Man te Tabo ni Mwakuri n te Aro
Te Atua E Kaekai Tataro ni Kabane
Ngke I karaoa au mwakuri ni mitinare i Durango, Mexico, ara beretitenti n te mition e anga te kakaewenako nakon ara mition ni kata “teuana te wiiki n anga karea.” E bubutira bwa ti na anga ara kabanea ni kekeiaki n aron are ti taneiai iai mai imwaina ni mwakuri korakora ao ni katei ara kouru aika onoti inanon te wiiki. Ngai ma toau iai ara onimaki bwa ngkana ti angakarea n te kawai aio, te Uea e na kakabwaiaira ao ti na kuneia aomata aika a mwaiti aika a na reireinaki.
Ma e ngae n anne, inanon te wiiki n angakarea, e aki rangin tamaroa ara kekeiaki. Akea utu aika a ti kuneia aika a na reireinaki, ao ti a bon nanokawaki.
N te moaningabong teuana imwin te wiiki anne, ngai ma toau ti taraa mwaben ara aono are ti mwakuri iai. Ara aono e bon rangin bubura, ma ti namakina ae ti kainnanoia bwa ti na nako nakon te itera are te kabanea n raroa.
Imwin rokora ikekei, ti tataro ni butia Tamara are i Karawa bwa te kawai raa ao te auti raa ae ti na nako iai. Ngke ti a tia, ti rairaki n tarai taian kawai ni kabane. Ti a nora te oo ae uakaan ao ni kaninganinga mai ieta. Ti nora te aine ae tekateka ma matana aika makii, ma te burum inanon baina.
E taku toau, “Mauri!” ao ngke e onga bwanaara te aine, e teirake ao ni wakina ana taebubu n aron ae kanga akea te bwai ae riki. Imwina ti a tuangnga ae mitinare ngaira man ana Ekaretia Iesu Kristo ao iai ara rongorongo ibukina. E a karinira inanon mwengana, ao tia karaoa ara maroro ae rangin kororaoi are e raonira iai te tamnei. Ti tuangnga rongorongon Iotebwa Timiti ao e kanga n nako n te buakonikai n tataro ni kakaea te koaua, ao ni kaekan ana tataro, e a kawaraki iroun te Atua te Tama ao Iesu Kristo.
E urua ara maroro ao n taku, “E koaua anne. I ataia bwa te Atua e kaekai ara tataro. Ngke kam taetae nakoiu, I tataro ni butia te Uea bwa e na kanakomaia temanna are e na kona ni kairai nakon kawaina, ao kam roko n te tai ae waekoa.”
Ti namakina te tamnei, ao ti kakoaua bwa te Atua e a tia ni kanakomaira nakon neiei ao ngaira naba ti a tia n tataro n ae eti n ataia bwa antai mai ibuakoia Natina ae a kainnanoa ara ibuobuoki. Imwina e bwabetitoaki Titita Rufina. Inanon wiiki ake imwina, natina, tibuna, ao n aroia naba tabeman mai ibuakoia kain rarikina a bwabetitoaki—botaia ae 20 aika rairaki ni mwakoron ara aono. Te Uea e kairira nakon Titita Rufina, ao boni ngaia te mataroa ni tibwauan te euangkerio ma ana utu ao kain rarikina.
I ataia bwa Tamara are i Karawa e kakabwaiaira ngkana ti bubuti Nakoina ma tiaki ni karokoa ae E a tia ni katai ara onimaki. I kakaitau bwa Ngai ma toau ti kona n riki bwa bain ni mwakuri te Uea ni kuneakia aomata ake a tauraoi n ongo rongorongon te euangkerio. I ataia bwa te Atua e tangirira ao e na kairira ngkana ti bubutia.
Kamatata n te Korotamnei iroun Dilleen Marsh