Tienta Ibukia Kairake n Ikawai Karikirakeia Roro Aika Tabe n Rikirake
Ana tienta te Ekaretia ibukiia kairake n ikawai bon tiaki ti ibukin katanakin te roro ae tabe n rikirake man te karirii n te aonaaba—a katauraoi naba ibukiia taan kairiiri n te Ekaretia n taai aikai ao n taai aika a na roko ni bita te aonaaba.
Bwa reitan te intitiute burokuraem, te tienta ibukiia kairake n ikawai—ake a tei ti iaon Europe—e anga kiraati n taekan te aro n ikotaki ma taabo ake kairake n ikawai a kona n ikotaki ibukin waaki ni kakukurei are karinanaki man kukanakin te katairiki nakon karaoan mwakuri ni mweenga nakon te takakaro ni Ping-Pong n tibwaan te euangkerio.
Rikiraken te Ekaretia rinanoia Kairake n Ikawai
N uakaan ma tokin 2003, te iango ibukin tienta ibukiia kairake n ikawai e waaki ma aua kaukan tienta I Copenhagen, Denmark, ao Berlin, Hamburg, ao Leipzig, Tiaman. Unimwane L. Tom Perry man te Kooram n te Tengaun ma Uoman e kaunga riki te rikirake iaon te iango ngke Beretitenti Gordon B. Hinckley (1910–2008) e weteia bwa e na tararua iaon te Aono ae Central Europe n 2004.
Ni kaineti ma Erik Psota, te tia ibuobuoki n tarekita n te aono ibukin tieminarii ao intitiute i Europe, angiina a riki bwa taan kairiiri n te nakoanibonga n taai aikai i Europe a bon kee aia ririki iaan 30 n te tai anne.
“Te taratara n te maiu n tamnei are e roko nakon Unimwane Perry bwa te rikirake n te Ekaretia i Europe e na roko rinanon te 18 nakon 30 n ririki e a tia ni karika te bitaki ae korakora irouia kairake n ikawai n aia roro taan kairiiri n te nakoanibonga i Europe,” e taku te Tari Psota. Ana iango Unimwane Perry e bon irekereke nakoia kairake n ikawai ni boong aikai, e reitia, “ibukina bwa e buokiia n ata tabeia ibukin rikiraken te Ekaretia.”
N te bong aei, e raka iaon 140 tienta i Eurobe, n ikotaki ma 30 ake a karaoaki. Botaia ni kabane a katauraoi ibukin te roroko ae tabe n rikirake ni kabuta te euangkerio n te aonaaba.
Katean te Abanuea ao te Aro n Iraorao i Norway
Te tienta ibukiia kairake n ikawai i Oslo, Norway, bon teuana mai ibuakon tienta aika a mwaiti ike kairake n ikawai a reiakina aron katean te abanuea. Kaira Mathilde Guillaumet, mai Buranti. Mitinare a waaki n reireina neiei i Paris inanon 2009 imwiin kaoakina iroun raoraon Titita Guillaumet friend n reiakina riki taekan te euangkerio.
Titita Guillaumet e bwabetitoaki n 2010 ao imwiina e mwaing nako Norway ibukin teuana te ririki, ike te tienta ibukiia kairake n ikawai e reitinako ni karikirakea ana koaua.
“Te tienta ai bon mwengana teuana. E bon rangi ni bubutimwaia nakon aia ruu ataein te reirei,” e taku Titita Guillaumet. “Taanga n te tienta a riki kaanga ai aroia kaaro—a mwaiti aomata aika raraoi ake a roko ni karekea te rau ao te reirei. i Paris ao Oslo, I a tia ni kona n nakoia taanga ni mitinare ni maroroakina taekan te euangkerio, are I aki kona ni karaoia ni mweengau, iangoan ae ti ngai te membwa n au utu.”
Sam Basnet, e bwabetitoaki n 2009, bon ti ngaia naba te membwa n ana utu. Karaoan te mwakuri ni mitinare n te tienta i Oslo e buokia n tibwa te euangkerio ma ana koraki ngke e oki ni kawariia i Nepal. E taekina te nakoanibonga nakoia ao ana Boki Moomon, are e a riai ni buokiia mitinare n reireiniia aomata tabeman te reirei ae aron aio i Oslo.
