Ang mga Panalangin sa Seminary

Abril 2012

Ang mga Panalangin sa Seminary

Ni Brittany Beattie

Mga Magasin sa Simbahan

Sa tibuok kalibutan, ang seminary nagdala sa mga kabatan-onan sama kaninyo paduol kang Jesukristo.

Wala kamo mag-inusara sa inyong desisyon sa pagtambong og seminary. Sa tibuok kalibutan, gatusan ka libo sa mga kabatan-onan naghimo sa seminary nga usa ka bahin sa ilang kinabuhi, moadto sa ilang mga klasrom sakay sa bus, balsa, bisikleta, ug uban pa. Ang ubang kabatan-onan mosayo sa pagmata ug mobiyahe og layo aron makaabut sa eksakto nga oras, ang uban mobiyahe sa gabii, ug sa gihapon ang uban magtuon sa panimalay sulod sa pipila ka adlaw sa semana.

Ang pagtambong og seminary nagkinahanglan og sakripisyo, apan ang mga kabatan-onan sa tibuok kalibutan nakakita nga ang pag-apil sa seminary takus sa matag paningkamot. Ug kadtong miapil adunay butang nga komon kanila: ang ilang kasinatian sa seminary nagdala kanila paduol sa Manluluwas ug sa atong Langitnong Amahan.

Pagdawat sa Gisaad nga mga Panalangin

Ngano nga ang seminary importante man kaayo kaninyo? Pipila ka mga rason naglakip niini nga mga saad gikan sa ulahing adlaw nga mga propeta ug mga apostoles:

Kini nahimo nga panalangin gikan sa Dios alang sa kaluwasan sa modernong Israel sa labihan ka malisud nga panahon sa kalibutan.”¹
Kini “motudlo kaninyo sa pagpresentar sa mensahe sa gipahiuli nga ebanghelyo ngadto sa inyong ikahimamat.²
Kini makatabang kaninyo “nga makaangkon og mahinungdanon nga panabut sa kamatuoran.”³
Ang seminary “naghatag og maanindot nga mga oportunidad sa pagkat-on sa mga doktrina nga makahimo kaninyong malipayon. Naghatag kini og maanindot nga mga oportunidad sa pagpakig-uban sa mga tawo nga sama kaninyo og tinuohan.”⁴
“Ang inyong kahibalo sa ebanghelyo molambo. Ang inyong pagtuo malig-on. Makapalambo kamo og talagsaong mga pakig-uban ug pakighigala.”⁵
“Kini mosangput sa … espirituhanong kabuhong, moral nga kalig-on sa pagbatok sa dautan nga nagpalibut kanato, ingon man sa paspas nga paglambo sa kahibalo sa ebanghelyo.”⁶
Kini “usa sa pinakamaayong preparasyon alang sa misyon.”⁷

Pagpangita og Paagi nga Makatambong

Ang pag-adto sa seminary sa kasagaran nagpasabut nga kinahanglan nimong biyaan ang bisan unsa nga inyong gikalingawan nga buhaton aron makahigayon sa pagtambong. Apan usa kini ka sakripisyo nga angayang himoon. Si Elijah Bugayong nga taga-Pilipinas mipili niana nga desisyon sa katapusang tuig sa iyang pagka-high school. Sa Iyang pagka-high school, kanunay siyang ikaduha sa iyang klase. Determinado siya nga mahimong una sa iyang katapusang tuig sa high school ug gani iyang gikonsiderar nga dili mo-enrol sa seminary, nga iyang natambungan sa milabay nga mga tuig, aron makab-ot ang iyang tumong.

Apan usa ka adlaw nausab ang iyang hunahuna. “Akong [gitan-aw] ang akong lamesa nga tun-anan,” miingon siya. “Akong nakita ang tipun-og sa mga libro duol niini, ang akong quadruple combination kauban sa akong notebook sa seminary ug manwal. Sa kinahiladman nangutana ko sa kaugalingon, ‘Asa ang pinakaimportante?’”

Nakita ni Elijah ang tubag alang kaniya diha sa Mateo 6:33: “Apan maoy unaha ninyo pagpangita ang gingharian ug ang pagkamatarung gikan sa Dios, ug unya kining tanang mga butanga igadugang ra kaninyo.” Nakahukom siya nga magmatinud-anon sa pagtambong sa seminary ug mangitag laing paagi sa pagbalanse sa iyang oras aron trabahoon ang iyang mga akademik. Sa katapusan sa tuig, nahimo siyang valedictorian ug gani nahimong eskolar sa usa ka unibersidad.

