Ang Tibuok Kalibutan nga Pagbansay sa Pagpangulo Naghatag og Empasis sa Tinuod nga Kalamboan
Ang mga lider sa Simbahan mipasabut sa kamahinungdanon sa “tinuod nga kalamboan” ug kon unsaon sa pagkab-ot niini atol sa Tibuok Kalibutan nga Miting sa Pagbansay sa Pagpangulo niadtong Pebrero 11, 2012.
Sila si Presidente Dieter F. Uchtdorf, Ikaduhang Magtatambag sa Unang Kapangulohan, ug ang mga sakop sa Korum sa Napulog Duha ka mga Apostoles, ang Kapangulohan sa Seventy, ug mga kapangulohan sa auxiliary sa Simbahan miapil sa instruksyon ngadto sa mga lider sa Simbahan sa tibuok kalibutan.
“Sa termino nga gigamit sa Simbahan ang, kalamboan masabut nga mao ang ‘bag-ong mga miyembro.’ … Ang tinuod nga kalamboan, bisan pa, gipasabut nga ‘kalamboan sa gidaghanon sa aktibong mga miyembro,’” mipasabut si Presidente Uchtdorf.
Si Elder M. Russell Ballard sa Korum sa Napulog Duha ka mga Apostoles midugang, “Ang kalamboan mahitabo kon ang personal, tibuok kinabuhi nga pagkakabig sa ebanghelyo moresulta sa nagtubo nga kamatinud-anon sa matag indibidwal ug pamilya.”
Kana nga nagtubo nga kamatinud-anon naglakip sa mga butang nga dili sayon nga sukdon, sama sa inadlaw nga pag-ampo, pagtuon sa kasulatan, family home evening, gugma sa panimalay, ug personal nga mga kasinatian uban sa Pag-ula, si Presidente Uchtdorf miingon.
“Sagad kaayo, usahay atong gihimong komplikado ang katahum ug kayano sa ebanghelyo ni Jesukristo uban sa walay katapusang lista sa kuti nga mga ekspektasyon,” siya miingon. “Hinoon, kon mag-focus kita sa ‘katuyoan’ sa ebanghelyo, daghan sa mga kalibug mahanaw.”
Daghan sa mga pagsibya nag-focus sa importanting mga doktrina ug mga baruganan, nga naghatag og tubag sa mga pangutana sa unsa ang “katuyoan”.
“Ang tukma nga mga pangutana sa ‘katuyoan’ sa ebanghelyo mogiya kanato ngadto sa tukmang mga desisyon kon si ‘kinsa,’ ‘unsa,’ ‘kanus-a,’ ‘asa,’ ‘ngano,’ ug ‘unsaon,’ kini sa paghimo,” si Presidente Uchtdorf miingon.
Kaminyoon ug ang Pamilya diha sa Plano
“Ang Simbahan naglangkob sa mga pamilya,” si Presidente Boyd K. Packer, Presidente sa Korum sa Napulog Duha ka mga Apostoles, miingon. “Ang mga ward ug stake anaa sa pagsuporta. Kon maghisgot kita kabahin sa mga pamilya, niana atong makita ang tinuod nga kalamboan sa Simbahan.”
Miingon siya nga ang matag bana ug amahan kinahanglan nga maoy opisyal sa priesthood diha iyang panimalay, modumala sa iyang pamilya sa pagkamatarung. Sa samang paagi, siya miingon, ang mga lider sa priesthood kinahanglang takus nga mangulo—bisan og ang mga office diha sa priesthood magkalahi, ang matag tighupot sa priesthood adunay igo nga priesthood sama sa sunod (tan-awa sa D&P 1:20).
Si Elder Russell M. Nelson sa Korum sa Napulog Duha ka mga Apostoles mipasabut nga ang mga bana ug asawa, mga amahan ug inahan, kinahanglang motukod og relasyon sa paghigugma, paghinulsol, ug pag-ampo aron magmalampuson sa paglig-on ug pagpanalipod sa pamilya, nga maoy “mahinungdanon ngadto sa plano sa Tiglalang alang sa walay katapusan nga destinasyon sa iyang mga anak” (“Ang Pamilya: Usa ka Pamahayag sa Kalibutan,” Liahona ug Ensign, Nob. 2010, 129).
