Unsa ang Sunod human sa Seminary?
Ang paggradwar sa seminary dili mao ang katapusan sa inyong relihiyuso nga mga pagtuon. Adunay usa ka talagsaon nga butang nga giandam gihapon alang kaninyo.
Sa seminary nagtuon kamo sa mga kasulatan ug tingali nakahimamat sa inyong mga kaedad sa kanunay. Mobati kamo nga gi-welcome, ug mabati ninyo ang Espiritu. Busa kon nakompleto na ninyo ang seminary, kini ba nga mga kasinatian nahuman na? Wala pa gayud.
Ang sunod nga lakang mao ang programa sa institute sa Simbahan, ug maganahan kaayo mo niini. Bisan kon moeskwela ka sa kolehiyo o dili, makapadayon kamo sa pagkat-on sa ebanghelyo, pagpangandam sa misyon ug kaminyoon sa templo, ug pagpakigbahin sa mga kasinatian uban sa inyong mga kaedad.
Ania ang pipila ka tubag sa nag-unang mga pangutana kabahin sa institute. Makakita kamo og dugang sa institute.lds.org.
Unsa ang institute?
Ang institute naglangkob sa mga klase sa pagtuon sa ebanghelyo, lakip ang mga klase sa kasulatan, pagtulun-an sa mga propeta, ug pagpangandam sa misyon o pagminyo sa templo. Sa ubang mga institute makapili kamo gikan sa daghang mga klase.
Kinsa ang makatambong?
Tanang young single adult giawhag gayud sa pagtambong sa mga klase sa institute. Bisan kinsa—minyo o batan-on—nag-edad og 18 hangtud 30 makatambong.
Asa ko makakita sa institute?
Ang ubang mga dapit adunay mga institute building duol sa mga kolehiyo ug unibersidad. Sa ubang mga dapit ang mga klase pagahimoon sa mga building sa Simbahan o sa ubang mga dapit. Kontaka ang inyong bishop o presidente sa branch aron makat-on kabahin sa programa sa institute sa inyong dapit, o adto sa institute.lds.org aron makakita sa institue nga duol kaninyo.
Nganong kinahanglang moeskwela ko og institute?
Si Presidente Thomas S. Monson miingon: “Himoa nga usa ka prayoridad ang pag-apil sa institute. … Hunahunaa kini. Makabaton kamo og mga higala, ang Espiritu mabati, ug ang pagtuo malig-on. Mosaad ko kaninyo nga samtang moapil mo sa institute ug makugihong magtuon sa kasulatan, molambo ang inyong gahum sa paglikay sa tintasyon ug sa pagdawat og direksyon sa Espiritu Santo sa tanan ninyong gibuhat” (institute.lds.org, Abr. 21, 2009).
Paghulagway sa litrato pinaagi sa Media Services