Si Spencer Douglas nga taga-Alabama, USA, nakahukom nga ihunong ang pipila ka sosyal nga mga kalihokan aron makuha niya ang pinakanindot sa seminary. Sa iyang unang duha ka tuig sa seminary, momata siya sa alas 4:00 sa buntag sa pagtambong, ug sa katapusang duha ka tuig momata siya sa alas 5:00 sa buntag. Miingon siya, “Dili ko makaapil sa daghang panggabii nga mga kalihokan uban sa akong mga higala tungod kay gikinahanglan kong matulog og sayo. Kay kon dili, dili ko makaapil og tarung ug makakat-on inig ka ugma.” Alang kang Spencer, dili lamang kini usa ka pagtungha sa klase, mahitungod usab kini sa pagmata ug pagkaandam nga makakat-on.

Si Elder Dallin H. Oaks sa Korum sa Napulog Duha ka mga Apostoles mitudlo: “Nga tungod lamang kay ang usa ka butang maayo kini dili igo nga rason sa pagbuhat niini. Ang gidaghanon sa maayong mga butang nga atong mahimo misubra kaayo sa panahon nga magamit sa pagbuhat niini. Ang pipila sa mga butang mas maayo kay sa maayo, ug kini mao ang mga butang nga kinahanglan nga unang hatagan og pagtagad sa atong mga kinabuhi.”⁸ Kana usa ka tambag nga importanting hinumduman samtang modesisyon kamo nga himoong prayoridad ang seminary sa inyong iskedyul.

Pagapangandam alang sa mga Misyon

Ang seminary nagsilbi usab nga usa ka talagsaong pagpangandam alang sa misyonaryo nga buhat nga inyong buhaton—isip miyembro nga misyonaryo karon ug ingon man kon kamo magserbisyo isip full-time nga mga misyonaryo sa umaabut. Si Franco Huamán Curinuqui nga taga-Peru nahibalo nga ang iyang pagtuon sa kasulatan sa seminary nakatabang sa iyang pagpangandam sa misyon.

Miingon siya nga kini nga pagpangandam takus alang sa pagbangon kada alas 4:00 sa buntag, nga mosakay og mga balsa kon ang mga bulan nga tingbaha moigo sa dapit, ug dayon moubog agi sa lapok aron makaabut sa klase. Miingon siya, “gusto nakong humanon ang seminary ug sugdan ang mga klase sa institute aron maandam alang sa misyon. Padayon ako nga maglambo sa Simbahan.” Ang seminary importante alang kaniya tungod kay nakakat-on siya mahitungod sa mga kasulatan ug nakamemorya og importanting mga bersikulo, nga makatabang kaniya sa pagkahimong mas maayong misyonaryo.

Napanalanginan sa Tanang Aspeto sa Kinabuhi

Samtang ang mga kabatan-onan sa tibuok kalibutan naningkamot sa pagtambong sa seminary, nakadawat sila og kalig-on labaw pa kay sa pagtuon sa kasulatan. Si Cameron Lisney nga taga-England nakakita nga napanalanginan siya sa tanang aspeto sa iyang kinabuhi. “Ang seminary wala lamang makatabang sa espirituhanon nga habig sa mga butang, apan nakatabang usab kini sa pag-eskwela ug sa edukasyon,” miingon si Cameron.

Miingon siya nga “ang sayo nga pagsugod sa adlaw makapasugod sa inyong utok sa paglihok. Pipila sa akong mga higala miingon nga busy ra kaayo sila aron makatambong—nan, dili man siguro ka magribyu og math sa alas 6:00 sa buntag, di ba?” Samtang magtuon kamo, “ang Ginoo motabang kaninyo sa inyong mga eksamin, ug kon moadto kamo sa seminary, Siya mas motabang kaninyo,” miingon si Cameron.

Dayag lang, ang seminary nakatabang usab kang Cameron nga malig-on ang iyang pagpamatuod. Miingon siya, “Ang sinugdanan sa akong pagpamatuod naggikan sa programa sa seminary. Sa batan-ong edad nga 14, naglisud gayud ako sa ebanghelyo. Wala ko malingaw sa simbahan, ug mibuhat sa mga butang nga dili nako angayang buhaton. Mga pipila na lamang kadto ka bulan sa dili pa mahingpit ang akong paghunong.” Apan dihang ang usa ka higala midapit kang Cameron sa pagtambong sa seminary, mihukom siya nga mokuyog kaniya. Dayon ang mga panalangin sa tinuod nagsugod sa pagpangabut.

