Ang Pagpuasa Makapalig-on Kanato sa Espiritwal ug Temporal nga Paagi

Ang puasa nahimong kabahin na sa ebanghelyo ni Jesukristo sukad pa sa panahon sa Daang Tugon (alang sa ehemplo, tan-awa sa Daniel 9:3; Joel 2:12). Ang puasa makapalig-on sa mga tawo sa espirituhanon nga paagi ug mas makadugang sa kaepektibo sa ilang mga pag-ampo (tan-awa sa Isaias 58:6–11). Karon ang mga miyembro sa Ang Simbahan ni Jesukristo sa mga Santos sa Ulahing mga Adlaw magpuasa ug mohatag sa kwarta nga ila untang gastuhon para sa ilang pagkaon ngadto sa Simbahan aron sa pagtabang sa kabus ug nanginahanglan.

“Ang Simbahan mipili og usa ka Dominggo matag bulan, sa kasagaran ang unang Dominggo, isip adlaw sa pagpuasa. Ang hustong pag-obserbar sa Dominggo sa puasa naglakip sa dili pagkaon ug pag-inum sulod sa duha ka sunod-sunod nga kan-anan [sulod sa 24 ka oras], pagtambong sa miting sa puasa ug pagpamatuod, ug paghatag og halad sa puasa aron itabang sa pag-atiman niadtong nangihanglan.

“Ang imong halad sa puasa kinahanglang dili mominos sa kantidad sa duha ka kan-anan nga wala nimo kan-a. Kon posible, magmanggihatagon pa ug mohatag og dugang pa kaysa niini nga kantidad.

“Agig dugang sa pag-obserbar sa mga adlaw sa puasa nga gigahin sa mga lider sa Simbahan, mahimo kang magpuasa sa bisan unsang adlaw, sumala sa imong mga panginahanglan ug sa mga panginahanglan sa uban. Hinoon, ikaw kinahanglan nga dili magpuasa og sige o sulod sa sobra na kaayo nga mga oras.”¹ Kadtong may kondisyon sa medikal nga mograbe kon magpuasa kinahanglang mogamit og kaalam ug mousab sa ilang pamaagi.

Ang mga miyembro sa Simbahan magpuasa alang sa lain-laing mga rason. Pananglitan, kita makapuasa ug makaampo alang sa sakop sa pamilya nga nasakit. Kita makapuasa sa pagpahayag og pasalamat ngadto sa Dios, sa pagpalambo og pagka mas mapainubsanon, sa pagbuntog og mga kahuyang o sala, sa pagdawat og inspirasyon alang sa mga responsibilidad sa Simbahan, ug uban pa. Ang puasa makatabang kanato nga mobati og kalooy alang niadtong kanunay gigutom. Ang puasa makatabang usab nga makapatigbabaw ang atong espiritu kay giuna nato ang atong espiritu kaysa lawas.

Ang pagpuasa nagpasabut nga boluntaryong dili mokaon ug moinom alang sa katuyoan nga mas maduol sa Ginoo ug mangamuyo sa Iyang mga panalangin.
Kita giawhag nga mohatag og ubay-ubay sa atong mga halad sa puasa: ang Simbahan mogamit sa kwarta sa pagtabang sa kabus ug nanginahanglan.
Ang Dominggo sa Puasa naglakip sa pagpamatuod panahon sa miting sa sakrament.
Ang puasa mas epektibo kon kini ubanan sa pag-ampo.
Ang puasa kanunay nang gipraktis sa matinuorong tumutuo. Ang karaang mga Judeo, sama pananglit, nagpuasa alang kang Ester aron siya makahangyo sa hari og proteksyon alang sa iyang katawhan (tan-awa sa Ester 4:16).

Paghulagway sa litrato pinaagi ni Talat Mehmood, John Luke, ug Welden C. Andersen; detalye gikan sa Sa Ingon nga Panahon sama Niini, ni Elspeth Young