Tera ana waaki te Ekaretia i aon te wenenibure i marenan te mwaane ao te mwaane ke te aine ao te aine? E raoiroi bwa ti na iraorao ma aomata aika iai irouia te namakin n mwaine?
E totokoa te katei ni mwaine te Ekaretia, ao ti kataia ni karokoira irouia ma te atatai ao te karinerine nakoia aomata aika iai irouia te namakin ni kaitataan ni mwaine ae titebo.
Ngkana iai aomata aika ko ataia ae iai irouia te namakin ni kaitataan ni mwaine ae titebo, irii koaua ae titebo ma are ko karaoia nakoia raoraom ake tabeman: “Rineia raoraom ma te iangoraoi. A na rangi ni korakora aia mwakuri n rota am iango ao mwakuri, ao riki ni buokia n iangoa te aomata are ko kan riki n aekana. Rineia raoraom aika ko kona n tibwauaia ma ngaia bwaai aika a na kona ni karikirakei ao ni kakorakorai ngkami ni maiuakin katei aika rietaata. Te rao ni koaua e kona ni kaungako bwa ko na riki bwa te kabanea n raoiroi. … Taraia aomata ni kabane ma te tangira ao te karinerine” (Ibukin Kakorakorakia Kairake [boki ae uarereke, 2001], 12).
E reireiniira te Ekaretia bwa iai bukin te botaki irouia aomata n ana baire Tamara are i Karawa. N te aro bwa ti aonga ni kukurei ao ni kakoroa nanon te kantaninga anne, ti tuangaki bwa ti na maiuakina tuan te itiaki. Te wenenibure imarenan te mwaane ao te mwaane ke te aine ao te aine e aki boraoi ma te kantaninga anne ao e urua ana tua te Atua.
Ma, ngkana iai ae anaaki nanona nakoia aomata aika titebo aia mwaine ao n aki karaoi namakin aikanne, e a tia teuanne ke neienne n aki bure. Ana kainibaire te Ekaretia ibukin te maiu ae tamaroa bon titebo nakoia aomata ni kabane, n aki tabe bwa tera te mwaine ae bwaka nanona iai. E kona te Uea ke Ana Ekaretia ni kamaunai katei aika e na urui Ana tua. Teuana riki, ti kabuakaka katei aika aki riai, tiaki te aomata.