Ang Tanan Nakaila kang Bleck
Alang kang Honoura “Bleck” Bonnet, ang basketball maoy pinakaimportante kaniya. Sa edad nga 15, si Bleck bag-ong misikat sa French Polynesia—usa sa pinakamaayong magdudula sa usa sa pinakamaayo nga mga team sa top adult division sa maong nasud. Bisan og ang iyang angga usa ka sayop nga pagka-spelling sa Iningles nga black, walay pagkasayop sa iyang talento.
Apan may daghan pa siyang ganahan. Gusto siyang modula nga propesyunal ngadto sa Europe. Ug labaw sa tanan, gusto siyang makadaug og gold medal sa South Pacific Games.
Ang bugtong babag nga maingon og anaa sa iyang agianan mao ang Simbahan.
Usa ka Tawo nga Naa sa Misyon
Bisan og ang team nga gidulaan ni Bleck nianang panahona gi-sponsor sa Simbahan, si Bleck wala kaayoy interes sa Simbahan o sa tawag sa propeta alang sa matag takus ug makahimo nga batan-ong lalaki sa pagserbisyo og misyon.
Iya nang giingnan ang iyang bishop nga dili siya magmisyon. Wala siya mahibalo kon unsaon niya sa pagdula isip usa ka propesyunal kon moundang siya sulod sa duha ka tuig.
Labaw pa, ang South Pacific Games—nga himoon matag upat ka tuig—mahitabo samtang naa siya sa misyon, ug ang Tahiti Basketball Federation interesado nga modula siya sa nasyonal nga team. Siya sa katapusan makabaton na sa usa ka oportunidad nga mahunong na ang gipamulong sa iyang papa sa matag higayon nga si Bleck magsugod sa pagpanghambog: Ang tanan nakaila kang Bleck, apan siya walay gold medal.”
Ang papa ni Bleck, si Jean-Baptiste, mipasabut niini sa maayo nga paagi. Apan nakapapungot kini kang Bleck. Makapahinumdom kini nga bisan og ang mga fans sa basketball sa tibuok Tahiti nakaila kaniya, wala man siyay medal gikan sa mga dula. Ang iyang papa nakadaug og gold medal sa men’s team atol sa unang South Pacific Games.
Ang misyon ni Bleck mao ang pagprubar nga sayop kining mga pulonga. Siya walay panahon alang sa bisan unsang lain nga misyon.
Usa ka Kausaban sa Hunahuna, usa ka Kausaban sa Kasingkasing
Bisan sa iyang mga pagbati mahitungod sa pagmisyon, si Bleck sa gihapon miapil sa mga kalihokan sa Simbahan. Sa usa ka sayaw sa Simbahan dihang ang edad niya 16, si Bleck nakaangkon og kaisug sa paghangyo kang Myranda Mariteragi nga manayaw. Si Myranda usa usab ka maayong magdudula og basketball—uban sa pangandoy nga makadaog og kaugalingon niyang gold medal. Ang iyang papa anaa usab niadtong orihinal nga team nga nakadaog og medal.
Mga segundo human si Bleck mihangyo kaniya, nahuman ang tukar. Mao nga nanayaw sila sa pagkasunod nga kanta, nga mao ang katapusan nianang gabhiona. Nianang panahona dili gusto ni Bleck nga mahuman ang sayaw.
Si Bleck wala magplano nga maminyo sa templo o bisan gani sa pagpakigminyo og usa ka miyembro. Apan nagsugod kana sa pagkausab dihang mas nailhan niya si Myranda sa misunod nga duha ka tuig. Sa balay ni Myranda usa ka adlaw, may butang nga iyang gihimo sa Young Women nga nakakuha sa atensyon ni Bleck. Mabasa kini, “Magminyo ko sa templo.”
Ang interes ni Bleck kang Myranda ug ang lig-on nga pasalig ni Myranda nga maminyo sa templo igo na sa pagpahunahuna og usab sa iyang mga plano. Iyang gisugdan ang pagseryuso sa Simbahan. Ang iyang mga desisyon miresulta sa mga buhat nga nagtugot sa Espiritu Santo nga molihok sa iyang kinabuhi.
Ang Desisyon
Usa sa mga desisyon mao ang pagpangandam nga makadawat sa patriarchal nga panalangin sa edad nga 18. Dihang ang patriarch misulti sa panalangin nga si Bleck moserbisyo og misyon ug maminyo sa templo, iyang gibati ang Espiritu. “Nahibalo ko nga mao kana ang gusto sa Dios nga akong buhaton,” miingon siya.
Bisan og ang nasyonal nga team maingon og adunay tsansa nga maka-medal, si Bleck mihukom uban sa suporta sa iyang pamilya nga iyang buhaton unsa ang gusto sa Dios labaw kay sa gusto niyang buhaton. Ang pagdesisyon dili sayon. Ang pang-agni sa pagdula hilabihan. Ug iya dayong nahibaloan nga ang iyang desisyon sa pagtugyan ngadto sa kabubut-on sa Dios pagasulayan dili lang kausa.