“Misugod na usab ako nga mobati sa Espiritu,” miingon si Cameron. “Misugod ko sa paghatag og atensyon sa simbahan ug mitambong sa akong Sunday School ug mga leksyon sa priesthood. Mas nagkasayon kini, ug misugod ako sa pagkamalipayon. Sa katapusan nakabaton ako og pagpamatuod sa ebanhelyo alang sa akong kaugalingon.” Human sa duha ka bulan sa seminary, si Cameron nakigkita sa iyang bishop ug gi-orden nga teacher sa Aaronic Priesthood.

Si Cameron nahibalo nga ang seminary nakatabang kaniya nga mobarug nga lig-on batok sa mga tintasyon sa kalibutan. “Samtang nagpadayon ang seminary,” miingon siya, “Akong nakita nga mas sayon ang pag-atubang sa mga hagit nga gihatag sa kalibutan. Ingon og lisud ang pagkabatan-on sa kalibutan nga atong gipuy-an—ang sala anaa nagpalibut kanato sa matag dapit. Akong ipamatuod kaninyo nga kon motambong kamo og seminary, inyong makaplagan ang kalig-on sa pagpanalipod sa inyong kaugalingon batok niini. Ang seminary nagmugna og espirituhanon nga panagang nga mopanalipod kaninyo. Daghang managlahi nga pagsulay ug mga tintasyon ang miabut sa akong dalan, ug ang seminary dako kaayo nga tabang aron ako anaa kanunay sa higpit ug pig-ot nga dalan.”

Paglig-on sa Usag usa

Ang seminary nagtugot usab kaninyo nga makauban ang mga batan-on kinsa susama ninyo og mga gituohan. Si Vika Chelyshkova nga taga-Russia miingon, “nadasig ako sa managsama og hunahuna nga mga tawo kinsa naghupot og susama nga moral nga mga sumbanan ug kinsa susama nako nga nagatuo sa Dios.” Midugang siya, “Kon duna man koy mga pangutana, makahisgot ako niini uban sa akong magtutudlo sa seminary ug ubang mga estudyante. Akong ikapakigbahin ang akong mga hunahuna ug pagpamatuod ngadto sa uban sa paglig-on sa kaugalingon nakong pagtuo ug sa pagtuo sa uban. Pinaagi sa among pagbasa sa mga kasulatan ug pagpamalandong sa espirituhanong mga sulod niini, mas naduol kami sa Dios ug sa usag usa.”

Si Ksenia Goncharova nga taga-Ukraine nakakita og susama nga mga resulta. Miingon siya, “Kon among ipakigbahin ang among mga kasinatian sa usag usa, mas malig-on kami ug mas makasabut sa mga kasulatan. Kon maghisgot man kami mahitungod sa mga ehemplo gikan sa among kinabuhi atol sa mga leksyon, akong makita kon giunsa sa paglihok sa ebanghelyo dinhi sa akong kinabuhi ug sa kinabuhi sa uban.”

Pagkaila sa Langitnong Amahan ug kang Jesukristo

Usa ka pundok sa kabatan-onan bag-ohay lang nga gipangutana kon sa unsang paagi ang seminary mipanalangin kanila. Ang ilang mga tubag nagpadayag og mahinungdanon nga tema—nga ang seminary naghimo kanilang maduol sa Langitnong Amahan ug sa Manluluwas. Si Elder David A. Bednar sa Korum sa Napulog Duha ka mga Apostoles mitudlo: “Ang tanang hilisgutan nga inyong gitun-an sa seminary mga importante. Sa matag tuig samtang mag-focus sa usa sa mga volume sa kasulatan, ang pinakasentro nga tumong mao ang Ginoo nga si Jesukristo.”⁹

Ania ang gipangsulti sa pipila ka mga batan-on kon sa unsang paagi ang seminary midala kanila paduol kang Jesukristo.

