Seminary diha sa Kalasangan sa Ecuador
Sa usa ka hilit nga lasang, ang seminary nakahimo og dakong kalainan alang nining mga kabatan-onan.
Sa silangan sa Quito, Ecuador, lapas sa mga bulkan ug sa Andes Mountains, ang mga agianan dulhugon kaayo paingon sa lasang sa Amazon. Didto makakita kamo og baga nga kakahayon, abundang mga sapa, mga unggoy, mga toucan, ug gani pink nga mga dolphin.
Makita usab ninyo ang siyudad nga ginganlan og Puerto Francisco de Orellana. Layo kaayo kini, hinoon, ang tanan sa Ecuador layo. Kinse ka tuig ang milabay, adunay pipila lang ka tawo sa dapit. Apan ang pagdiskobre sa petroleum nakapadaghan sa industriya, mga tawo nga nangita og trabaho, ug mga miyembro sa Simbahan.
Seminary diha sa usa ka Gamay nga Branch
Pipila sa mga batan-on, sama ni Oscar R., mga miyembro na sa dihang gitukod ang branch, apan kadaghanan bag-ong mga kinabig. Ug adunay kadasig sa ilang mga kasingkasing. “Kami lig-on,” miingon si Oscar.
Niadtong Septyembre 2010, usa lang ka tuig human kini natukod, gisugdan sa branch ang programa sa seminary. “Sa dihang nagsugod pa lang mi og pundok mga pipila ka tuig ang milabay,” miingon si Oscar, “gamay lang mi. Ako ra ang batan-on. Apan nagpadayon mi sa pagtubo. Sa wala madugay aduna mi 6, dayon 10, ug karon mas daghan pa nga mga batan-on.”
Tungod kay pipila sa mga batan-on moeskwela sa buntag ug ang uban sa hapon, sila nag-organisar og duha ka eskedyul sa klase sa seminary—usa sa buntag gikan alas-8 hangtud alas-9 ug usa sa hapon sa alas-4:30 hangtud alas-5:30.
Mahimong dili kaayo daghan ang batan-on sa programa, apan alang niadtong mga batan-on nga mitambong, ang seminary nakapausab sa ilang kinabuhi.
Nganong Motambong?
“Ang seminary usa ka dako nga panalangin alang kanako,” miingon si Luis V., bag-o nga kinabig. “Kini nakatabang sa pag-andam kanako nga mahimong maayo nga misyonaryo. Nag-atubang ko og daghang mga hagit ug tintasyon sukad nga namiyembro ko sa Simbahan, apan nakahimo ko nga magpabiling malig-on tungod kay nasayud ko nga ang akong gibuhat sakto.”
Ug dili lang si Luis ang mibati niana. “Bag-o lang ko nga namiyembro sa Simbahan,” miingon si Ariana J., “apan kanunay kong motambong og seminary sukad gibunyagan ko. Malipayon ko nga motambong tungod kay nagkat-on ko og daghang tinuod nga mga butang kabahin sa ebanghelyo ni Jesukristo nga mipuno og paglaum sa akong kasingkasing ug panabut sa akong hunahuna.
Ang pagtambong sa seminary nakapalig-on ni Ariana sa ebanghelyo. “Alang kanako, usa ka panalangin nga mahimong kabahin niining mga klase,” miingon si Ariana. “Kini nakapalig-on sa akong espiritu ug nakatabang kanako sa pagpangandam aron sa umaabut ako mahimong maayo nga asawa, inahan, lider sa Simbahan, ug tingali usa ka full-time nga misyonaryo.”
Ang igsoong lalaki ni Ariana, si Gerardo, susama og gibati. “Mapasalamaton ko tungod kay ang seminary nahimong importante nga bahin sa akong kinabuhi,” siya miingon. “Kini nag-andam kanako nga moserbisyo og misyon sa umaabut nga adlaw. Didto nakakat-on ko sa plano sa kaluwasan nga giandam sa Dios alang kanako. Ang matag klase nga akong gitambongan naghatag kanako og paglaum nga ako makapanunod sa celestial nga gingharian ug naghatag kanako og kasiguradoan nga akong nadawat ang ebanghelyo ni Jesukristo.
Si Gerardo usahay kapuyon kaayo atol sa klase. Iya unang ihatud ang iyang manghud nga lalaki sa eskwelahan ug mobalik dayon sa balay aron kuhaon ang iyang igsoong babaye aron sila makatambong sa seminary. Apan ok ra ni alang kaniya.
“Kining tanan bag-o alang kanako, apan puno ko kaayo sa kalipay,” miingon si Gerardo. “Nasayud ko nga anaa ko sa saktong dalan nga maghatag kanako og oportunidad nga makita pag-usab ang akong Amahan sa Langit. Ang Espiritu Santo naghatag kanako niining kasiguradoan. Kinahanglan lang ko nga maningkamot ug molahutay hangtud sa katapusan.”
Dili Angay nga Makulbaan
Alang kang Walter A., ang seminary sa sinugdanan medyo kulba. “Nakulbaan ko sa unang higayon nga mitambong ko,” miingon siya. “Apan pagsulod na nako sa klase, mibati ko nga espesyal tungod kay nabati nako ang gugma nga inyong bation kon kamo magtuon sa kasulatan. Ug inig biya nako, nalig-on ko uban sa kalipay diha sa akong kasingkasing sa akong nakat-unan. Usa sa dakong panalangin sa Langitnong Amahan alang sa kabatan-onan mao ang seminary.”
“Ang Simbahan ni Jesukristo sa mga Santos sa Ulahing mga Adlaw nakapausab sa akong kinabuhi,” miingon si Abel A., kinsa nangandam nga mag-misyon. “Nagkat-on ko sa mga pagtulun-an sa mga propeta. Nahigugma ko ni Joseph Smith. Siya maisugon sa pagpahinabo sa Pagpahiuli sa tinuod nga Simbahan bisan pa sa tanang mga problema nga gihatag niini ngadto kaniya. Gusto kong magmaisugon sama kaniya.”
Daghang mga batan-on ang nagsakripisyo aron makatambong sa seminary. Dili kini sa kanunay sayon, apan alang sa kabatan-onan sa Puerto Francisco de Orellana, Ecuador, angay lang ang pagpaningkamot.
“Kon maghunahuna ko kabahin sa pagpadayon sa unahan, sama sa gisulti diha sa kasulatan,” mipasabut si Abel, “sa akong hunahuna kini nagpasabut sa paghan-ay sa atong mga prayoridad sa kinabuhi. Ang seminary usa niini. Ingon nga kini nakapausab sa akong kinabuhi, kini makausab gihapon sa ubang mga batan-on.”
Bisan sa pinakalayo nga lasang sa Ecuador, ang Simbahan ni Jesukristo ug ang programa niini sa seminary alang sa kabatan-onan naglambo ug nag-usab sa mga kinabuhi niadtong motugot niini.
Ang seminary naglig-on sa mga batan-on sama kanila sa Ecuador, kadaghanan kanila mga bag-ong kinabig.
Gilitratohan ni Joshua J. Perkey