Mga Blueberries ug ang Basahon ni Mormon
Suellen S. Weiler, Georgia, USA
Pipila ka tuig na ang milabay ang among pamilya namalhin gikan sa usa ka busy kaayo, puno sa tawo nga dapit ngadto sa gamay, layo nga luna sa gawas sa usa ka hilum ug gamay nga balangay. Sa duol mao ang biniyaan nga umahan sa blueberry, ug pinaagi sa mga higala sa tag-iya, gitugutan kami nga makapamupu sa tanang blueberries kutob sa among gusto.
Pipila ka buntag matag semana niana nga ting-init manakay kami sa sakyanan dala ang mga balde ug mga bag ug migahin og makalipay, makalingaw nga oras sa pagpamupu og mga blueberries. Usa ka buntag ang among kamanghuran nga anak nga lalaki, si Hyrum, daw walay ganang mokuyog kanamo. Sigurado siya nga napupu na namo ang tanang blueberry ug usik na lang sa oras ang pag-adto og balik. Dako ang iyang katingala sa pagkakita nga daghan gihapon kaayo ang mga blueberries. Dunay mga pundok-pundok nga iyang nasayloan, ug ang pipila sa pinakatam-is nga mga berry nagkadagko diha sa mga sanga diin sigurado siya nga iya na kadtong nasuhid sa una.
Niini nga panahon, ang mga lider sa kabatan-onan sa ward mihagit sa mga batan-on sa pagbasa sa tibuok Basahon ni Mormon sa dili pa magsugod ang ting-eskwela niana nga Agosto. Ang among mga anak midala niini nga hagit ngadto sa panimalay, ug ang among pamilya misaad nga moapil sa ilang mga paningkamot.
Bag-o pa lang namong nahuman ang Basahon ni Mormon dihang ang among Agosto 2005 nga Ensign miabut, nga may hagit ni Presidente Gordon B. Hinckley (1910–2008) sa pagbasa sa tibuok Basahon ni Mormon kutob sa katapusan sa tuig. Si Hyrum ug ang iyang igsoon nga si Joseph nalipay—sa paghunahuna nga kami nakasunod na sa propeta! Dayon ang mas magulang nilang mga igsoon, sila si Seth ug Bethany, mipahinumdom kanila nga mihangyo si Presidente Hinckley kanato sa pagbasa niini og usab, bisan kon kapila na nato kini nahimo.
“Apan ngano man?” nangutana ang mga lalaki. “Nabasa na nato ang matag pulong, ug unsa pay naa diha nga kat-unan gawas sa nabasa na nato?”
Human sa pipila ka gutlo nga kahilum, dunay mihisgot kabahin sa mga blueberries. “Nahinumdom mo dihang nagtuo ta nga atong nahurot og pupu ang mga blueberry? Apan sa dihang namalik ta, kanunay nga dunay daghang blueberries—! Bisan kapila man ta mobalik, bisan kon unsa ka bag-o lang, kanunay dunay mga blueberries nga nagpungpong.”
Dali namong namatikdan ang koneksyon. Sama sa duol nga umahan ug sa abunda nga suplay niini sa lamian nga mga blueberries, ang Basahon ni Mormon usa ka padayon nga tinubdan sa espirituhanong pagkaon nga may bag-ong mga kamatuoran nga madiskubrihan. Mao nga sa makausa among gisugdan pag-usab og basa ang Basahon ni Mormon.
Samtang akong gidawat ang hagit sa propeta, akong nabasa ang mga butang sa Basahon ni Mormon nga nabasa na nako sa daghang higayon kaniadto, apan kini akong nakita sa lahi nga paagi o nasabtan kini samtang kini nagamit sa bag-ong kahimtang og mga hagit. Nahibalo ko nga sa matag higayon nga tinuoray natong gibasa ang Basahon ni Mormon, makadawat kita og bag-ong mga panabut ug mas magkaduol sa Manluluwas.