Giunsa Nimo Pagkahibalo nga Kinahanglang Moanhi Ka?
Sherrie H. Gillett, Utah, USA
Sa dihang 33 anyos ko, ang akong bana namatay tungod sa brain tumor. Sa kalit lang nahimo kong single parent nga nag-inusarang magpadako sa among tulo ka anak. Kadto mahagiton nga panahon sa akong kinabuhi, apan ang tambag sa Ginoo nga “kining tanan nga mga butang makahatag kanimo og kasinatian, ug alang sa imong kaayohan” (D&C 122:7) nakahatag kanako og kaisug nga mopadayon.
Sa wala madugay nagminyo ko og usab ug mibalhin og laing ward, diin gitawag ko isip presidente sa Relief Society. Usa ka adlaw samtang nanglimpyo ko sa balay, aduna koy klaro nga impresyon sa pagbisita sa dili kaayo aktibo nga sister kinsa bag-ohay lang namatyan og bana. Wala ko kini panumbalinga, naghunahuna nga kinahanglan kong mobuhat og uban pang butang nianang adlawa. Maulaw kong mosulti nga mibati ko sa samang impresyon sa duha pa ka higayon sa wala pa ko mosunod niini.
Sa akong pag-abot sa balay sa sister nianang gabhiona, ngitngit kadto. Akong gipabagting ang doorbell ug nagpaabut. Kusog kong natuktok ug nagpaabut pa.
Sa ako na untang pagbiya, ang suga sa balkon misiga, ug ang pultahan hinay nga mibukas. Ang sister nagduha-duha sa pagpagawas sa iyang ulo sa abli nga bahin. Dili gayud nako makalimtan ang iyang pangutana: “Giunsa nimo pagkahibalo nga kinahanglang moanhi ka? Giingnan ko niya nga tibuok adlaw siyang naghilak ug mibati nga dili siya makapadayon kon wala ang iyang bana.
Kami nag-istoryahanay mga pipila ka oras nianang gabhiona. Wala na kaayo ko makahinumdom kon unsa ang among giistoryahan, apan nahinumdom ko nga misulti kaniya, “Nasayud gyud ko kon unsa ang imong gisagubang karon.” Gisiguro nako kaniya nga ang panahon iyang higala ug ang Ginoo nagbantay kaniya. Samtang kami nag-istoryahanay, nakabantay ko nga ang iyang magul-anon nga panagway napulihan og ekspresyon sa kalinaw.
Sa pagtapos sa among pag-istoryahanay, kinasingkasing ko siyang gigakos. Mapasalamaton kaayo ko nga nadasig ko sa pagbisita kaniya. Nasayud ko nga ang mahigugmaong Langitnong Amahan mitugot kanako sa pagtabang Kaniya sa pagtabang niining buotan nga sister panahon sa panginahanglan.