Iai anera n tararua? Iai temanna ae katabeaki ibukiu?

Te taeka ae “anera n tararua” e aki kabonganaki ni booki aika tabu; i rarikina, anera a atongaki bwa “taan n ibuobuoki” (taraa Ominai 1:25; Moronaai 7:22–29). “A taetae anera man mwaakan te Tamnei ae Raoiroi” (2 Nibwaai 32:3) ao aki toki n ibuobuoki n ana mition te Tamnei ae Raoiroi ni karaunano, ni kairi, kamanoia taan onimaki, ao ni kaota ke ni kamatoa te koaua. Ngaia, are te Tamnei ae Raoiroi e kona n iangoaki bwa anera n tararua.

Unimwaane Jeffrey R. Holland man te Kooram n Abotoro ake Tengaun ma Uoman e reirei: “Man moan karikan bwaai rikaaki ni karokoa boong aikai, e a tia te Atua ni kabonganaia anera … ni kaota te tangira ao te tabeianga nakoia Natina. … E noraki ke aki noraki a boni bane n tainako ni kaan” (“Aia Mwakuri n Ibubuoki Anera,” Riaona, Nobembwa 2008, 29).

E a tia te Uea n aki kaotia bwa tao temanna te anera ae onoti e mwiokoaki bwa e na tararuaia ni kabane aomata, ma ko kona ni kakoaua bwa te kawakinaki ao te kamanoaki mai ieta a tauraoi. Ngkana ko kamwakura te onimaki, ko na karekea ana ibuobuoki te Atua, n raonaki ma anera ake a kanakoaki bwa a na kakorakorako ao ni karaua nanom ao n anganiko te ungannano ni karaoa te bwai ae eti.