Mensahe sa Unang Kapangulohan
“Siya Nabanhaw”
Pagpamatuod sa usa ka Propeta
“Ang kusog nga tawag aron sa paglihok sa mga Kristiyano,” nga gipahayag ni Presidente Thomas S. Monson, mao nga si Jesus nga taga-Nazaret mibangon gikan sa pagkamatay. “Ang kamatuoran sa Pagkabanhaw naghatag sa tanan sa kalinaw nga lapaw sa panabut” (tan-awa sa Mga Taga-Filipos 4:7).1
Sa nagsunod nga mga tudling, gipakigbahin ni Presidente Monson ang iyang pagpamatuod ug pasalamat sa Pagkabanhaw sa Manluluwas ug nagpahayag nga tungod kay gibuntog sa Anak ang kamatayon, ang tanang anak sa Amahan nga moanhi sa yuta mabuhi pag-usab.
Kinabuhi lapas sa Pagka-mortal
“Ako nagtuo nga walay usa nato ang nakasabut sa hingpit sa kaimportante sa unsay gibuhat ni Kristo alang kanato didto sa Getsemani, apan ako mapasalamaton kada adlaw sa akong kinabuhi tungod sa Iyang maulaong sakripisyo alang kanato.
“Sa katapusang gutlo, mahimo unta Siyang motalikod. Apan wala Niya buhata. Giagian Niya ang tanang mga butang aron nga Siya makaluwas sa tanang mga butang. Sa pagbuhat sa ingon, Siya mihatag nato sa kinabuhi lapas niining mortal nga kinabuhi. Giluwas Niya kita gikan sa Pagkapukan ni Adan.
“Sa kahiladman sa akong kalag, ako mapasalamaton kaayo Kaniya. Siya mitudlo kanato unsaon sa pagpakabuhi. Siya mitudlo kanato unsaon sa pagpakamatay. Iyang gisiguro ang atong kaluwasan.”2
Pag-iway sa Kangitngit sa Kamatayon
“Sa piho nga mga sitwasyon, sama sa labihang pag-antus ug balatian, ang kamatayon moabut isip usa ka anghel sa kalooy. Apan sa kasagarang bahin, gituohan nato kini nga kaaway sa tawhanong kalipay.
“Ang kangitngit sa kamatayon maiway gayud pinaagi sa kahayag sa gipadayag nga kamatuoran. ‘Ako mao ang pagkabanhaw, ug ang kinabuhi,’ namulong ang Agalon. ‘Ug ang mosalig kanako, bisan siya mamatay, mabuhi siya: Ug ang tanan nga buhi ug nagsalig kanako dili na gayud mamatay.’
“Kini nga kapaniguroan—oo, gani balaan nga panghimatuod—sa kinabuhi lapas sa lubnganan makahatag gayud sa kalinaw nga gisaad sa Manluluwas dihang mipaniguro Siya sa Iyang mga disipulo: ‘Kaninyo ibilin ko ang kalinaw, kaninyo ihatag ko ang akong kalinaw: dili sama sa hinatagan sa kalibutan, Kinahanglan nga dili magkaguol ang inyong kasingkasing, ni magtalaw.’”3
Wala Siya Dinhi
“Ang atong Manluluwas nabuhi pag-usab. Ang labing mahimayaon, mahupayon, ug mapasaligon sa tanang mga panghitabo sa kasaysayan nahitabo—ang kadaugan batok sa kamatayon. Ang kasakit ug paghingutas didto sa Getsemani ug Kalbaryo nahanaw. Ang kaluwasan sa katawhan nasiguro. Ang Pagkapukan ni Adan natubos.
“Ang wala nay sulod nga lubnganan nianang unang buntag sa Pasko sa Pagkabanhaw mao ang tubag sa pangutana ni Job, ‘Kon ang tawo mamatay, mabuhi ba siya pag-usab?’ “Sa tanan nga makadungog sa akong tingog, akong ipahayag nga ‘Kon ang tawo mamatay, mabuhi siya pag-usab. Kita nasayud, kay kita adunay kahayag sa gipadayag nga kamatuoran. …
“Akong minahal nga mga kaigsoonan, sa atong hilabihan nga kaguol, atong madawat ang tulukibon nga kalinaw gikan sa mga pulong sa anghel nianang unang buntag sa Pasko sa Pagkabanhaw: ‘Siya wala dinhi: kay siya nabanhaw.’”4
Ang Tanan Mabuhi Pag-usab
“Kita mokatawa, kita mohilak, kita motrabaho, kita modula, kita mohigugma, kita mabuhi. Ug unya kita mamatay. …
“Ug magpabilin kita nga patay kon wala pa ang usa ka Tawo ug ang Iyang misyon, nga mao si Jesus sa Nazaret. …
“Uban sa tanan nakong kasingkasing ug tumang pagbati sa akong kalag, mangusog ako sa akong tingog agig pagpamatuod isip usa ka linain nga saksi ug mamahayag nga ang Dios tinuod gayud nga buhi. Si Jesus Iyang Anak, ang Bugtong Anak sa Amahan sa unod. Siya ang atong Manunubos, Siya ang atong Tigpataliwala sa Amahan. Siya kadto ang namatay sa krus aron sa pagtubos sa atong mga kasal-anan. Nahimo Siya nga unang mga bunga sa Pagkabanhaw. Tungod kay Siya namatay, ang tanan gayud mabuhi pag-usab.”5
Usa ka Personal nga Pagsaksi
“Akong ipahayag ang akong personal nga pagsaksi nga ang kamatayon nabuntog na, ang kadaugan batok sa kamatayon naangkon. Unta ang mga pulong nga gihimo nga sagrado Niya kinsa mituman niini mahimong aktwal nga kahibalo sa tanan. Hinumdumi kini. Mahala kini. Pasidunggi kini. Siya Nabanhaw ”6
Pagtudlo gikan Niini nga Mensahe
Human mapakigbahin ang mga kinutlo gikan sa mga mensahe ni Presidente Monson, timan-i ang pagpamatuod nga iyang gihatag kabahin sa tinuod nga kahulugan sa Pasko sa Pagkabanhaw. Mapangutana ninyo ang mga sakop sa pamilya sa mosunod nga mga pangutana: “Unsay kahulugan niini diha ninyo nga ang buhing propeta mipamatuod niini nga mga kamatuoran karon? Unsaon man ninyo sa paggamit niini diha sa inyong kinabuhi?” Ikonsiderar ang pagdugang sa inyong pagpamatuod.
Ang Maduhaduhaong si Tomas, ni Carl Heinrich Bloch