Mga Balita sa Templo

Pagpahinungod Gipahigayon alang sa Templo sa Quetzaltenango Guatemala

Ang Templo sa Quetzaltenango Guatemala gipahinungod pagka-Dominggo, Disyembre 11, 2011, sa tulo ka sesyon pinaagi ni Presidente Dieter F. Uchtdorf, Ikaduhang Magtatambag sa Unang Kapangulohan. Ang mga sesyon sa pagpahinungod gisibya ngadto sa mga kongregasyon sa Simbahan sulod sa temple district.

“Pagkaanindot niini nga templo,” si Presidente Uchtdorf miingon atol sa Sabado nga kasaulugan, diin ang mga tigpasundayag nga mga kabatan-onan gikan sa mga kongregasyon sa area nanayaw, nanganta, ug mipresentar og usa ka visual display sa lokal nga kasaysayan ug kultura. “Kini adunay masidlakon nga kasanag sama sa mutya, ug kini ang mutya niini nga dapit niini nga nasud.”

Ang Templo sa Quetzaltenango Guatemala mao ang ika-136 nga templo sa tibuok kalibutan ug ikalima sa Central America. Kini nga templo moserbisyo sa gibana-bana nga 60,000 ka mga Santos sa Ulahing mga Adlaw.

Ang Simbahan nag-Ground Breaking alang sa Ikapito nga Templo sa Brazil

Niadtong Nobyembre 15, 2011, si Elder David A. Bednar sa Korum sa Napulog Duha ka mga Apostoles nangulo sa seremonya sa groundbreaking alang sa Templo sa Fortaleza Brazil, ang ikapito nga templo sa Simbahan sa Brazil.

“Kini nga templo mamahimo nga tinubdan sa paglaum, kahayag, ug hugot nga pagtuo sa Dios alang sa tanan nga moanhi ug magalakaw dinhi ug niini nga hawan,” si Elder Bednar miingon. “Kini nga siyudad kanunay nga mas mamaayo ug lahi tungod sa templo nga tukuron dinhi.”

Ang templo tukuron sa Avenida Santos Dumont sa Fortaleza, Ceará, Brazil. Si Presidente Thomas S. Monson mipahibalo sa pagtukod sa Templo sa Fortaleza Brazil atol sa Oktubre 2009 nga kinatibuk-ang komperensya.

Ang Templo sa Quetzaltenango Guatemala, nga gipahinungod niadtong Disyembre 11, 2011, ni Presidente Dieter F. Uchtdorf, mao ang ika-136 nga templo.

KREDITO: