Paghigugma, Pagbantay, ug Paglig-on

Tun-i kini nga materyal sa mainampoon nga paagi ug, kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society nga aktibong bahin sa inyong kaugalingong kinabuhi.

Hugot nga Pagtuo, Pamilya, Kahupayan

Sama sa Manluluwas, ang mga visiting teacher nangalagad sa tagsa-tagsa (tan-awa sa 3 Nephi 11:15). Kita masayud nga kita nagmalampuson sa atong pagpangalagad isip mga visiting teacher kon ang atong mga sister makaingon: (1) ang akong visiting teacher nagtabang kanako nga molambo sa espirituhanong paagi; (2) Ako nasayud nga ang akong visiting teacher nagpakabana og maayo kanako ug sa akong pamilya; ug (3) kon ako adunay mga problema, ako nahibalo nga ang akong visiting teacher molihok nga dili maghulat og hangyoon.¹

Unsaon nato isip mga visiting teacher sa paghigugma, pagbantay, ug paglig-on sa usa ka sister? Ang mosunod mao ang siyam ka mga sugyot nga anaa sa Kapitulo 7 sa Anak nga mga Babaye sa Akong Gingharian: Ang Kasaysayan ug Buhat sa Relief Societynga makatabang sa mga visiting teacher sa pagpangalagad sa ilang mga sister:

Pag-ampo kanunay alang kaniya ug sa iyang pamilya.
Tinguhaa ang inspirasyon nga makaila kaniya ug sa iyang pamilya.
Bisitahi siya kanunay sa pagpangumusta ug sa paghupay ug paglig-on kaniya.
Kanunaya ang pakigkita pinaagi sa pagbisita, pagpanawag, pagsulat, e-mail, pag-text, ug ginagmayng buhat sa kamabination.
Timbayaha siya sa mga miting sa Simbahan.
Tabangi siya panahon sa mga emerhensya, sakit, o ubang dinaliang panginahanglan.
Itudlo kaniya ang ebanghelyo gikan sa mga kasulatan ug sa mga mensahe sa visiting teaching.
Dasiga siya pinaagi sa pagpakita og maayong ehemplo.
I-report ngadto sa lider sa Relief Society ang gibuhat nilang serbisyo ug ang espirituhanon ug temporal nga kaayohan sa sister.

Gikan sa mga Kasulatan

Lucas 10:38–39; 3 Nephi 11:23–26; 27:21

Gikan sa Atong Kasaysayan

“Ang visiting teaching nahimo nga pamaagi sa mga Santos sa Ulahing Adlaw nga mga babaye sa tibuok kalibutan sa paghigugma, pag-alima, ug pagserbisyo—sa “paglihok sumala sa mga pagbati nga gitisok sa Dios dinhi sa [atong] mga dughan,’ sigon sa gitudlo ni Joseph Smith.”²

Usa ka sister nga bag-o lang nabiyuda miingon kabahin sa iyang mga visiting teacher: “Sila naminaw. Sila mihupay kanako. Sila mibakho uban kanako. Ug sila migakos kanako. … [Sila] mipagawas kanako gikan sa kawalay paglaum ug kasubo sa unang mga bulan sa pag-inusara.”³

Ang pagtabang sa temporal nga mga buluhaton usa usab ka matang sa pagpangalagad. Sa Oktubre 1856 nga kinatibuk-ang komperensya, si Presidente Brigham Young mipahibalo nga ang nanagkariton nga mga pioneer natanggong sa lawom nga snow 270–370 ka milya (435–595 km) ang gilay-on. Iyang gitawag ang mga Santos sa Ulahing Adlaw nga naa sa Siyudad sa Salt Lake sa pagluwas kanila ug sa “tinuoray nga pagtabang niadtong mga butang nga atong gitawag og temporal.”⁴

Si Lucy Meserve Smith mirekord nga ang mga kababayen-an mihubo sa ilang pampainit nga mga sapaw ug mga medyas didto gayud sa tabernakulo ug gipahimutang ngadto sa karwahe aron ipadala ngadto sa nag-antus sa kabugnaw nga mga pioneer. Dayon ilang gipundok ang mga panghapin sa higdaanan ug mga sinina alang sa mga moabut nga diyutay ra og mga gamit. Dihang nangabut na ang mga nanagkariton nga pundok, ang usa ka building sa lungsod “puno sa mga suplay alang kanila.”⁵

Sa Tinagsa-tagsa, pinaagi ni Walter Rane, sa maayong kabubut-on sa Church History Museum