Ana Kau Daddy
Priscilla Costa Xavier, São Paulo, Brazil
Tabeua te ririki n nako ngke a buoka te Bootaki n Aine au karo ni bairei kunnikai, kaau, ao bwaai riki tabeua aika ana bwaintangiraaki nakoia aika kainnano, tamau e noora te kau ae kawakinaki raoi i nuukan bwaai ake a bobotaki. N te tai anne ao e namakina te nano ae korakora bwa e na taui kaau akekei.
E ngare tinau ao e taku, “Kaau aikai bon teniua tiaitiia ao a rangin ni uarereke ibukim. A na bon aki tau naba!”
E ngae n anne, ao tamau, e teimatoa n tangirii. Imwiin tabeua manikangare mairouia aine, a kariaia bwa e na bwainii.
N te tai are e roko iai ni mweengana, e kaitiaki, e kanoai ma nutibeeba, ao ni katikui inanon te bwaoki iaon ana kabwate. Ti karekea te kaetieti bwa ti na aki riinga te bwaoki. I nanon nimaua te ririki e bon tiku naba ni nnena arei.
N te bong teuana te utu ae boou a kaaina te auti are i rarikiia. Iai uoman natiia ao temanna ae onoua ana namwakaina. Mwaneu ao Ngai ti a riki bwa raoraoia natiia aine, aika titebo ma ara ririki. Ti tibwauaia ma raoraora aika boou bwa ti reirei n te aro, ao ti kaoia nakon te Buraimwarii. A rangin ni kukurei ao n ingainga nanoia ni kan reiakin riki bwaai ake ti a tia n tibwauai ma ngaia.
Imwiin okira man te Buraimwarii nakon mwengara, aki toki n taekina te Ekaretia ma aia karo. Ngkanne ara karo a kaoia kaain te utu ni kabane bwa a na ongora aia reirei mitinare ao ni kaea te taromauri. A kariaia ma te kukurei. A tangirii reirei, ao ti rangin ni kukurei n nakon te taromauri ma ngaia.
Ma ngke e a roko te Kaonobong, natiia aine a taraa ni bwaranano. Ngke ti titiraki bwa tera ae riki, a taku bwa aikoa kan nakon te taromauri aia karo.
Ti rangin ni un ao ti tuanga Daddy bwa e na taetae ma aia karo. Ngke e tuangiia ibukin kakabwaia man kaeakin te taromauri, e kaeka te tama, “Eng, I atai bwaai aikai ni kabane. Te kanganga bwa I tuai man bwaini aekan kau riki tabeua irarikin au kau raabwa inanon te tai ae rangin ni maan, ao I ataia ae ti riai ni bwaini kunnikai aika tamaroa ngkana ti na nakon bootakin te Ekaretia.”
N te tai anne tamau e taraa tinau. E ata raoi te bwai ae riai ni karaoia tinau. Kaau ake inanon te bwaoki iaon ana kabwate Daddy a bon tau raoi iroun taman raoraora, ao te utu ni kabane a nakon te taromauri. Bon te Tabati ae moan te tamaroa ibukiia ao ibukira. N te tai ae aki maan ao a riki ngaia bwa kaain te Ekaretia, ao n te bong aei a riki bwa te utu ae tamaroa ae akea tokina.
I ataia bwa e a tia ni karekei kaetieti tamau mairoun te Tamnei ae Raoiroi bwa e na kawakin kaau aikanne. Ao ibukin aei, I aki toki ni karekea Ana kairiiri ni kakaaia utu aika a tauraoi n ongora te euangkerio. I ataia E katauraoia utu, ao I ataia bwa ti riai ni ukoukoriia ao ni uotiia nakon Kristo.