“Akong nakat-unan kon unsa ang gihimo sa Manluluwas alang kanako, gumikan sa pagbasa sa tanan niini nga mga asoy gikan sa daghang mga propeta ug sa pagkahibalo kon unsa ako kaimportante ngadto Kaniya. Akong naamguhan nga hilabihan ang Iyang paghigugma kanako nga magpakamatay ug mag-antus alang sa akong kasakit.”
“Ang seminary mao ang maayo kaayong paagi sa pagsugod sa akong adlaw. Bisan unsa ako kakapoy, akong mabatyagan ang Espiritu ug mobati nga nalig-on mao nga kon ang lisud nga mga butang moabut sa akong adlaw, nahibalo ako sa walay pagduha-duha nga ang Manluluwas nahigugma kanako, ug mas masaligon ako nga mobarug sa unsay husto.”
“Usa ako ka kinabig sa Simbahan. Nagsugod ako sa pagkuha og seminary bisan sa wala pa ko mabunyagi. Kon wala ang seminary, ambot lang kon mabunyagan ba kaha ko. Kon wala ang seminary, wala ang Manluluwas sa akong kinabuhi karon o dili ko mahibalo nga ako mapasaylo sa akong mga sala. Wala gayud sa akong kinabuhi ang Langitnong Amahan o si Jesukristo. Ang seminary nakatabang kanako nga makakaplag Kanila ug naghimo Kanila nga mahangturong bahin sa akong kinabuhi ug sa kinabuhi sa umaabut nakong mga anak.”
“Ang pag-adto sa seminary matag adlaw nakatabang nga ako maduol sa akong Ginoo ug Manluluwas, nga si Jesukristo, pinaagi sa pagkat-on mahitungod sa Iyang mga pagtulun-an, sa Iyang dakong gugma kanako, ug kon unsaon nga makabalik ko sa pagpuyo uban Kaniya.”
“Kon anaa ko sa seminary, akong makita ang mas lawom nga kahulugan sa mga kasulatan. Nakatabang kini nga mapahinumduman ako sa matag buntag sa pagkahimong sama kang Kristo sa inadlaw nakong mga buhat.”
“Ang seminary nagtudlo kanako kon unsaon sa pagbasa sa mga kasulatan ug dili lamang aron malingaw niini apan usab sa paggamit sa akong nabasahan diha sa akong kinabuhi. Nakakat-on ako og mga doktrina ug mga baruganan nga nakatabang sa paglig-on sa akong pagpamatuod sa usa ka mahigugmaon nga Langitnong Amahan ug kang Jesukristo, diin kini akong pagadalhon hangtud sa katapusan sa akong kinabuhi.”

Uban sa daghan kaayong panalangin nga miabut gumikan sa pagtambong og seminary, dali rang makita nganong ang mga batan-on sa tibuok kalibutan naghimo niini nga prayoridad sa ilang mga iskedyul.

Usa ka Panalangin nga adunay Tibuok Kinabuhi nga mga Epekto

“Daghang tuig na ang milabay duna koy pribilehiyo nga makatudlo sa sayo sa buntag nga seminary. Ang klase gihimo sa 6:30 ngadto sa alas 7:30 sa buntag sa matag adlaw. Sulod sa duha ka tuig akong nabantayan ang nanagduka pa nga mga estudyante nga mosulod sa klase, naghagit sa ilang magtutudlo sa pagpamata kanila. Human mahatag ang pag-ampo ug ang inspirasyonal nga panultihon, akong nabantayan ang utokan nga mga panghunahuna nga nalagsik aron sa pagpalambo sa ilang kahibalo sa mga kasulatan. Ang pinakalisud nga bahin sa klase mao ang pagtapos sa panaghisgot sa eksaktong oras aron paadtoon sila sa regular nila nga mga klase. Samtang nagpadayon ang tuig nga ting-eskwela, akong nabantayan ang matag estudyante nga nakaangkon og mas dakong pagsalig, mas suod nga relasyon, ug nagtubo nga pagpamatuod sa ebanghelyo.

“Pipila ka tuig na ang milabay didto ko sa grocery store sa usa ka siyudad dili layo gikan dinhi dihang nakadungog ko nga may mitawag sa akong ngalan. Milingi ko sa pagtimbaya sa duha sa akong kanhi estudyante sa seminary. Managtiayon na sila karon. Ilang gipaila kanako ang upat nila ka matahum nga mga anak. Sa among panag-istorya natingala ko sa gidaghanon sa ilang mga kaklase sa seminary nga makontak gihapon nila human sa daghang katuigan. Usa kadto ka ebidensya sa espesyal nga panagsuod nga nahitabo niadtong sayo sa buntag nga klase sa seminary.”

