Beeku n te Ekaretia
Te Kairiri N ana Kawai te Uea
Ngkana ti beku ao ni kairiri n ana kawai te Uea are e a tia ni kawenei, n aki taraia bwa tera nakoara, ti na bon uaia ni kakabwaia ao ni kakabwaiaaki.
Ngke te Tari Jones ao natina te mwaane a katabeaki bwa a na reireiniia ni mwengaia ana utu William, a moana karaoan aia reirei n te mweenga ni katoa namwakaina. Rinanon rorokoia, Kim, te nati te aine n te utu, e reiakinna bwa a tabe ibukina. E mwaiti ana titiraki n taekan te euangkerio ao e kukurei ni maroroo ma ngaia.
N tain te tiamwa teuana ngke e kataia n noria ngkana iai ana koaua, te Tari Jones, n raonaki ma temanna kaain te Nakoanibonga ae te Merekitereka, a tuangaki bwa a na ira aia kaembwa Kairake n Ataeinnaine. Kim e ataia imwiina aron kainnanoan te tia reirei n te mweenga n te tabo arei. E tuangiia ana utu bwa e a tia n reke ana koaua n a na tangira te Tia Kamaiu ibukina ngke te Tari Jones ao temanna ae iai irouna te nakoanibonga, n ana bubuti, a anganna te kakabwaia n te nakoanibonga n te tabo ni kaembwa.
Ana taan tia reirei n te mweenga, a namakinna ni koaua bwa a iraorao nakon te utu ae William. Rorokoia e rangi ni mwannanoaki iroun Kim ao ana utu—ao iroun te Uea.
Te Kairiiri ao Nakoa
N te aonaba ni boong aikai, e tataneiai te aba n taraa rikiraken temanna man nakoaia aika bubura n te tabo ni mwakuri ke man rakan te boo are e kanikinaea te rikirake n ana kekeiaki temanna ma temanna. N tainako ti tarai nneia ke nakoaia ni kananikinaea bwa te aomata anne e rangi ni kakaawaki ana konabwai. E bon aki kakubanako ngkanne bwa mwaitiia aomata a kataia n ata aron tamaroan taraan rikirakeia n te maiu n tamnei.
Ia tia n ongo irouia aomata Aika Itiaki Ni Boong Aika Kaitira aika mwaiti n titiraki bon ibukin aroia ngkai a tuai man weteaki nakon nakoa ni kairiiri n te Ekaretia. Ma e koaua ae wakira e baireaki raoi man weteakira n te kairiiri?
Ni koauana, te kairiiri e aki kainnanoa te wewete. Tabeman aomata ake a karaoa te mwakuri n tabekakirake ao kaungaan te nano are e karika raoi te tia kairiiri ni karaoia a karaoaki n akea nakoaia ke rinaniia n te nakoa. Doctrine ao Covenants 121 e reirei tabeua reirei aika kakaawaki ibukin te kairiiri:
“Ti a tia n reiakinna man atatai aika kananokawaki bwa bon aroia ao anuaia ae e kaniia ni kabane mwaane, man te tai are a karekea iai teutana te kariaia, n aron are a katautaua, a na waekoa ni moana karaoan mwaaka aika aki eti
“Bwa a mwaiti aika weteaki, ma a karako aika rineaki.
“Akea te mwaaka ke te mwakuri ae e kona ke ni kateimatoaki man raoiroin te nakoanibonga, ti man te kairaki, te taotaonaki n nano, man te akoi ao te nanoanga, ao man te tangira ae aki mwamwana te aba;
“Man te akoi, ao te ataibwai ae itiaki, are e na kakorakoraa te nano n aki mwamwana te aba, ao n akea te uarao” (verses 39–42).
E tabangaki kairuruaan te kairiiri ma tuangakiia aomata te bwai ae a na karaoia. Anne are e kona ni kairiko nakon waaki aika bure. E bon aki riai taekinan ae kangai, “Ko riai ni karaoa ae I taku ibukina bwa Ngai (are iai irou te nakoanibonga ke I anganaki te nakoa iroun te nakoanibonga) ane taku.” Te reirei ae e kakaawaki ni mwakoro 121 bwa te tia kairiiri ni koaua e aki anga te kaetieti ao ni kaantaningaia bwa e na iraki tii ibukin te nakoa. E riai riki, te nakoanibonga ni kairiiri bon ibukin taekan te kakao. Te kakao n akoi, are e boboto iaon te atatai ae itiaki ao te tangira ae koaua, e na korakora riki ana kaunganano nakon “ Ibukina bwa I taekinna.”
E bon koaua bwa taan kairiiri ake a kan kanakoi babaire a kona ni katiai aika mwaiti riki. Ma aki kairiiri n ana kawai te Uea are e a tia ni kaotia. Ao aki karikirakea te konabwai ae inaomata ao te nanoraoi are a riai n iai irouia naake a kairiia.
Te Kairiiri ni Koaua
Ataia bwa te wewete ke te nakoa ae kariaiakaki e aki karinanaki ni kibu 41 ke 42 bwa teuana mai ibuakon kawai ni kabongana te mwaaka ke kairoro. Ma, te mwaaka ao ana kairoro ni koaua te tia kairiiri a nako rinanon te kairaki, te taotaonaki n nano, te akoi, te nanoanga, te tangira ae aki mwamwana te aba, akoi, ao te ataibwai ae itiaki. Anua n aro ni kairiiri aikai a koaua ao e kona n otinako irouia ni kabane, n aki tarai nakoaia ke rinaniia n te nakoa.
Wewete nakon te kairiiri ai aron wiiran te bwatika ni kataneiai. Te wiira ni kataneiai e karekea ana tai te ataei n reiakina arona ni kabaeranti ao n toka ma te mwengaraoi. Te wewete nakon te kairiiri e katikuia aomata n te tabo n reiakina aron te tangira, tataonannano, ao te kairaki rinanon te atatai ae itiaki ao te akoi. A kona naba n reiakinna bwa ane e kataia ni kairoroa te anua e raonaki man anaakin te Tamnei ao te mwaatai ae kekerikaaki.
Imwiin kamotirawaakira, ti na kunea ngkana ti a tia n rikirake ao n reiakinaki inanon nakoara. Ti a tia n reiakina n tangira ao ni beku ibukiia tabeman n akean nakoara ke ti kairoroaki? Ti a tia n reiakinna ni beku ma te mwaaka are e a tia n ibuobuoki n aika a raraoi tii ibukin bwa antai are ti a riki inanona?
Te Uea e na weweteira n tainako rinanon maiura. E atai nanora. E na weteira ngkana E kainnanoira ibukin rabakaura, ara atatai, ke ara namakin nakon te Tamnei. E na weteira ni kaineti ma ara ingaingannano n ongo ni Bwanaana ao n tangira n Arona n Tangira.
Ngkana ti reiakina aron te bitaki ibukin ae raoiroi n ana kawai te Uea, ti na riki bwa aomata aika a kona n tabekiarake tabeman tii ibukina bwa antai ngaira. Nakoara e na aki riki bwa boton bukin te bitaki ae tamaroa. E ngae n anne, ngkana ti butiaki, ti na karaoa raoi ara beku n te tabo are ti a tia ni mwiokoaki iai n te Ekaretia.
Tao ti beku n te Reirei n Tabaati ke n ana burokuraem te roronrikirake, bwa te tia reirei n te mweenga ke te tia reirei ni kakawari, ke bon te bitiobi ke te Beretitenti n te Botaki n Aine, ara beku nakoia tabeman e na kaota ara tangira iroun te Tia Kamaiu. Ngkai ti beku ao ni kairiiri n te kawai are E a tia n anga, n aki warekia bwa tera nakoara, ti na uaia ni kakabwaia ao ni kakabwaiaaki.
Kamataata n te Tamnei e na aki katootongaki.