia a na reke n te kangaanga ni kabuai “ake iai irouia” inanon te atatai n te maiu n tamnei (2 Nibwaai 28:30; taraa naba Mataio 25:14–30).
Manga kaokakin te Mimii
Ataakin teniua koaua e a tia ni buoka Ciro n tiku ni kona n reireinaki e ngae ngke e kaota te bwarannano:
1. E rawata riki are I kainnanoia ni kan ataia.
Inanon ana tai ni kamatebwaia te euangkerio ae korakora n ana tai ni mitinare ao n tia reirei n te intitute, Ciro e a tia ni kunea bwa n taainako ao iai bwaai riki tabeua aika ko riai n reireiniko iai, tao te koaua ae e boou ke kamanenaakina ae boou n te bwai teuana are e a kaman ataia. Ma ae kakaawaki riki, te rabakau n tamnei ae boou anne n taainako bon te bwai ae e kainnanoia n ataia ni kairia rinanon te kakaewenako are e kaaitaraa—ke are e na kaitaraa.
“Mwakorona are te kan reireinaki,” e taku, “bon uringan are iai n taainako te bwai teuana ae I aki ataia are I bon riai ni kainnanoia ni kan ataia.”
2. I kainnanoa ana ibuobuki te Tamnei are Raoiroi n reireinai terana are I kainnanoia.
Ngkana ko aki ata are ko kainnanoia ni kan ataia, ko kainnanoa te tia reirei ae wanawana (taraa Ioane 14:26). Ngkai Ciro e kamatebwai booki aika tabu n tii ngaia ke ma kaainabana ke ngkai e irii kiraati ao bootaki, e aki toki ni kauringaki bwa e aki kakaawaki bwa mwaitira are e a tia ni wareka te kibu teuana ke e ongo te koaua teuana.
“Te Tamnei e kona n reireinai bwaai ake I bon tuai n iangoi,” e taku. “Te Tamnei ae Raoiroi bon te tia reirei.”
3. I riai ni karekea te kekeiaki n reirei.
Te reirei e bon tangira te kakammwakuri ao tiaki te aki kakammwakuri.1 E kainnanoa tangirakina, n anga nanom, irakina, ao kammwakuran te koaua are ko reiakinna (taraa Aramwa 32:27).
“N na riai n taua te mwioko ibukin te reirei,” e taku Ciro. “Tamara are i Karawa e na aki imanonoai n reiakina te bwai teuana.”
Te Kamimii e Kaniwanganaki
Iroun Ciro, Machu Picchu e tiku bwa te kamimii n te aonaaba, bwa manraa taani kamatebwaia, a tia ni kaniwanganaki ma kukune aika boou ao rabakau aika raka.
Imwiin tebubua te ririki ni kamatebwai, taani kenikeni a tia ni ni kuneia n tii tabeua ririki n nako te tabo n taunimate, tieramiki, ao taian kaintamarake riki tabeua, ni kabane are a tia ni ikotaki riki nakon are e a kaman ataaki n te Machu Picchu ao te Incas.
Ai aron aio ma kamatebwaian ana euangkerio Iesu Kristo. “E na bon iai te bwai teuana ae boou ae e na kuneaki n te euangkerio ibukiia naake a kona ni kekeiaki,” e taku Ciro.
N ai aron ara kukune aika boou i Machu Picchu e a karikirakeaki iaon rabakau ake mai imwaaina, n anganiia taan kakaae te atatai ae moanna n tabwanin, “te aomata are e aki kamatoa nanona, e bon anganaki mwakoron te taeka are e bubura riki, ni karokoa ae a anganaki bwa e na atai ana mwakuri aika kamimii te Atua ni karokoa ae a bwanin ana atatai” (Aramwa 12:10; taraa naba D&C 50:24).
“Te euangkerio bon oin te ran ni kamaiu are akea tokina are ti kainnanoia n okiokiria n taainako,” e taku Ciro.
Tamaroan Kamimiin te Mwakuri
Ngkai Ciro e mamataku man te bwaa ae rebenako mai ieta iaon Machu Picchu, tatin man kurubu n neweaba aika kakaokoro a nakonako ibuakon kateitei ni kawai. Iroun Ciro te kabuanibwai n aia aki nanona aia mwakuri ibuakoia raona ni kaneweaba e na bon aki tii kammarakii ma te koraki ake a na kona n namakina te kamimii rinanoia.
Kawakinan kamimii ni maiuakinan te euangkerio e na kakabwaiaia tiaki tii temanna ma temanna ma te koraki ake a reitaki ma teuanne ke neienne. “Te bitaki are e karaoia te euangkerio inanon maiuia aomata bon te kamimii,” e taku Ciro. “Ao te koraki ake a tia n namakina te bitaki anne a kona n riki bwa te kamimii inanon maiuia tabeman.”
Korotamnei iroun Adam C. Olson, n tii akana a kaotaki
Tamneia maan © Getty Images; tamnein booki aika tabu iroun Cody Bell