Te Ninikoria Ni Kaitara te Angibuaka

Iroun Maddison Morley

N aia kauoua ni bong ni kaembwa Kairake n Ataeinaine n au titeiki, ao ti taonaki n te buaka ae korakora ao te toneito. N au uoote ao iai 24 kairake n ataeinaine n te kaembwa ao uoman taan kairiiri, ao ti bane n rin inanon te kaebin ae uarereke ibukin katanara. Te karau e bwaka ni korakora ao te ang e a moanna ni korakora. I teimatoa ni kauringai n tataro ibukin kamanoara bwa e a tia n anga mai imwaina ara beretitenti n te titeiki. Ara uoote a tia naba n anga te tataro n te kurubu n ara kaebin, ao I bon tatataro naba irou.

Angia ataeinaine a maku, ao e bebete atakina bwa tera bukina. Ara kaebin e aki rangin ni matoatoa ao ti mena raoi irarikin te karaanga. Tao inanon 20 te miniti ao e rikirake te angibuaka ni korakora are e a karika birinakoia kaain te titeiki ni kabane man aia kaebin n aia uoote nakon ana kaebin te kauntira, ake a tei n te tabo ae rietaata riki. E karaoa te tataro riki te beretitenti n te titeiki, ao ti bane n anenei anene, anenen te Buraimwari, ao anenen te kaembwa ni kataia ni kabua te maaku. Eng, ti bane ni maku, ma ti namakinna bwa a na bane n nakoraoi bwaai ni kabane. Te itera n aoa imwiina ao e a bon nakoraoi okiran oin ara kaebin.

Ti kunea imwiina te bwai are e riki nakon te toneito n te tairiki anne. E a tia ni bwenauaaki inanon uoua angibuaka. Teuana ma iai e katobibiira n nakon te angatai ao are teuana e nakon te angamaing. Are iroura e aki rangin ni korakora angibuakana!

I ataia bwa te Atua e ongo ara tataro ni kabane n te tairiki anne ao E kamanoira man korakoran te buaka. E aera ngkai e kona ni uamae te toneito ti ngkana e kainnanoia te Atua. I ataia bwa i nanon buakan te maiu, ti kona n taainako n tataro nakon Tamara are i Karawa ao E na ongo ao ni kaekaira, n anganiira te ninikoria ao te kamanoaki are ti kainnanoia bwa ti na kawakinaki iai.