Usa ka Calling alang sa usa ka Kinabig
Usa ako ka kinabig ug walay kahanas sa pag-piano. Apan kadako sa akong kalipay sa makausab sa kinabuhi nga calling isip branch accompanist.
Wala madugay human sa akong bunyag sa edad nga 10 sa Lappeenranta, Finland, nakadawat ko sa akong una nga calling. Kadto 1960, ug ang among gamay nga branch nagkinahanglan gayud og tawo nga makatukar sa mga himno alang sa mga miting sa sakrament. Gihangyo ako sa paghimo niini nga buluhaton.
Samtang ang akong mama kanunay nga midasig kanako ug sa akong igsoon sa pagtinguha og artistic nga mga talento, dili ko kahibalo nga motukar og piano, ug kami walay piano. Apan gusto kong motuman sa akong calling, busa mihimo kami og plano.
Sa family home evening, among gihisgutan kon unsay ipasabut niini nga calling nganha kanamong tanan. Hinoon, tungod kay biyuda man ang among mama nga may duha ka batan-ong anak, nahibalo kami nga dako nga hagit alang kanamo ang pagpalit og piano ug pagbayad sa magtudlo. Nakahukom kami nga kaming tanan andam nga mohimo sa gikinahanglan nga mga pagsakripisyo.
Ang unang sakripisyo nga gihimo sa among pamilya mao ang pinansyal. Mihukom kami nga sugod sa tingpamulak hangtud sa tinglarag magbisiklita lang mi kay sa magsakay og bus. Ang akong igsoong lalaki, si Martti, may kaisug ug nahimong maayo kaayong mobisiklita—bisan sa snow ug sa ice. Wala na ko mamalit og mga sinina ug nagkat-on sa pagtahi. Nagkat-on usab kami sa madaginuton nga pagpuyo. Nagsugod kami sa pag-garden sa lungsod duol sa balay sa akong mga apohan ug mipreserbar og mga pagkaon alang sa tingtugnaw. Ang among mga “pagbakasyon” nahimo na lang nga biyahe kauban ni mama ngadto sa templo sa Switzerland o mga piknik ug mga kamping nga duol ra sa balay.
Ang ikaduhang sakripisyo nga gibuhat sa akong pamilya mao ang oras. Among gibahin ang mga buluhaton ug giusab ang iskedyul sa uban namong mga kalihokan ug homework aron duna koy igong panahon sa pagpraktis og piano. Tungod sa among mga sakripisyo ug tinuoray nga pagtrabaho, si Mama sagad nga moingon nga kami walay libre nga panahon nga maapil sa mga kasamok sama sa uban nga among kaedad. Sa pagkatinuod, ang akong calling nahimo nga usa ka family calling sa dugayng panahon sa wala pa ko motukar og nota.
Akong gisugdan ang pagkuha og mga leksyon sa usa ka magtutudlo sa musika sa lokal nga eskwelahan. Nagpraktis ko gamit ang usa ka papel nga keyboard ug sa piano sa simbahan. Sa dihang mibalhin ang akong magtutudlo sa piano, among gipalit ang iyang piano, ug gidawat ako nga magtuon ngadto sa inila nga magtutudlo og piano sa maong dapit.
Akong nakat-unan sa kaugalingon ang mga himno ug nagsigi og praktis uban sa music director sa branch. Ang tanan midasig kanako—bisan kon ang “sayop” nga nota ang matulpok. Ang akong magtutudlo nakulbaan dihang nahibaloan niya nga mipatukar na ko atubangan sa mga tawo nga dili pa gayud ako kaayo makamao ug wala pa makamemorya sa mga piyesa. Apan ang pagtukar gamit ang usa lang ka kamot mas maayo na lang kay sa walay duyog.
Nagbisiklita ko padulong sa akong mga leksyon, ug kon moabut ang tingtugnaw, maningkamot ko sa paglakaw o pag-ski kon mahimo. Sa matag Dominggo mag-inusara kong maglakaw ngadto sa mga miting aron makaabut ko usa ka oras sa di pa magsugod aron makapraktis. Mosakay lang ko og bus kon tugnaw na kaayo nga ang temperatura ubos na sa -15ºC (5ºF). Ang ulan ug ang snow dili nako igsapayan; ang panahon dali ra kaayo samtang naglakaw ko kay daghan kaayong matahum nga mga himno nga nagkuyog kanako. Samtang naglakaw ko, mitabok ako sa mga kapatagan uban sa mga pioneer (tan-awa sa “Dali, Dali, Kamo mga Santos,” Mga Himno ug mga Awit sa mga Bata, nu. 30), nagbaktas sa tumoy sa mga kabukiran sa Zion (tan-awa sa “Taas sa Tumoy sa Bungtod,” Mga Himno ug mga Awit sa mga Bata, nu. 5), ug nagbarug uban sa mga kabatan-onan kinsa dili gayud maluya (tan-awa sa “True to the Faith,” Hymns, nu. 254). Dili gayud ako maluya uban niana nga suporta—bisan og ang akong pamilya mao lamang ang Santos sa Ulahing mga Adlaw sa among komunidad sa sidlakan sa Finland, nga duol ra sa utlanan sa Russia.
