Kinahanglan Ko nga Mobalik

Nestor Querales, Portugal

Usa ka gabii, samtang nagserbisyo isip lider sa priesthood sa stake sa Loulé, Portugal, gihatud nako sa ilang balay ang pipila sa mga batan-on human sa usa ka kalihokan sa stake. Gabii na kaayo kadto, ug sa akong pagpauli human nako mahatud ang mga batan-on, miliko ko sa usa ka ngitngit nga dalan sa usa ka rural nga dapit nga adunay pipila ka sakyanan. Sa akong pagpadayon miagi ko sa gamay nga tulay ug nakakita ko og nagkidlap-kidlap nga suga sa akong tuo nga bahin didto sa suba sa ubos nga ingon og adunay sunog.

Tungod sa kaumog sa kagabhion, naghunahuna ko nga bisan kon adunay sunog, dali ra kining mapalong tungod sa umog, mao nga midiretso lang ko.

Apan, nakalayo lang ko og pipila ka metro, sa dihang nakadungog ko og tingog nga miingon, “Hunong!” Natingala ko kay nag-inusara lang ko nga nagmaneho, apan gibaliwala ko kini ug mipadayon sa pagmaneho. Daw sama sa tingog sa dug-dug akong nadungog, “Hunong ug balik!” Diha-diha dayon giliko nako ang sakyanan ug mibalik. Samtang ako kining gibuhat, nangutana ko sa Langitnong Amahan, “Ginoo, unsa man kini?” Sa akong pag-abut sa tulay, migawas ko sa sakyanan, ug gitubag dayon ko sa Ginoo, kay nakadungog ko og usa ka tawo didto sa ubos nga nagsyagit, “Palihug, tabangi mi!”

Hapit walay suga, ug wala koy makit-an gawas lang sa gamay, orange nga nagkidlap-kidlap nga suga sa ubos. Lalum kaayo ang kilid sa suba ubos sa tulay, ug tungod kay kulang sa kahayag, wala ko kahibalo unsaon sa pagtabang. Dali-dali kong midayal sa numero sa telepono sa emerhensiya, ug ang mga tigluwas miabut sa labing dali nga panahon aron sa pagtabang.

Kadtong gamayng kahayag naggikan sa sakyanan nga may lima ka tawo nga nahulog gikan sa dalan. Namatay ang duha, apan mas mograbe pa unta to kon wala pa ko maminaw sa tingog sa Espiritu Santo.

Mopamatuod ko nga ang Ginoo nagpadayag kanato pinaagi sa Espiritu, kon kini hinay man nga tingog o tingog sama sa dug-dug. Mapasalamaton ko nga naminaw ko niini niadtong gabhiuna. Nasayud ko nga ang Ginoo buhi, nga Siya nahigugma kanato, ug ang Espiritu Santo modasig kanato. Kinahanglan lang nga maminaw kita sa Iyang tingog.