Taan Reirei ni Kakawari a Kairai nakon Iesu Kristo

Iroun Jayne P. Bowers

“[Te Uea] e taku nakon [Betero] te kateniua n tai, Ko tangirai? Ao [Betero] e taku nakoina, te Uea , ko atai bwaai ni kabane; Ko ataia bwa I tangiriko. E taku Iesu nakoina, Kakaamwarakeia au tibu” (Ioane 21:17).

Inanon kaniian bwanen 1970, e tuangai raoraou bwa N na iria nakon te Bootaki n Aine. “Tera te bwai anne?” I titiraki. E kaeka raoraou man taku, “Nakomai ao noria.” Ia! E katikaki nanou n te moan tai.

Imwiina banen te tiamwa Leann e roko n au auti man taku bwa ngaia au tia reirei ni kakawari. Aio e bon taraa ni kamimi ao e tamaroa naba, riki ngkai bon tiaki ngai kaain te Ekaretia. Ikai e anaa ana tai man ana tai ni mwakuri bwa e na tibwa nakoiu kanan tamneiu n nooria ngkana e kona ni buokai. I ataia man ana reirei bwa e bon kananonaa. I bon aki kona ni mwaninga Leann ao te rongorongo are e tibwaia nakoiu.

Uoua te ririki imwiina, ao Frances e mwaing nakon ara uoote. Ni koauana, bon tiaki raoi “ara” uoote ngkai I bon tuai ni membwa, ma I iangoia n aron anne. N te tai aei ao iai uoman au ataeinaine aika uarereke, ao I noora bootakin te Ekaretia bwa a kakabwaiai maiuia. E roko n tain te karau ke n te riringa, Frances, au tia reirei ni kakawari ae boou, e kawarai ma ana reirei, ni ngare, ni karaki, ke n ibuobuoki. I uringnga ngke e roko Frances n te bwakantaai teuana ni miimi. Ngke e noorai bwa I aki kona n tekateka ni marooro, Frances e kabobooa au kuuka ae boou iaon te titoobu ngke I karaoa kainnanon natiu te aine.

A nako ririki ao I a mwaing. I rangi n rawa ni kiitaniia raoraou n te Ekaretia, I manga waekoa ni kuneia kurubu n aine aika matoatoa aia onimaki ao nanoia n akoi n te Botaki n Aine n au uoote ae boou. Te tia reirei n te Botaki n Aine e anganiira te rinan ni bwai ni katamaroa ao ni kaungaira bwa ti na korea . “Bwaina te akoi” mai ieta n ara rinan ni katoabong. Aine ake a tekateka irarikiu ao ngai ti taku bwa bon te iango ae moan te tamaroa, riki ngkai e boutoka ana mooto te Botaki n Aine “Te Tangira e aki kona ni bwaka” (Moronaai 7:46).

Imwiina I wareka rongorongon te aine ae te bwaeoniia. Ngke e uarereke te aine anne, te burabeti e tuangiia ana utu bwa a na ibuobuoki nakon aia baronga Aomata aika Itiaki n taabo ake a tionako. E bwakaria te kangaanga ngke e a kabuanibwai natiia temanna. Tinana e bwakaria te nanokawaki, ao te rawawata ae korakora e rootia ana utu.

N te bong teuana te ataeinnaine aei e taratara nako n te winto. N te raroa are e kona n nooria, te burangketi n tinoo e rabuna mweengaia. Ngke e taraa te oraitan te ataeinnaine aei, e nooriia uoman aomata aika a korakai n rianna ni kaineta te auti. A karaurau, ni karekea kawaia, ao n tokina e a kinaia te ataeinnaine bwa antai ngaiia—bon ana tia reirei ni kakawari tinana.

Te karaki anne e riinga nanou. I bwabetitoaki ni Meei 1983. I kamoamoa n riki ngai bwa te tia reirei ni kakawari. I tatangiria ni kaitibo ma aine aika a mwaiti ake a kaota “te aine ae riai”ae “bati riki boona nakoni moomi” (Taeka n Rabakau 31:10). E rangi n tamaroa te memena irarikiia aine ake a kataia naba ni kakaraoi mwakuri n akoi, n itangitangiri, ao ni kairiia tabeman nakon Iesu.