“Nganong kinahanglan ko nga motambong sa seminary nga mahimo ra man kong magtuon sa kasulatan nga ako-ako lang?”

Sa tibuok nimo nga kinabuhi mahimo kang magtuon sa kasulatan nga ikaw-ikaw lang, mao nga kon kini anaa, pahimusli karon ang oportunidad sa pagtuon sa mga kasulatan diha sa seminary uban ang hanas nga mga magtutudlo ug mga higala.

Ang pagkat-on ug pagtuon gikan sa maayong magtutudlo makatabang kanimo nga makakat-on og bag-ong ideya kabahin sa mga kasulatan nga wala kaayo nimo masabti sa una. Ang magtutudlo mahimong mopakigbahin usab og mga pagtulun-an gikan sa mga propeta ug ubang mga lider sa Simbahan nga naghatag kanimo og mas maayong pagsabut sa kasulatan.

Dugang pa, sa kasagaran mas makalingaw nga magkat-on uban sa inyong klase. Ikaw adunay kahigayunan sa paghisgot sa mga butang nga imong nadiskobrehan samtang nagbasa. Ang imong mga kaklase mahimong adunay mga kasinatian nga nakapahimo sa partikular nga mga kasulatan nga ilang paborito. Ang pagkadungog sa ilang mga kasinatian makahatag og kahulugan sa kasulatan alang kanimo. Ug tungod kay nagtuon ka sa ebanghelyo nga adunay mga kauban, makatagamtam ka niining gisaad nga mga panalangin: “Diin duha o tulo nagpundok nga naghiusa diha sa akong ngalan, … Ako anaa diha sa taliwala kanila” (D&P 6:32).

Ang seminary makahan-ay usab sa imong pagtuon. Ikaw madasig sa pagbasa sa usa ka partikular nga gipas-pason, nga makatabang kanimo nga mahuman og basa ang matag kasulatan. Ikaw adunay oportunidad sa paghisgut ug pagmemorya sa mga bersikulo alang sa pagkahanas sa kasulatan. Mas sigurado nga makakat-on ka og daghan sa kasulatan pinaagi sa pagtambong sa seminary kaysa bisan unsang pamaagi niining higayona sa imong kinabuhi.

Bag-ong mga Higala, Bag-ong mga Ideya

Sa seminary makahimamat ka og bag-ong mga higala, ug kamo magkasuod sa usag-usa, sama sa usa ka pamilya. Ikaw makakat-on og daghang bag-o nga mga butang nga dili nimo mahibaloan kon ikaw-ikaw lang. Kini makalingaw ug espiritwal kaayo. Kini makasigurado kanimo nga ang imong adlaw magsugod nga sakto. Kon wala ka moapil karon, sugdi ug kini makausab sa imong kinabuhi.

Katarina B., 16 anyos, California, USA

Kalipay

Ang seminary maoy sinugdanan sa akong adlaw. Kini nakapahimo kanako nga mas malipayon nga tawo ug mas andam nga mohisgut sa ebanghelyo ngadto sa ubang mga tawo. Mas lalum ang among panaghisgutan sa kasulatan, mao nga mas nakasabut ko.

Madi S., 15 anyos, Colorado, USA

Hingpit nga Kombinasyon

Ang seminary makapabayaw nga kasinatian. Usahay ang pagtuon nga ikaw-ikaw lang dili paigo. Ang personal nga pagtuon ug seminary mao ang hingpit nga kombinasyon. Hanas kaayo ang mga magtutudlo, ug kon ikaw adunay mga pangutana, ang imong mga magtutudlo ug kaklase makatabang kanimo sa pagtubag niini.

