Pagkat-on og Dugang Gikan sa Kinatibuk-ang Komperensya

Nila ni Michael Barber ug David Marsh

Departamento sa Kurikulum

Bisan og moingon kita og “amen” sa paghuman sa katapusan nga sesyon sa kinatibuk-ang komperensya, ang espirituhanon nga pagbusog wala matapos didto. Mahimo kining magpadayon samtang magtuon kita ug mogamit sa mga pagtulun-an gikan niana nga komperensya. Sulod sa mga katuigan, ang mga propeta miawhag kanato sa paghimo niana. Sama pananglit, niadtong 1946, si Presidente Harold B. Lee (1899–1973) miawhag sa mga miyembro nga ang mga pakigpulong sa komperensya himoon nga “giya sa ilang inadlaw nga buluhaton ug pagpakig-istorya atol sa sunod nga unom ka bulan.” Mipasabut siya, “Importante kining mga butanga nga nakita sa Ginoo nga haum nga ipadayag sa mga katawhan niining panahona.”¹

Niadtong 1988, si Presidente Ezra Taft Benson (1899–1994) misubli sa tambag dihang gitudlo niya nga, “Sa mosunod nga unom ka bulan, ang inyong komperensya nga edisyon sa Ensign angay nga ibutang tapad sa inyong sumbanan nga mga basahon ug gamiton kanunay.”²

Sa pagtapos sa Oktubre 2008 nga kinatibuk-ang komperensya, si Presidente Thomas S. Monson misubli sa kaimportante sa pagtuon sa mga pakigpulong sa komperensya. Miingon siya: “Unta kanunay natong mahinumduman ang atong mga nadungog atol niining kinatibuk-ang komperensya. Ang mga mensahe nga gihatag maimprinta sa sunod bulan sa Ensign ug sa Liahona nga mga magasin. Ako moawhag kaninyo sa pagtuon ug sa pagpamalandong sa mga pagtulun-an niini.”³

Samtang magtuon ug mamalandong kamo sa mga mensahe sa komperensya, unsa may inyong buhaton sa paghimo niini nga mas makahuluganon sa inyong kinabuhi? Aniay pipila ka sugyot nga makatabang sa inyong pagpangandam, pagdawat, ug paglihok pinasikad sa dinasig nga mga pulong:

Pangandami ang pagdawat og inspirasyon. Magtan-aw man kamo, maminaw, o magbasa sa mga pakigpulong sa komperensya, kinahanglan nga inyong ablihan ang inyong kasingkasing ug hunahuna sa balaan nga inspirasyon. Si Elder David A. Bednar sa Korum sa Napulog Duha ka mga Apostoles mitudlo nga bisan unsa pa ka epektibo ang pagtudlo sa usa ka mamumulong, “ang sulod sa usa ka mensahe ug ang saksi sa Espiritu Santo mosulod lamang ngadto sa kasingkasing kon ang nagdawat motugot niini nga masulod.” Siya mipasabut nga ang pagdawat og inspirasyon “nagkinahanglan sa espirituhanon, mental ug pisikal nga pagpaningkamot ug dili lamang lumalabay nga pagbati.”⁴

Ang mosunod nga mga ideya makatabang kaninyo sa pag-andam nga matudloan sa Espiritu:

Gahini og panahon ug paghimo og usa ka palibut nga walay makabalda diin kamo makadawat og espirituhanong mga pagdasig.
Tinguhaa ang balaanong giya pinaagi sa pag-ampo.
Ilista ang personal nga mga pangutana o kahingawa diin kamo nangita og mga tubag.

Sabta ang mga mensahe. Ang buhing mga propeta ug mga apostoles nagtudlo, nagpasabut, nag-awhag, nagpasidaan, ug nagpamatuod. Ang pagsusi gayud sa ilang mga pakigpulong makatabang sa inyong hingpit nga pagsabut sa ilang mga mensahe. Aniay pipila ka epektibo nga mga pamaagi sa pagtuon:

Mangutana. Sama pananglit: Unsay gusto sa Ginoo nga akong makat-unan gikan niini nga mensahe? Sa unsang paagi kini nga pakigpulong makapalambo sa akong panabut sa baruganan sa ebanghelyo o sa bersikulo sa kasulatan? Unsa nga mga istorya ang gigamit sa paghulagway sa mga baruganan sa ebanghelyo, ug unsay akong makat-unan gikan niini?
Pagsulat og usa ka outline. Hunahunaa og maayo kon unsa kaha ang gi-outline sa mamumulong. Bahina ang pakigpulong ngadto sa mga seksyon ug paghimo og summary nga magpasabut sa pinaka-ideya nga gipresentar sa matag seksyon.
Ilha ang nagkalain-laing mga elemento sa pakigpulong. Timan-i ang mga butang sama sa mga doktrina, mga kasulatan, mga istorya, mga pahimangno, mga lista, mga pagpamatuod, mga pagdapit sa pagbuhat, ug mga panalangin nga gisaad sa pagsunod sa tambag.
Tun-i ang pakigpulong sobra sa kausa. Gikinahanglan ang pagtuon sa mga kamatuoran sa ebanghelyo kapin sa kausa aron makuha ang tibuok nga gipasabut ug kahulugan. Sa matag higayon nga kamo magtuon, paghimo og lista sa bag-ong mga panabut nga inyong nadawat.

Buhata unsay inyong nakat-unan. Kon magmainampoon kamo sa pagtuon sa mga pakigpulong, inyong makita kon sa unsang paagi ang mga mensahe magamit sa inyong kinabuhi. Inyong mahibaloan kon unsaon sa paghimo og makahuluganong mga kausaban pinaagi sa pagpangutana og sama sa Unsay gusto sa Ginoo nga akong buhaton gikan sa akong nakat-unan nga makatabang kanako sa akong pamilya, trabaho, o calling sa Simbahan? Isulat ang mga impresyon aron dili ninyo kini makalimtan. Sa inyong paghimo niini, madasig kamo sa pagsunod sa mga pagtulun-an ug inyong madawat ang gisaad nga mga panalangin.

Ang kinatibuk-ang komperensya mao ang panahon nga ang Ginoo mopadayag sa Iyang kabubut-on nganha kaninyo pinaagi sa Iyang mga sulugoon. Si Presidente Spencer W. Kimball (1895–1985) mitudlo kabahin sa kinatibuk-ang komperensya, “Walay basahon gawas sa mga sumbanan sa Simbahan ang nanginahanglan og importante nga dapit sa inyong librarya—dili tungod sa kamaayo o sa kamadanihon sa pagkasulat niini, apan tungod sa mga konsepto nga nagpunting sa dalan padulong sa kinabuhing dayon.”⁵