Managsuon sa Pangalan ug Hugot nga Pagtuo

Ni Heather Wrigley

Mga Magasin sa Simbahan

Sila si Maria ug Diana D. dili lang managsuon; sila usab suod nga higala. Si Diana 10 anyos, ug si Maria nag-12 anyos sa miaging Agosto. Sila nagpuyo sa Romania, diin adunay mga 3,000 ka mga miyembro sa Simbahan. Ilang padayon nga napalig-on ang ilang pagtuo ni Jesukristo pinaagi sa pagsimba, pagbasa sa kasulatan, ug pag-ampo.

“Sa simbahan nakakat-on ko sa pagbaton og pagtuo sa Dios,” miingon si Maria. Usa ka adlaw siya adunay eksamin, mao nga nag-ampo siya sa Langitnong Amahan sa ngalan ni Jesukristo para tabangan. Sa dihang nakakuha siya og maayo nga grado, mibati siya nga ang Langitnong Amahan mitabang kaniya.

Si Diana miingon nga ang Basahon ni Mormon nakatabang kaniya sa pagbaton og hugot nga pagtuo. “Matag adlaw nga mobasa ko sa Basahon ni Mormon, aduna koy nindot nga adlaw,” siya miingon. Ang iyang paborito nga istorya sa kasulatan mao ang istorya ni Joseph Smith. “Siya nag-ampo, ug ang Dios ug si Jesukristo mitabang kaniya,” siya miingon.

Tsokolate

Ang paboritong dessert nilang duha mao ang tsokolate. Si Maria ganahan og brownies, ug si Diana ganahan og chocolate cake.

Paborito nga Kanta

Sila si Maria ug Diana makatugtog sa piano. Ang paborito nga awit ni Maria mao ang “Maghigugmaay.” Kabahin kini sa sugo ni Jesus sa paghigugma sa ubang mga tawo. Si Diana hapit nang mahingpit ang pagtugtog, apan ang katapusan mao ang pinakalisud, siya miingon.

Gusto Ko nga Makita ang Templo

Sila Maria ug Diana ganahan nga maminyo sa templo inig-abut sa panahon. Sila nagpuyo sa Distrito sa Templo sa Kyiv Ukraine.

Kon modako na si Diana, siya moadto sa Templo sa Kyiv Ukraine aron sa pagpahigayon og mga bunyag alang sa patay. Karon si Maria sakto na sa edad para moadto. Ang templo dunay mga 500 ka milya (805 km) kalayo.

Unahon ang Pamilya

Sila Maria ug Diana nahigugma sa ilang mga ginikanan. “Si Mama makahimo kanamo nga mobati nga maarang-arang kon kami magkasakit,” miingon si Maria. “Si Papa mohatud kanamo sa eskwelahan,” miingon si Diana.

Mga Himno

Ang paborito nga himno ni Diana mao ang “Sa Layo nga mga Patag sa Judea,” nga naghisgot kabahin sa pagkatawo si Jesukristo. Ang mga miyembro sa Romania naggamit sa green nga hymnbook sa Simbahan. “Imnuri” nagpasabut nga “mga himno” sa Romanian.

Litrato sa managsuong babaye pinaagi ni Adam C. Olson; paghulagway sa cake ug brownie pinaagi ni Thomas S. Child