Pagtulun-an human sa usa ka Pagtulun-an
2 Timoteo 3:16–17
Si Apostol Pablo mitudlo sa unsang paagi nga ang mga kasulatan nakapanalangin sa atong kinabuhi.
16 Ang tibuok nga kasulatan gituga sa Dios, ug may kapuslanan alang sa pagpanudlo, alang sa pagpamadlong, alang sa pagpanul-id, alang sa pagmatoto sa pagkamatarung:
17 Aron ang tawo sa Dios mamahingpit, masinangkapan alang sa tanang maayong buluhaton.
Tibuok nga Kasulatan
“Kon kita gustong makigsulti sa Dios, mag-ampo kita. Ug kon kita gusto nga Siya makigsulti kanato, mosiksik kita sa mga kasulatan; kay ang Iyang mga pulong gisulti pinaagi sa Iyang mga propeta. Unya siya dayon motudlo kanato samtang kita maminaw sa mga pag-aghat sa Balaang Espiritu.
“Kon kamo wala makadungog sa Iyang tingog nga misulti karong bag-o pa, balik ngadto sa mga kasulatan nga morag primero pang nakakita ug primero pang nakadungog. Sila mao ang atong espiritwal nga sumpay sa atong kinabuhi.”
Elder Robert D. Hales sa Korum sa Napulog Duha ka mga Apostoles, “Balaan nga mga Kasulatan: Ang Gahum sa Dios alang sa Atong Kaluwasan,” Liahona, Nob. 2006, 26–27.
Doktrina
“Ang tinuod nga doktrina, unya nasabtan, mopausab sa mga kinaiya ug pamatasan. Ang pagtuon sa mga doktrina sa ebanghelyo mas dali nga makapalambo sa pamatasan kay sa pagtuon bahin sa pamatasan aron mapalambo kini.”
Presidente Boyd K. Packer, Presidente sa Korum sa Napulog Duha ka mga Apostoles, “Ayaw Kahadlok,” Liahona, Mayo 2004, 79.
Pagpamadlong
Pagpamadlong—pag-dili, pagpanton, o pagpangasaba, o pagkorihir, kasagaran sa mabinationg paagi.
Pagpanul-id
Ang orihinal nga pulong sa Griyego nga gigamit sa Biblia literal nga nagpasabut “sa pagpatarung.” Busa ang kasulatan makatabang sa pagtul-id kaninyo ug pagsubay sa higpit ug pig-ot nga dalan (tan-awa sa 2 Nephi 9:41).
Masinangkapan
Masinangkapan—giandam, gihatagan.
Maayong Buluhaton
Unsa nga mga matang sa maayong buhat nga ang mga kasulatan nagtabang kaninyo nga buhaton? Ania ang pipila nga mas klaro. Makahunahuna pa kamo og dugang? Isulat kini sa inyong journal.
-
Pagserbisyo isip full-time nga misyonaryo
-
Pagtuman sa mga calling sa Simbahan (sama sa kapangulohan sa korum ug klase)
-
Pagtudlo sa ebanghelyo
-
Pagpamatuod
-
Pagpakigbahin sa ebanghelyo
-
Pagtubag sa mga pangutana sa mga higala kabahin sa Simbahan
Painting pinaagi ni Paul Mann © 2002 IRI