Dawson D., 15 anyos, Idaho, USA

Mas Lig-ong Pagpamatuod

Una, ang Ginoo miingon nga kon duha o tulo ka tawo magpundok diha sa Iyang ngalan, Siya maanaa kanila (tan-awa sa Mateo 18:20; D&P 6:32). Ang pagbati sa Iyang Espiritu makatabang kanato sa pagpamalandong sa Iyang mga nahimo alang kanato. Ikaduha, kon magtuon sa mga kasulatan nga adunay mga kauban, kita mas makasabut kon unsa ang nasulat. Samtang maminaw sa usag usa, kita makadungog og usa ka butang nga wala nato mismo mabantayi, ug susama usab ang mahitabo sa uban kon kita mopakigbahin sa atong kahibalo. Ikatulo, kon ako motambong sa seminary, ang akong pagpamatuod malig-on. Ang seminary mao ang usa ka oportunidad nga mopakigbahin sa atong mga pagpamatuod ug maminaw sa pagpamatuod sa uban. Kini makatabang kanato nga magpabilin sa saktong dalan.

Dmitri G.,16 anyos, Dnipropetrovs’k, Ukraine

Pagkat-on gikan sa Uban

Kinahanglanon gayud alang kanako ang pagtambong sa seminary. Dili lang ang akong mapahinunguron nga magtutudlo motudlo ug mopasabut sa mga kamatuoran nga makita sa kasulatan, nakakat-on usab ko og daghan gikan sa among diskusyon sa klase. Ang ubang mga estudyante mopakigbahin sa ilang mga kasinatian sa mga butang nga ilang nakat-unan, ug sila nakatabang kanako nga makabaton og daghang kahibalo sa ebanghelyo ug sa Manluluwas ug sa Iyang Pag-ula. Dili paigo nga ako-ako lang magtuon, tungod kay ako nakakaplag og mga tubag sa akong mga problema sa mga diskusyon diha sa klase. Makapamatuod ko nga ang seminary adunay mahinungdanon nga bahin sa pagpalambo sa akong pagpamatuod sa tinuod nga Simbahan ni Jesukristo.

Denzel J., 15 anyos, Western Samoa

Mas Daghang Masabtan

Kon mag-inusara ko og tuon sa balaan nga kasulatan, dili kaayo ko malingaw kaysa magtuon nga adunay mga kauban. Dugang pa, kita makakat-on og makapainteres nga mga ideya sa uban kon kita dungan nga magtuon sa kasulatan. Pinaagi sa seminary nakakat-on ko og daghang makapainteres nga mga istorya, ug mas nakahibalo ko sa background sa kasulatan, nga nakapahimo sa pagtuon nga mas kulbahinam! Nalipay ko nga midesisyon sa pag-apil sa seminary.

Rebecca M., 16 anyos, Schleswig-Holstein, Germany

Kahayag ug Kamatuoran

Kon motambong ko sa seminary, nagtinguha ko sa kahayag ug kamatuoran ug nagsul-ub sa tibuok taming sa Dios (tan-awa sa D&P 27:15–18). Kana nga taming nakatabang kanako sa pag-ila sa Iyang tingog sa tanang panahon ug dapit. Ang pagbasa sa kasulatan matag adlaw naglig-on sa akong pagtuo ug pagpamatuod ug nagtabang kanako nga magmalig-on sa akong mga pagsulay. Ang pagtambong sa seminary mao ang usa sa labing maayo nga paagi sa pagkakaplag og kahayag ug kamatuoran ug sa pagtuon sa kasulatan ug pagpamalandong.

Nohemi M., 17 anyos, Puebla, Mexico

Tulo ka Rason

Una, tungod kay gusto ko nga magmisyon, nagtambong ko og seminary. Ang mga misyonaryo kinahanglan mobangon og sayo ug magtuon sa ebanghelyo sa buntag. Ang pagtambong sa seminary nakatabang kanako nga mapalambo ang maayong batasan sa pagmata og sayo. Ikaduha, sa buntag, tin-aw ang atong panghunahuna, mao nga maka-concentrate kita sa atong pagkat-on ug pagtuon. Malaamon nga gamiton ang atong labing maayo nga oras sa adlaw sa pagkat-on kabahin sa Dios. Ikatulo, kon ako-ako lang ang magtuon, mahimong dili ko makasabut ingon kalalum sa akong magtutudlo. Uban sa iyang paggiya ug pagtudlo, mas daghan kong makat-unan kaysa ako-ako lang.

H. Chen Yuan, 16 anyos, T’ai-chung, Taiwan