Sa dihang siya nakaserbisyo isip misyonaryo sa Tahiti sulod sa usa ka tuig, ang basketball federation mihangyo kon makabalik ba siya sa team sulod lang sa usa ka bulan aron moapil sa mga dula.
Ang presidente sa misyon ni Bleck, naghunahuna mahitungod sa epekto unya sa maong kasinatian diha sa kasarang ni Bleck sa pagbalik ug moserbisyo, nadasig sa pag-ingon kaniya, “Mahimo kang mobiya kon gusto nimo, apan dili ka na mahimong mobalik.”
Si Bleck gusto niana nga medal, apan dili na niya kini gusto labaw kay sa uban pang butang. Ang iyang misyon talagsaon kaayo. Dili niya undangon ang iyang katapusang tuig, bisan pa og alang sa basketball.
Nagpabilin si Bleck.
Ang team nakadaog og gold.
Magkalahi nga Kahimtang, Parehas nga Desisyon
Human si Bleck dungganon nga nakahuman sa iyang misyon, nakigminyo siya kang Myranda sa Templo sa Papeete Tahiti, ug nagsugod sila og usa ka pamilya. Mibalik na usab siya sa pagdula alang sa nasyonal nga team.
Si Myranda nagdula isip point guard sa nasyonal nga team sa mga babaye ug nangandam sa iyang kaugalingon alang sa South Pacific Games.
Hinoon, samtang nagkaduol ang mga dula, ang magtiayon may kusog nga pagbati nga kinahanglan nila ang ikaduhang anak.
Tungod kay duol na ang pagsugod sa mga dula nga wala na lang kaabut og usa ka tuig, sayon ra unta nga dili usa manganak aron makadula si Myranda. Ang team sa mga babaye dunay dakong tsansa nga makadaog og medal.
Apan ang magtiayon nakakat-on gumikan sa kasinatian nga ang pagtugyan sa ilang kabubut-on ngadto sa Dios nagdala og dagkong panalangin kay sa bisan unsa nga ilang gipangandoy gikan sa pagsunod sa kaugalingon nilang mga tinguha. Human sa mainampingon nga pagtuon ug pag-ampo, ilang nahukman nga unahon sa pagpundar ang ilang pamilya.
Niadtong 1999, samtang si Myranda walo ka bulan nga mabdos, ang team sa mga babaye nakadaog og gold.
Ang tanan nakaila kang Bleck
Si Bleck ug Myranda nakadula na og basketball sa pinakataas nga ang-ang sa French Polynesia sobra sa milabayng dekada—nakadaog og mga kampyonato sa nasyonal nga liga ug mga tournament cups ug nakadula alang sa nasyonal nga team atol sa 2003 ug 2007 nga mga dula.
Sa 2011 nga mga dula, silang duha miapil, apan niining panahona si Bleck didto aron sa pag-coach sa team sa mga lalaki. Samtang si Myranda ug ang team sa mga babaye nakadaog og medal, ang team sa mga lalaki nakadaog og bronze, pakyas na usab sa pangandoy ni Bleck nga makadaog og gold.
Si Bleck usahay maghunahuna kon unsa kaha ang iyang kinabuhi kon iyang gibuhat ang iyang gusto imbis unsay gusto sa Dios.
“Tingali makaangkon ko og gold medal,” miingon siya. “Tingali makadula nga propesyunal, mahimo sab nga dili.”
Apan ang magtiayon wala magmahay sa mga desisyon nga ilang gihimo. Dili sila sigurado kon sa unsang paagi nga mas magmalipayon pa sila.
“Naminyo ko sa templo,” miingon si Bleck. “Naa koy talagsaong asawa, upat ka matahum nga mga anak, ug naa gihapon ko sa Simbahan. Ang pag-basketball lamang dili makahatag kanako bisan asa niana. Kadto mga panalangin nga miabut isip resulta sa pag-una sa Ginoo.”
Ang pag-una sa Ginoo wala makapahunong sa pagsungog sa iyang amahan, apan naghatag kini og bag-ong kahulugan niadto nga mga pulong. Pipila ka tuig na ang milabay dihang ang federation mikonsiderar sa pag-iskedyul sa mga dula sa liga sa adlawng Dominggo, ang mga presidente sa club nagmiting sa paghisgot niini. Dunay nangutana, “Inyo bang gipangutana si Bleck?”
Ang proposal wala madayon.
Tungod kay giuna ni Bleck ang Ginoo, wala lamang makaila ang tanan kang Bleck—nahibalo sila unsay iyang gituohan.
Si Honoura “Bleck” ug Myranda Bonnet dugay na nga apil sa basketball sa Tahiti.
Alang kang Bleck ug Myranda, ang kalampusan sa ilang sport nahimong ubos na lang nga prayoridad kay sa kalampusan sa ilang pamilya.
Mga litrato pinaagi ni Adam C. Olson, gawas kon gipahibalo
Litrato sa basketball pinaagi ni Tamara Ratieta © IRI