Ayaw og Kahagsa
Likayi ang dagkong mga problema pinaagi sa pagsulbad sa gagmayng mga problema karon.
Si Andrei ganahan kaayo og eroplano sukad sa bata pa siya. Samtang daghan ang nagdamgo nga makapalupad og eroplano, ang tumong ni Andrei dili ang makapalupad; ang iyang interes anaa sa pagmintinar. Kining 16 anyos nga gikan sa Romania nag-eskwela aron mahimong mekaniko sa eroplano.
Sa Romania ang mga batan-on makapili nga moeskwela og high school aron mangandam para sa kolehiyo o sa trade school. Tungod kay gusto kaayo ni Andrei ang mga eroplano, ang iyang desisyon sa pag-eskwela sa aviation trade school sayon ra.
Ang mga aircraft mechanic dili lang moayo og guba nga mga eroplano. Usa sa pinakaimportante nga butang nga ilang buhaton mao ang pagsusi ug pagmintinar sa mga eroplano aron kini dili maguba. Kanunay nilang susihon ang tanan sa eroplano, gikan sa palabad hangtud sa mga landing gear ug ang tanang piyesa.
“Lisud pangitaon ang gamayng problema nga makapahagsa sa eroplano,” miingon si Andrei. “Apan ang pagpangita niini mas sayon kaysa pag-assemble pag-usab og tibuok eroplano.”
Ang pagsunod sa regular nga eskedyul sa pagmintinar ug ang dili gyud paglaktaw niini importante kaayo—alang sa mga eroplano ug sa mga miyembro sa Simbahan—aron mahibaloan ug makorihian ang mga problema sa dili pa mabutang sa peligro ang kinabuhi sa mekanikal o espiritwal nga paagi.
Pagmintinar sa Espiritwal
Si Andrei nagpuyo sa Bucharest, usa ka siyudad nga adunay hapit duha ka milyon nga mga tawo. Hinoon, ang Simbahan bag-o pa lang sa Romania, ug adunay igo lang nga mga miyembro sa Bucharest alang sa duha ka branch. Si Andrei ug iyang pamilya nagpuyo layo sa ubang mga miyembro sa ilang branch. Si Andrei nakabati sa pagtintal sa kalibutan palibut kaniya sa eskwelahan ug diha sa iyang mga higala. Siya nasayud kon unsa ka sayon nga mahagsa—naghisgut sa espirituhanon nga paagi—kon dili siya kanunay magmintinar sa espiritwal nga paagi.
Ang kinabuhi mahimong puno sa mga buluhaton [hectic]. Lakip sa panahon nga gigahin ni Andrei sa pagtuon, pagdula og football, ug pag-computer, naggahin siya og panahon sa pag-ampo, pagpuasa, pagtuon sa kasulatan, ug pagtuman sa iyang mga responsibilidad isip priest. Siguraduon usab niya sa “pagtambong” sa seminary, nga iyang buhaton diha sa internet tungod sa kalayo.
Ang pagbuhat niining mga butanga kabahin sa regular nga espirituhanong pag-mintinar nga nakatabang sa pag-ila ug pagkorihir sa mga kahuyang sa dili pa kini mopadulong sa makuyaw nga espirituhanong pagkahagsa.
“Adunay mga butang nga kinahanglang regular ninyong buhaton—himoon nga batasan,” siya miingon. “Ayaw lang pasagdai ang kinabuhi.”
Mga Espirituhanong Pagkahagsa
Si Andrei nakakat-on nga kon kita dili kanunay mobuhat sa espirituhanon nga pagmintinar, ang mga pwersa sama sa stress o pagpamugos sa kaedad makapahuyang sa atong pagbuntog sa tintasyon. Kon kana mahitabo, dili madugay mawala ang atong direksyon, kontrol, ug sa katapusan ang atong espirituhanon nga gahum.
Sama sa eroplano nga mapalyar mahagsa sa hinay-hinay, kon kita makasala, mawala ang atong espirituhanong gahum ug mahagsa sa hinay-hinay, mapalayo ang atong kaugalingon sa langit ug sa dili madugay espirituhanon nga mahagsa.
Samtang posible nga ang Pag-ula sa Manluluwas makapabalik kanato pag-usab human nga kita mahagsa, mas maayo nga mosalig sa Iyang gahum sa pagtabang kanato sa pagsulbad sa problema samtang gamay pa—sa dili pa kini mahimong hinungdan sa espirituhanong pagkadaut.
Ang Kakuyaw sa Paglaktaw
Wala gayud maghunahuna si Andrei sa paglaktaw sa mekanikal nga pagmintinar sa eroplano. Ang paglaktaw dili opsyon. “Adunay mga balaod kabahin niana,” siya miingon. Apan kon iyang buhaton nga molaktaw bisan—kausa lang—iyang giangkon nga “siguro wala ray dautang mahitabo.”
Tingali ang pinakadako nga problema sa paglaktaw dili nga ang eroplano mahagsa diha-diha dayon apan dili dayon makita ang resulta sa paglaktaw. “Kon walay dautang mahitabo kon molaktaw karon, mas dali kong matintal nga molaktaw ugma,” siya miingon.
Kon kanunay nga laktawan ang pagmintinar, ang pwersa ug mga stress diha sa eroplano—o ngari kanato —maoy hinungdan nga adunay maguba sa dili madugay. “Sa katapusan kita mahagsa,” siya miingon.
Mao kana ang rason nganong ang Ginoo naghatag kanato og mga balaod kabahin sa regular nga espirituhanong pagmintinar. “Magtigum [sa Simbahan] kanunay” (3 Nephi 18:22; emphasis gidugang). Mag-ampo sa kanunay (tan-awa sa 3 Nephi 18:19). Makugihong magsiksik sa kasulatan (tan-awa sa 3 Nephi 23:1–5). “Himoa ang hiyas modayandayan sa inyong mga hunahuna nga walay paghunong” (D&P 121:45; emphasis gidugang). Bisitaha ang templo kanunay.1
Ang pagsunod niadtong mga balaod ug pagbuhat sa regular nga espirituhanong pagmintinar makapadayon kanato sa pagpakabuhi nga ensakto.
“Ang eroplano gihimo aron makalupad, mahilayo sa kalibutan,” miingon si Andrei. “Kini mao ang gusto sa Langitnong Amahan alang kanato. Uban sa regular nga pagmintinar, luwas kita nga makaadto asa nato gusto—balik sa langit.”
Litrato sa eroplano pinaagi sa iStockphoto © Christopher Pattberg; sa tuo: gilitratohan ni Adam C. Olson
Litrato sa pako sa eroplano pinaagi ni Adam C. Olson; litrato sa clipboard pinaagi ni John Luke