Paglabay sa mga tuig mas maayo na kong motukar ug makatukar na og musika kay sa yano lang nga pagtukar sa mga nota. Akong nakat-unan ang pagkamainampoon sa pagpili og musika aron ang Espiritu maanaa sa miting. Ug ang labing importante, ang akong pagpamatuod sa ebanghelyo miabut kanako pinaagi sa musika. Mahinumduman ra dayon nako ang mga pagbati, mga pulong, ug ang mga mensahe sa mga himno kon duna koy pangutana. Nahibalo ko nga ang mga baruganan sa ebanghelyo ug mga ordinansa matuod, kay kini akong nakat-unan pagtulun-an human sa usa ka pagtulun-an ug nota human sa usa ka nota.
Akong nahinumduman ang usa ka partikular nga adlaw dihang gisulayan ang akong panaad niadto nga mga baruganan. 14 anyos ko niadto; ganahan kong molangoy ug nangandoy nga makaapil sa Olympics. Wala ko makigsangka sa mga adlaw nga Dominggo, apan milambo gihapon ko. Sa katapusan, sa nagkaduol ang Olympics sa Siyudad sa Mexico, usa ka coach midapit kanako sa pag-apil sa usa ka espesyal nga pagbansay.
Ang pagbansay, hinoon, himoon matag Dominggo sa buntag atol sa Sunday School. Nangatarungan ko nga mahimo ra kong moadto sa praktis ug dili katambong og Sunday School tungod kay mobalik ko sa simbahan inig kagabii sa oras sa miting sa sakrament. Nagtigom ko og pamilete sa bus ug giplano ang tanan. Pagka Sabado sa wala pa ang unang pagbansay, akong gisultihan ang akong mama sa akong plano.
Akong nakita ang kasubo ug kasagmuyo sa iyang mga mata, apan ang bugtong niya nga tubag mao nga ang pagdesisyon akoa ug ako natudloan na sa unsay matarung. Nianang gabhiona dili mawala sa akong hunahuna ang mga pulong nga “Choose the Right” (Hymns, nu. 239). Ang mga pulong milanog sa akong ulo sama sa guba nga plaka.
Pagka Dominggo sa buntag, naggunit na ko sa bag nga panglangoy ug ang akong bag nga pangmusika sa laing kamot, nanghinaut nga motuo ang akong mama nga moadto gyud ko sa simbahan. Migawas ko ngadto sa hununganan sa bus. Nahitabo nga ang hununganan sa bus padulong sa languyanan naa sa akong dapit ug ang padulong sa chapel anaa sa pikas. Samtang naghulat ko, gisapot ko. Ang akong mga dalunggan nakabati sa musika nga “Have I Done Any Good?” (Hymns, nu. 223)—ang himno nga giplano alang sa Sunday School nianang adlawa. Nahibalo ko gumikan sa kasinatian nga, uban sa lisud nga kumpas, lisud nga mga pulong, ug taas nga mga nota, kini nga himno lisud gayud kon walay maayo nga tukar.
Samtang naghunahuna ko, ang duha ka bus nagpadulong. Ang bus nga padulong sa languyanan mihunong alang nako, ug ang driver sa bus padulong sa simbahan mihunong ug mitan-aw kanako, naglibug tungod kay nahibalo siya nga kanunay kong mosakay sa iyang bus, Tanan kami nagtinan-away sulod sa mga segundo. Unsay akong gihulat? Akong gipili ang Ginoo (tan-awa sa “Who’s on the Lord’s Side?” Hymns, nu. 260). Nakapanaad na ko nga moadto kon asa ang gusto niya nga akong adtoan (tan-awa sa “Ako Moadto Asa Ikaw Buot Kanako nga Moadto,” Mga Himno ug mga Awit sa mga Bata, nu. 46). Ang akong desisyon nga mosunod sa mga sugo nahimo na kaniadto pa (tan-awa sa “Sunda ang Kasugoan,” Songbook sa mga Bata, nu. 68).
