Mga Ideya sa Family Home Evening

Kini nga isyu naglangkob og mga artikulo ug mga kalihokan nga mahimong magamit alang sa family home evening. Ang mosunod mao ang duha ka mga ehemplo.

“Ang mga panalangin sa Seminary,” pahina 20: Ribyuha daan ang artikulo ug hukmi kon unsa ang pinakamaayo nga paggamit niini nga mensahe sa inyong pamilya. Kon kamo dunay mga tin-edyer sa seminary, sugdi pinaagi sa pagpangutana kanila kon nganong ang seminary importante kanila. Dayon basaha ang seksyon nga gitawag og “Pagdawat sa Gisaad nga mga Panalangin.” Awhaga ang mas gagmayng mga bata sa pagpangandam nga motambong sa seminary kon sila modako na. Kon kamo walay batan-on nga nanag-edad para sa seminary, mahimo kamong mobasa sa artikulo ug dayon maghisgot sa kaimportante sa seminary alang sa mga kabatan-onan karon.

“Ang Tanan Nakaila kang Bleck,” pahina 42: Hunahunaa ang pagpanganta sa “Buhata Unsa ang Matarung” (Mga Himno ug mga Awit sa mga Bata, nu. 34) isip pangbukas nga awit. Basaha o i-summarize ang istorya mahitungod ni Bleck. Hangyoa ang sakop sa pamilya sa pagpakigbahin og usa ka kasinatian dihang kinahanglan sila nga mohimo og lisud nga desisyon tali sa magkalahi nga dalan ug unsa ang mga sangputanan nga miabut gumikan sa desisyon nga ilang gihimo. Tapusa pinaagi sa pagbasa sa kutlo gikan ni Presidente Thomas S. Monson.

Simpli, Kalma, ug Dili Makalimtan

Dili kadto makalimtan nga family home evening uban sa duha namo ka gagmayng anak nga babaye, si Angélique, edad 6, ug Béthanie, edad 4. Ako ug ang akong bana dili makabarug sa among gilingkuran, sa kakapoy, ug wala mahibalo asa kami magsugod. Mao nga ang among mga anak nga babaye ang misugod ug mihimo sa family home evening assignment wheel, mihatag og buluhaton namong matag usa. Ang akong bana ang mo-conduct, si Béthanie sa musika, ako sa mga kalihokan, ug si Angélique mohatag og leksyon.

Gipili ni Béthanie ang “Gusto ko nga Makita ang Templo” (Songbook sa mga Bata, 99), ug kini among gikanta. Si Papa ang mihatag sa pangbukas nga pag-ampo. Dayon si Angélique mikuha sa pinakabag-o nga isyu sa Liahona ug mipili og artikulo sa seksyon alang sa mga bata. Nagkat-on siya sa pagbasa sa iyang eskwelahan, mao nga gibasa niya ang artikulo ngari kanamo. Ang pagbati sa among panimalay usa ka pagbati sa kakalma. Ang Espiritu mipamatuod nga ang iyang gibasa matuod.

Nagdula kami, ug ako ang mihatag sa panapos nga pag-ampo. Samtang nag-ampo ko, nagpasalamat gayud ako sa Langitnong Amahan tungod sa Iyang Espiritu ug gugma ug usab sa pagkaangkon og panalangin sa duha ka gagmayng espiritu sa among panimalay. Ang akong bana ug ako nahibalo nga ang among responsibilidad mao ang pag-atiman kanila ug sa pagtudlo kanila sa ebanghelyo. Ang pahimo og family home evening mao ang bahin niana nga sagradong responsibilidad.

Sylvie Poussin, Réunion