Mensahe sa Unang Kapangulohan
Gitawag sa Dios ug Gipaluyohan sa Katawhan
Isip mga miyembro sa Simbahan, kita kanunay gidapit sa pagpaluyo sa mga tawo sa mga calling sa pagserbisyo. Daghang tuig nang milabay usa ka 18 anyos nga estudyante mipakita kanako unsa ang kahulugan sa pagpaluyo sa mga sulugoon sa Ginoo. Napanalanginan gihapon ko sa iyang mapainubsanon nga ehemplo.
Bag-ohay lang siya nga nagsugod sa iyang unang tuig sa kolehiyo. Wala pay usa ka tuig sukad sa iyang bunyag sa dihang mibiya siya sa iyang panimalay aron magsugod og eskwela sa dako nga unibersidad. Didto miserbisyo ko isip iyang bishop.
Sa pagsugod sa tuig sa tingklase, gi-interbyu ko siya og kadiyot sa opisina sa bishop. Gamay lang ko og nahinumduman sa among unang panag-istorya gawas nga naghisgot siya kabahin sa iyang mga hagit sa usa ka bag-ong lugar, apan dili gyud nako makalimtan ang among ikaduha nga panag-istorya.
Siya mihangyo nga makigkita kanako sa akong opisina. Natingala ko sa dihang siya miingon, “Mahimo bang mag-ampo kita, ug ako ang mosulti?” Moingon na unta ko nga nakaampo nako ug nagdahum nga siya usab. Hinoon miuyon ko.
Gisugdan niya ang iyang pag-ampo uban sa pagpamatuod nga siya nasayud nga ang bishop gitawag sa Dios. Siya nangamuyo sa Dios sa pagsulti kanako kon unsa ang iyang angay nga buhaton sa usa ka butang nga may dakong espirituhanong sangputanan. Ang batan-ong lalaki nag-ampo sa Dios nga siya sigurado nga ang bishop nasayud sa iyang panginahanglan ug mohatag og tambag nga iyang kinahanglan nga madunggan.
Samtang siya nag-ampo, misantup sa akong hunahuna ang piho nga mga kakuyaw nga iyang atubangon. Ang tambag yano lamang apan klaro kaayo nga nasulti: pag-ampo sa kanunay, pagsunod sa mga sugo, ug ayaw kahadlok.
Kana nga batan-ong lalaki, usa ka tuig pa lang sa Simbahan, mitudlo pinaagi sa ehemplo unsa ang mahimo sa Dios sa lider nga gipaluyohan sa hugot nga pagtuo ug mga pag-ampo niadtong iyang gigiyahan. Kana nga batan-ong lalaki mipakita kanako sa gahum sa balaod sa inuyunan sa kadaghanan (tan-awa sa D&P 26:2). Bisan tuod ang Ginoo nagtawag sa Iyang mga sulugoon pinaagi sa pagpadayag, makalihok lang sila human mapaluyuhan niadtong ilang serbisyuhan.
Pinaagi sa atong boto sa pagpaluyo, kita mihimo og balaan nga mga saad. Kita nagsaad nga mag-ampo alang sa mga sulugoon sa Ginoo ug nga Siya mogiya ug molig-on kanila (tan-awa sa D&P 93:51). Kita nagsaad nga kita mangita ug magdahum nga mobati og inspirasyon gikan sa Dios diha sa ilang tambag ug kon sila mobuhat sa ilang calling (tan-awa sa D&P 1:38).
Kana nga saad kinahanglan nga bag-uhon kanunay diha sa atong kasingkasing. Ang inyong magtutudlo sa Sunday School naningkamot nga motudlo pinaagi sa Espiritu, apan sama usab kanimo, ang imong magtutudlo mahimong masayup sa atubangan sa klase. Kamo, hinoon, makadesider sa pagpaminaw ug pagtan-aw sa mga higayon nga inyong mabati ang inspirasyon. Moabut ang panahon nga kamo makamatikod nga dyutay na lang ang sayop ug mas daghang ebidensya nga ang Dios nagpaluyo niana nga magtutudlo.
Sa atong pag-isa sa kamot aron sa pagpaluyo sa usa ka tawo, kita nagpasalig nga molihok alang sa bisan unsa nga katuyuan sa Ginoo nga kana nga tawo gitawag aron sa pagtuman. Sa dihang ang among mga bata gagmay pa, ang akong asawa gitawag sa pagtudlo sa gagmayng mga bata sa among ward. Wala lang ko mopaisa sa akong kamot aron sa pagpaluyo kaniya, apan nag-ampo usab ko alang kaniya ug nangamuyo og pagtugot nga tabangan siya. Ang mga leksyon nga akong nakat-unan sa pagdayeg sa unsa ang mahimo sa mga babaye ug sa gugma sa Ginoo alang sa mga bata nagpanalangin gihapon sa akong pamilya ug sa akong kinabuhi.
Bag-ohay lang ko nga nakig-istorya niadtong batan-ong lalaki kinsa mipaluyo sa iyang bishop mga pipila na ka tuig ang milabay. Akong nasayran nga ang Ginoo ug ang mga tawo mipaluyo kaniya sa iyang call isip misyonaryo, presidente sa stake, ug isip amahan. Siya miingon sa dayong pagtapos sa among pag-istoryahanay, “Nag-ampo gihapon ko alang kanimo matag adlaw.”
Kita makahukom sa pag-ampo kada adlaw alang sa usa ka tawo nga gitawag sa Dios sa pagserbisyo kanato. Kita makapasalamat sa usa ka tawo nga nakapanalangin kanato pinaagi sa iyang pagserbisyo. Kita makadesider sa pagboluntaryo kon ang usa ka tawo nga atong gipaluyohan mangita og mga bolunter.1
Kadtong moabag sa mga sulugoon sa Ginoo sa Iyang gingharian pagapaluyuhan sa Iyang dili matupngan nga gahum. Kitang tanan nagkinahanglan niana nga panalangin.
Pagtudlo Niini nga Mensahe
Human sa pagpakigbahin sa mensahe, ikonsiderar ang pagbasa sa mosunod nga kinutlo: “Sa mga kamot sa Ginoo himoon ka Niyang instrumento kon ikaw mapainubsanon, matinud-anon, ug makugihon. … Makadawat ikaw og dugang kalig-on kon ikaw paluyohan sa kongregasyon ug i-set apart” (Pagtudlo, Walay Labaw Ka Mahinungdanon nga Tawag [1999], 20). Papaalirunga ang pamilya sa usa ka bug-at nga butang ug hangyoa ang usa ka tawo sa pag-alsa niini. Magdugang og usa ka tawo matag higayon, dapita ang ubang sakop sa pamilya sa pag-alsa sa butang. Hisguti unsa ang mahitabo kon motabang ang tanan. Ikonsiderar ang paghatag og gibug-aton sa tambag ni Presidente Eyring sa praktikal nga mga pamaagi nga kita makapaluyo sa uban sa ilang mga calling.
Sa wala: paghulagway pinaagi ni Scott Snow; sa ibabaw: paghulagway pinaagi ni Scott Greer; paghulagway sa litrato pinaagi ni Welden C. Andersen, Hyun-Gyu Lee, ug Frank Helmrich