“Au utu a tangiria n namakina aron are I namakinna,” e taku Tari Basnet. “A tia n noora te bitaki iroun Sam ngke e tuai kaina te aro ao Sam imwiin kainakin te ekaretia. Mai imwaina bon akea au kantaninga. Akea te ungannano irou. Imwiin au bwabetito, I taneiai n roko n te tienta ao I a ata riki te bwai ae n na karaoia nakon are mai imwaina.”
Tari Basnet bon tiaki ti ngaia are e namakina te tabekakirake ao te ungannano iroun te Tamnei n te tienta. Benjamin Kerr mai Scotland e a tia ni kabanea uoua te tiamwa n nako ni mwakuri i Oslo ao n noori tienta bwa taabo ake e uringnga bwa a bon kakawaki.
“Te Tienta bon au tabo ni katantan man karirii n te aonaaba,” e taku Tari Kerr. “I bon namakina te rau, te kamanoaki, ngkana I mena ikekei. I iangoi tabeua atatai ake kabanea ni kaunganano ake I rinanona a roko man tekatekau n te tienta, riki n te kainutu, ao n taekinan bwaai ake a katabeaiangaira, bwaai ake ti noori bwa a kanganga. Rinanoakin aikai e kauringai kakaawakin te reirei ae bebete man te euangkerio.”
Karikirakeaia Kairake n Ikawai ao Taan Kairiiri n Taai aika a na Roko
Taian tienta ibukiia kairake n ikawai a riki bwa kakorakorakiia riki kairake ma raraoia ao aia utu n te euangkerio. A kateia taan kairiiri. Kairake aika tuai n iein a ibuobuoki iaon reirei ibukiia taan kairiiri inanon tienta ao ni bairei waaki ni kaukurei aika a kakaokoro ao kiraati.
Nakoa akanne e a karekea ana tai Barbara Matovu, are kain Uganda ma ngai e a riki bwa kain Norway, “te tibwanga n namakina ana tangira te Atua ibukiia natina ni kabane,” e taku. “E a tia ni kamatoa au onimaki n ana botaki te Ekaretia. E a tia naba n reireinaki bwa abanuean te Atua e aki kona ni kateaki ti iroun temanna, ma irouia aika mwaiti, inanon te katiteuanaki.”
Ngkai kairake n ikawai a karekei kataneiai ni kona ni karaoi nakoaia n te Ekaretia n taai aika a na roko, a karekea naba te taneiai are e na buokiia n riki bwa buu ao kaaro aika tamaroa. A na tauraoi ni bita te aonaaba tiaki ti imataia te botannaomata ma inanon te mweenga.
“Reirei n te nakoa ni kairiiri ake a reiakinaki irouia kairake n ikawai bon reirei naba ake a na buokiia kairake n ikawai n riki bwa kaaro—taotaonannano, reitaki, karekean te kairiiri ao kariaiakaia aomata ni kabonganai inaomataia ni katiaan te mwakuri, ao irakin ana wirikiriki te Tamnei,” e taku Gerald Sorensen, are, ma kainnabana, Nancy, e mwakuri n te tienta i Trondheim, Norway.
Taian tienta ibukiia kairake n ikawai e na reitinako ni buaka ni kaitara rikiraken te bure n te aonaaba ni mwakuri ni kakoaua bwa taan kairiiri n te Ekaretia n taai aika a na roko a na rikirake riki ni waekoa.
“Kairake n ikawai a roko n te tienta ni karekea te atatai n te euangkerio tiaki ti te kawai n reirei ma n kamwakuran te reirei n te euangkerio ao ni buokiia raraoia ake tiaki kain te aro,” e taku Tari Psota. “Ana ibuobuoki te tienta ibukiia aika a boou ao katauraoakiia te roro ni beku ibukin te Uea ma te ingaingannano ao te kantaninga ae akea tokina.”
Tienta ibukiia kairake n ikawai bon taabo ni bobotaki ike te roro ae rikirake a kona ni katauraoia ni bita te aonaaba ma rongorongon te euangkerio.
© 2008 Robert Casey