Elder L. Tom Perry sa Korum sa Napulog Duha ka mga Apostoles, “Receive Truth,” Ensign, Nob. 1997, 62.

Ang Seminary Miimpluwensya sa Kinabuhi ni Presidente Henry B. Eyring

Si Mildred Bennion usa sa unang mga estudyante sa klase sa seminary sa Granite Seminary niadtong 1912. Sa wala madugay nahimo siyang mama ni Presidente Henry B. Eyring, Unang Magtatambag sa Unang Kapangulohan.

Iyang nasabtan ang kaimportante sa seminary sa iyang kinabuhi, ug gusto niya nga ang iyang mga anak makadawat sa samang mga panalangin nga iyang gibati gikan sa seminary, busa ang iyang pamilya mihimo og dakong desisyon: “Mibalhin kami sa Utah bisan pa sa dakong sakripisyo sa pinansyal aron ang among anak nga mga lalaki makatambong sa Seminary ug Institute ug makakaplag og mga higala tali sa kaugalingon namong mga katawhan. Kana makatubag sa pangutana kabahin sa akong mga pagbati mahitungod sa ingon niana nga mga butang” (gikutlo sa C. Coleman, History of Granite Seminary, 142).

Ang kaimportante sa edukasyon sa Simbahan nagpadayon sa pamilyang Eyring samtang si Presidente Henry B. Eyring niadtong 1971 nahimong presidente sa Ricks College (karon BYU–Idaho), usa ka kolehiyo nga gipanag-iya sa Simbahan, ug miserbisyo isip Commissioner sa Edukasyon sa Simbahan gikan 1980 hangtud sa 1985 ug usab gikan sa 1992 hangtud sa 2005.

Ang Kasaysayan sa Seminary

Ania ang pagtan-aw kon sa unsang paagi milambo ang seminary sulod sa mga katuigan.

1888: Si Presidente Wilford Woodruff midumala sa pagporma sa Church Board of Education sa pagdumala sa pang-edukasyon nga mga paningkamot sa Simbahan, lakip sa mga klase sa relihiyon matag human sa klase sa eskwelahan.

1912: Pag-organisar sa unang daily released-time nga mga pagklase sa seminary, misumada og 70 ka mga estudyante kinsa mobiya sa high school sa usa ka klasehan aron sa pagtambong og seminary. Ang mga klase gitudlo atbang sa Granite High School sa Siyudad sa Salt Lake, Utah, USA.

1925: Ang nag-enrol miabut og 10,000 ka mga estudyante.

1948: Naa na sa Canada, ang unang nasud sa gawas sa Estados Unidos nga dunay seminary.

1950: Pag-organisar sa mga klase sa daily seminary (kaniadto gitawag og “early-morning nga seminary”) sa California, diin ang mga estudyante magklase sa mga meetinghouse sa Simbahan sa dili pa magklase sa eskwelahan.

1958: Ang nag-enrol miabut og 50,000 ka mga estudyante.

1958: Naa na sa Central America, unang gipaila sa Mexico.

1962: Naa na sa Europe, unang gipaila sa Finland ug Germany.

1963: Naa na sa Asia, unang gipaila sa Japan.

1965: Ang nag-enrol miabut og 100,000 ka mga estudyante.

1967: Pagsugod sa home-study nga seminary sa lagyo nga mga komunidad, diin ang mga estudyante magtuon diha ra sa panimalay upat ka adlaw sa usa ka semana ug magkita kausa sa matag semana.

1968: Naa na sa Australia.

1969: Naa na sa South America, unang gipaila sa Brazil.

1972: Naa na sa Africa, unang gipaila sa South Africa.

1983: Ang nag-enrol miabut og 200,000 ka mga estudyante.

1991: Ang nag-enrol miabut og 300,000 ka mga estudyante.

2012: Naa na sa 134 ka mga nasud ug mga teritoryo sa tibuok kalibutan, nga adunay mga 370,000 ka mga estudyante nga nag-enrol.

Paghulagway sa litrato sa maayong kabubut-on sa CES; mga paghulagway pinaagi ni Scott Greer

Paghulagway sa litrato pinaagi ni Christina Smith

Tuo: litrato sa Provo, Utah, mga mi-graduate sa seminary sa maayong kabubut-on sa LDS Church Archives