“Tulo ka higayon diha sa sagradong mga kasulatan ang pahimangno gihimo nga ang tibuok yuta hingpit nga malaglag sa pagbalik sa Ginoo kon ang piho nga mga kondisyon dili mapahimutang,” siya miingon. “Sa matag hitabo kana nga pahimangno may kalabutan sa kahimtang sa tawhanong pamilya diin wala ang pagbugkos nga mga ordinansa sa templo. Kon wala kini nga mga ordinansa sa kahimayaan, ang himaya sa Dios dili matuman.”
Sa pagkab-ot nianang katapusan nga tumong—kinabuhing dayon ug kahimayaan sa tanang mga anak sa Dios—nagkinahanglan nga mahitabo ang tinuod nga kalamboan sa atong mga panimalay, sa mga ward, ug mga branch, ug sa tibuok Simbahan.
Paggamit sa Ebanghelyo
Ang tinuod nga kalamboan ug pagkakabig moabut pinaagi sa paggamit sa ebanghelyo sa inadlaw nga kinabuhi. Sa usa ka diskusyon nga pangutana ug tubag, si Elder L. Tom Perry ug Elder D. Todd Christofferson sa Korum sa Napulog Duha ka mga Apostoles mipasabut nga ang pinakaimportante nga paggamit sa ebanghelyo mao ang paghimo ug paghupot sa mga pakigsaad sa templo. Ang pagsunod sa mga pakigsaad, si Elder Christofferson miingon, makausab sa kinainyanhon nga tawo ngadto sa pagka-Santos paglabay sa panahon.
Ang pagtabang sa uban usa ka laing importante nga aspeto sa paggamit sa ebanghelyo. Ang mga miyembro maoy responsable sa tinagsa ug isip usa ka Simbahan sa pagtabang niadtong anaa sa temporal ug espirituhanong panginahanglan, ang mga lider miingon.
Kinahanglang dili kita magpanuko sa pagpakigtambayayong uban sa laing mga tinuohan ug anad sa pagserbisyo nga mga organisasyon sa pag-atiman sa timawa ug mga kabus, si Elder Christofferson miingon. Ang mga lider sa priesthood kinahanglan nga mangulo niini nga mga paningkamot, apan ang mga miyembro ug mga misyonaryo kinahanglang mosuporta usab niana nga tahas.
Usa ka panel nga diskusyon mipasabut gayud sa pag-focus sa pagpangalagad sa mga pamilya, paglig-on sa mga naghupot sa Melchizedek Priesthood, ug pagtabang nga malig-on ang pagtuo ug mga pagpamatuod sa mga kabatan-onan. Sila si Elder Ballard ug Elder Neil L. Andersen sa Korum sa Napulog Duha ka mga Apostoles miapil, uban nila si Elder Ronald A. Rasband sa Kapangulohan sa Seventy; Elaine S. Dalton, kinatibuk-ang presidente sa Young Women; ug Rosemary M. Wixom, kinatibuk-ang presidente sa Primary.
Si Elder Rasband miingon nga ang matag lider kinahanglan nga moapil sa pagpabalik sa mga miyembro sa hingpit nga pagkaaktibo, ug si Elder Andersen mipasabut nga ang mga kabatan-onan kinahanglan nga moapil gayud sa pagpaaktibo ug paglig-on sa ubang mga kabatan-onan.
Pagkab-ot sa Tinuod nga Kalamboan
Ang tinuod nga kalamboan moabut samtang atong gamiton ang mga baruganan sa ebanghelyo sa inadlaw natong kinabuhi, mipasabut si Presidente Uchtdorf.
“Samtang ikonsiderar ninyo kini nga mga hilisgutan, pangutan-a ang inyong kaugalingon sa ‘katuyoan’ sa inyong pagserbisyo ug pangalagad ug ang sangputanan nga ‘busa, unsa man diay’ diha sa inyong mga responsibilidad isip mga indibidwal ug isip mga council,” siya miingon.
Pagkat-on pa og Dugang
Ang mga indibidwal mahimong motan-aw, maminaw, makaimprinta, ug maka-download og materyal gikan sa sibya sa dinosena nga mga pinulongan pinaagi sa pag-adto sa lds.org/study/other-addresses ug sa pag-klik sa Worldwide Leadership Training.
Si Elder M. Russell Ballard sa Korum sa Napulog Duha ka mga Apostoles namulong atol sa usa ka panel nga diskusyon nga gipahigayon isip kabahin sa Tibuok Kalibutan nga Miting sa Pagbansay sa Pagpangulo niadtong Pebrero 2012.
© IRI