Sila si Elder Christofferson, Elder Jensen Nanudlo sa mga Miyembro sa Argentina

Niadtong Sabado, Nobyembre 12, 2011, sila si Elder D. Todd Christofferson sa Korum sa Napulog Duha ka mga Apostoles ug Elder Jay E. Jensen sa Kapangulohan sa Seventy namulong sa mga kabatan-onan, mga young adult, mga lider sa priesthood, mga misyonaryo, ug sa mga miyembro sa Salta, Argentina.

Didto usab mitambong sila si Elder Mervyn B. Arnold, Presidente sa South America South Area; iyang asawa, Devonna; ug si Elder Ruben Spitale, Area Seventy. Ang asawa ni Elder Christofferson, si Kathy, ug ang asawa ni Elder Jensen, si Lona, nanambong usab.

Hapit 1,300 ka mga batan-on ug mga ginikanan ang mitambong sa fireside diin sila si Elder Christofferson ug Elder Jensen namulong. Lain usab nga 10,000 ka mga miyembro sa 70 ka mga stake center sa tibuok Argentina ang nanan-aw sa sibya.

Si Elder Jensen, kinsa kanhiay nga miserbisyo isip Presidente sa Area sa South America South, miingon, “Kon dili kamo makahinumdom og bisan unsa nga akong giingon, gusto kong mahinumdom kamo sa usa ka hugpong sa pulong sa usa ka propeta, Presidente Thomas S. Monson, kinsa akong gipamatuod nga usa ka matuod nga propeta sa Dios. Mao kini ang hugpong sa pulong: ‘Ang mga pagdesisyon modeterminar sa destinasyon.’”

Aduna kitay kabubut-on—ang abilidad ug pribilehiyo sa paghimo og mga desisyon—si Elder Jensen miingon, ug uban niadto nga mga desisyon atong gipili ang atong mga destinasyon.

Giasoy niya ang istorya sa usa ka higala kinsa mipili nga mag-inom ug mo-drive ug naaksidente nga mipatay og duha ka tawo. Iya kining gisukwahi sa iyaha ug sa iyang asawa nga istorya sa pagpili nga dili una magminyo aron makaserbisyo siya og misyon isip batan-ong lalaki.

“Sa [akong pag-uli] nagminyo kami sa templo. Mihimo kami og mga pakigsaad, diin among gibag-o matag semana panahon sa tibuok namong kinabuhi. Mihimo kami og mga desisyon nga mitino sa among destinasyon,” siya miingon.

Misunod si Sister Christofferson, mipaambit sa iyang pagpamatuod mahitungod sa mga panalangin sa paghupot sa mga pakigsaad, ug gitapos ni Elder Christofferson ang miting.

“Ang bugtong butang nga tinuoray ninyong gikinahanglan mao ang gugma ug hugot nga pagtuo,” si Elder Christofferson miingon. “Ang hugot nga pagtuo maoy nagtabang sa among kaminyoon, pamilya, propesyon, [ug] panarbaho.”

Iyang gipasabut nga ang mga sugo naghatag og direksyon sa atong kinabuhi ug nagtabang kanatong makabaton kon unsa gayud ang importante.

Siya dayon mitambag sa mga batan-on ug sa ilang mga ginikanan sa paghimo og pasalig nga mosunod sa tambag nga anaa sa pamphlet nga Alang sa Kalig-on sa mga Kabatan-onan .

“Makalig-on kaayo kini sa inyong mga anak, bisan kon ilang makita ang ilang kaugalingon nga nag-inusara—nahibalo nga ang ilang mga ginikanan nagsunod niining sama nga mga baruganan,” siya miingon.

Gitapos ni Elder Christofferson uban sa ekspresyon sa paghigugma ngadto sa mga miyembro sa Argentina, diin siya miserbisyo og misyon dul-an na sa mga dekada ang milabay.

Samtang didto sa Salta, si Elder Christofferson ug Elder Jensen nakigkita usab sa lokal nga mga misyonaryo ug mga young single adult, diin ilang gipahibalo ang ilang gugma gikan sa mga Kaigsoonan.

Sila si Elder Christofferson ug Elder Jensen namulong sa mga misyonaryo gikan sa Argentina Resistencia Mission sa sayo niadtong Nobyembre 2011.

Imahe pinaagi ni James Dalrymple