Mga Ward Council nga Naglihok
Ang mga Santos sa Ulahing mga Adlaw naggamitan sa mga ward ug sa branch council sa pagpanalangin sa mga nanginahanglan.
Sa pagkagabii niadtong Mayo 22, 2011, taliwala sa kusog nga ugong sa mga siren, usa ka dako kaayong buhawi ang milandig sa kinatung-an sa Joplin, Missouri, USA, nga miguba sa kabalayan ug mga kinabuhi. Ang Joplin First Ward naigo gayud sa buhawi, apan diha-diha dayon si Bishop Chris Hoffman ug ang ward council misugod sa pag-ihap sa mga miyembro sa ward.
“Duna kami plano nga gihan-ay sa pagtubag niini tungod kay nahisgtuan na namo kini nga mga pagpangandam atol sa ward council sa wala pa kini mahitabo,” miingon siya. “Misalig usab kami sa Espiritu aron mahibalo unsay buhaton. Ang mga linya sa kuryente nangahagsa. Ang mga cell phone dili makakontak. Nag-ampo kami ug naminaw alang sa mga tubag, ug miabut kini—kanunay kining moabut. Makalipay kaayo ngari kanako isip bishop ang pagkadungog sa mga miyembro nga miingon, ‘Mao kini ang akong nahimo,’ imbis, ‘Unsay gusto nimong akong buhaton?’”
Ang gibuhat sa Joplin nagpakita sa gahum sa nagkahiusa nga ward council. “Ang miting sa ward council mao ang usa sa pinakaimportante nga mga miting sa Simbahan,” misulat si Elder M. Russell Ballard sa Korum sa Napulog Duha ka mga Apostoles, “tungod kay ang mga korum sa priesthood ug mga lider sa auxiliary makahisgot man ug makaplano uban sa bishopric. … Sa tanan nga council ug mga komite sa Simbahan, nagtuo ko nga ang ward council makahimo og dakong epekto sa pagtabang sa mga anak sa atong Langitnong Amahan.”1
Nagkahiusa sa Gugma ug Hugot nga Pagtuo
Didto sa Puerto Francisco de Orellana, usa ka hilit nga balangay sa kalasangan sa Ecuador, ang mga miyembro dunay lig-on nga higot sa paghigugmaay ug hugot nga pagtuo. Ang binulan nga branch council nagpakita sa ilang pag-amumahay. Ilang giuna sa pag-focus ang mga indibidwal ug mga pamilya, dayon kon sa unsang paagi ang programa makatabang. Nagsunod ra ang mga pagdasig.
Daghang miyembro ang nanginahanglan og tabang sa pagpangita og trabaho. Ang branch council nakakita nga ang mga hagit sa mga miyembro sa kasagaran masulbad diha sa lokal nga lebel. Samtang ang council naghisgot sa panginahanglan sa nag-inusara nga inahan uban sa batan-ong anak nga babaye nga may problema sa panglawas, ang presidente sa Relief Society may nahibaloan nga usa ka trabaho diin ang inahan makatrabaho ug sa gihapon duol ra sa iyang anak.
Ang branch council migamit usab sa mga kapanguhaan sa Simbahan, sama sa mga materyal sa career workshop sa LDS Employment Services.2 Nag-establisar sila og klase nga miyembro sa branch ang nagtudlo, nga mitabang sa laing miyembro sa branch nga makakita og mas maayong trabaho.
Si Ramiro Reyes, unang magtatambag sa kapangulohan sa branch, miingon kabahin sa branch council: “Mga instrumento kita sa kamot sa Ginoo. Makab-ot Niya ang Iyang mga tumong pinaagi sa atong mga buhat.”
Usa ka Agianan Padulong sa Templo
Sa Liverpool, New York, USA, samtang ang presidente sa Primary si Melissa Fisk mitambong sa miting sa ward council, nakaangkon siya og panabut sa gahum niini. Dihang gikuot niya ang iyang bag sa pagkuha og notebook, nakita niya ang litrato sa 28 ka mga bata sa Primary sa hagdanan sa Templo sa Palmyra New York. Ang tanan puno sa pinaakan sa lampinig. Sa mubong higayon, ang litrato nakakuha sa iyang atensyon gikan sa miting, ug mihinumdom siya sa makadiyot niadtong adlaw diin ang Primary sa ward nangadto sa Palmyra aron matagamtam ang sagradong pagbati sa mga nataran sa templo. Subo lang, dihang ang mga bata mibukhad sa ilang mga habol, aksidente nilang natandog ang balay sa mga alampinig.
Dihang naatiman na ang tanan, gidapit sila sa mga lider sa paghikap sa templo. Mibalibad ang mga bata kay nangahadlok sila basin naa pay daghang alampinig. Mao nga ang mga ginikanan ug mga lider namarug nga naglinya ug mihimo og agianan padulong sa templo. Naghatag kini og kaisug sa mga bata sa pagpadayon.
Dihang gipaling ni Melisa ang iyang atensyon ngadto sa miting sa ward council, naghunahuna siya, “Kon ang tanan mapalibutan lamang unta sa ingon ka mapinanggaong mga higala ug mga lider samtang maglambo sila padulong sa templo.”
Nabalda ang iyang paghunahuna dihang nadungog niya ang presidente sa Relief Society nga mikomentaryo sa panginahanglan sa sister: “Wala siya sa simbahan adtong miaging Dominggo. Akong siguroon nga ang iyang mga visiting teacher makapahibalo kaniya mahitungod sa umaabut nga temple trip.”
“Aduna silay gisagubang nga mga kalisud karon,” midugang ang presidente sa elders quorum. “Akong pakigsultihan ang ilang mga home teacher ug tan-awon kon aduna ba kitay mahimo.”
“Ang mga young women makatabang sa pagbantay sa bata,” miingon ang presidente sa Young Women.
Samtang mitan-aw si Melissa sa mga nawong sa mga sakop sa ward council, iyang nakita ang tinuoray nga pagbati ug paghunahuna. Mipahiyom siya og dako. “Ang Ginoo miandam og mga paagi alang sa Iyang mga anak aron mapanalipdan ug mahigugma,” naghunahuna siya. “Ang ward council!”
Sama ra sa Joplin, Puerto Francisco de Orellana, ug Liverpool, ang mga lider sa Simbahan sa tibuok kalibutan nagpadayon sa pagkaplag sa mga panalangin pinaagi sa mga ward ug branch council. Samtang buhaton nila kini, ilang maangkon ang talagsaong gahum niini nga mga council sa pagtabang sa Ginoo nga mopanalangin sa Iyang mga anak ug molampus sa Iyang buhat.
Wala: paghulagway sa litrato pinaagi ni Craig Dimond
Wala: Paghulagway sa litrato pinaagi ni Joshua J. Perkey