Sa Tibuok Simbahan
Ang Konsyerto sa Puerto Rico Mipundok og mga Liboan
Niadtong Disyembre 18, 2011, ang mga miyembro sa lima ka stake sa Puerto Rico miapil sa konsyerto sa Pasko nga gipahigayon didto sa Paseo de las Artes sa siyudad sa Caguas. Gibana-bana nga 85 ka mga miyembro sa Simbahan ang mipasundayag, ug mga 2,500 ka mga miyembro sa komunidad ang nanambong.
Ang New Young Adult Center mao ang Ikatulo sa Africa
Niadtong Nobyembre 4, 2011, ang mga young adult sa Soweto South Africa Stake mipahigayon sa ilang unang kalihokan sa bag-ong building nga eksklusibo lamang isip usa ka young adult center.
Kapin sa 140 ka mga center ang anaa na sa tibuok Europe, ug pipila ang nagkatap sa Estados Unidos. Ang center sa Soweto mao ang ikatulo sa Africa; ang uban anaa sa Democratic Republic of Congo ug sa Zimbabwe.
Lahi nga Pamaagi sa Pagpaila Nakaagni og mga Pagpangutana
Usa ka linukot nga papel maoy tinubdan sa “Mga Pangutana alang sa Dios” kalihokan sa mga misyonaryo sa Nizhniy Novgorod, Russia, niadtong Oktubre 9, 2011.
Sulod sa pipila ka oras nga kalihokan, kapin sa 150 ka tawo ang mihunong dapit sa duha ka lamesa sa usa ka busy nga dalan, mipunit og ballpen, ug misulat sa ilang mga pangutana. Tanan-tanan, 84 ka mga pangutana ang nasulat sa usa ka linukot nga papel. Daghang tawo ang mipadayag sa ilang tinguha nga matubag gikan sa mga misyonaryo nga didto.