Sa wala pa mauyon ang akong hunahuna ngadto sa akong tinguha, milihok na ko. Midagan ko tabok sa karsada ug giwara-warahan ang driver sa laing bus. Mihatag ko sa plete ug miadto sa luyo sa bus nga padulong sa simbahan, napanan-awan ang akong mga pangandoy sa paglangoy nga nagkalayo sa lahi nga direksyon.
Ang tanan nagtuo nga mihilak ko nianang adlawa tungod kay akong gibati ang Espiritu. Apan sa tinuod mihilak ko tungod kay ang akong gipangandoy sukad sa pagkabata mao pa lang gayud ang pagkahanaw ug tungod kay naulaw ko nga akong giabi-abi ang ideya sa paglangoy atol sa Adlawng Igpapahulay. Apan niana nga Dominggo, sama sa nangagi ug sa pagkahuman, akong natuman ang akong calling.
Sa dihang andam na kong moadto sa kolehiyo, nakabansay na ko og ubay-ubay nga mga miyembro sa branch nga mangulo sa musika ug motukar sa piano. Sa kolehiyo padayon ang akong pagtukar og piano ug mikuha og mga leksyon sa organ. Nagtuo ko nga ang akong kahigayunan nga makaadto sa Latin America wala na sa hangtud sa dihang wala na nako ipadayon ang akong pagpakigsangka sa langoy, apan dihang nahuman nako ang akong master’s degree sa Brigham Young University, nagmisyon ko sa Colombia. Samtang naa ko sa misyon, nagtudlo ko og piano. Gusto ko nga inig biya nako niadto nga mga Santos sila duna nay gasa sa musika. Ang mga bata ug mga kabatan-onan sa Colombia layo ang gilakaw ubos sa init nga adlaw aron makaangkon sa oportunidad nga makakat-on sa pagtukar og piano. Sila usab nagsugod sa pagtukar nga usa ka kamot hangtud nga milambo sila nga makatukar gamit ang duha ka kamot. Ug mihimo sila ug mas dako pa nga mga sakripisyo kay sa akong gihimo sa ilang tinguha nga makakat-on sa pagtukar sa piano.
Kapin na sa mga 50 ka tuig sukad ko nabunyagan. Mibiyahe ko og lagyo gikan sa akong balay sa Finland, apan dili igsapayan kon asa ko maabut, kanunay nga adunay panginahanglan nga makatukar sa mga himno. Ang tibuok kalibutan nga pinulongan sa musika nahimo nga taytayan sa panabut ug gugma sa daghang dapit.
Karon ang akong mga kamot hinay na ug gi-arthritis. Daghan nang makamao nga mga musicians ang mipuli sa akong dapit. Ang akong mama sagad nga mobati og kasubo samtang maghanduraw siya sa una nakong mga tuig sa Simbahan ug sa mga sakripisyo nga akong gihimo, sa mga milya nga akong gibaktas, ug sa mga butang nga akong gisakripisyo. Nabalaka siya nga basin ang kabugnaw nakadugang sa akong arthritis. Bisan pa, akong gikalipay, kining, “makita nga mga panumduman” sa akong pagsakripisyo. Akong gipahinungod ang akong mga kalipay ug mga kasubo ngadto sa musika. Nakakat-on ko sa pagkatawa ug paghilak pinaagi sa akong mga tudlo.
Ang akong kasingkasing mokanta sa pasalamat kon akong mahunahuna nga ang Langitnong Amahan ug akong mga lider naghunahuna gayud sa paghangyo sa usa ka batang babaye sa pagtuman sa ingon ka mahagitong nga buluhaton. Kadto nga calling nakatabang kanako nga makaangkon og lig-on nga panabut sa ebanghelyo ug mitugot kanako nga makatabang sa uban nga mobati sa Espiritu pinaagi sa musika. Ako ang buhing kamatuoran nga ang bag-ong mga kinabig nagkinahanglan og calling—bisan ang batang mga babaye nga walay kahanas sa pag-piano. Tungod sa akong una nga calling, akong nadiskubrihan nga sa Dios walay imposible ug Siya adunay plano ug katuyoan alang sa matag usa sa Iyang mga anak. Ug tungod sa musika, nakabaton ako og dili matarug nga pagpamatuod sa gipahiuli nga ebanghelyo ni Jesukristo.
Paghulagway pinaagi ni Mike Malm