Ang Disabilities Website sa Simbahan Ipagawas sa Siyam ka Dugang nga mga Pinulongan

Ni Melissa Merrill

Mga Balita ug Panghitabo sa Simbahan

Sa dihang ang lds.org/disability gisugdan niadtong 2007 sa Iningles, mihiusa kini sa impormasyon nga nagkatag kaniadto sa mga handbook, mga manwal, ug uban nga mga website, nga nakahimo sa mga tabang ug mga ideya nga mas daling makuha sa sentro nga dapit.

Karon, karong 2012, kadto nga mga kapanguhaan (nga naglakip sa impormasyon kabahin sa 10 ka lainlaing mga kategoriya sa mga kakulangan ug nagkalainlain pang mga tabang) anaa na sa siyam ka dugang nga mga pinulongan: Chinese, French, German, Italian, Japanese, Korean, Portuguese, Russian, ug Spanish.

Kining kinaulahian nga gisugdan makatabang sa mga pamilya sama sa mga Varin sa Paris, France. Sila si Raymond ug Isabelle Varin adunay usa ka anak nga lalaki, si Jérôme, sa dihang ang ilang ikaduhang anak nga lalaki, si Jérémy, natawo nga may Down syndrome. Bisan ang kasayuran sa kahimtang ni Jérémy nakapakurat sa iyang mga ginikanan—gamay ra kaayo ang ilang nahibaloan kalabut sa Down syndrome nianang higayuna—kasagaran sa mga kasinatian sa pamilyang Varin nga may kalabutan sa kakulangan ni Jérémy positibo. Si Brother Varin miingon nga daghang mga tawo ang nakabaton og dakong gugma alang ni Jérémy, nagpasabut nga ang mga miyembro sa Simbahan mapinanggaon gayud kaniya ug nagpakita kaniya og gugma ug pagdayeg.

Nagtuo siya nga ang website makatabang nga maalagaran kadtong mga matang sa mga kinaiya. “Makatabang kini sa mga lider ug mga magtutudlo sa Simbahan nga makasabut sa mga kakulangan ug kon unsaon sa pagpahiangay ug pagdumala sa mga sitwasyon,” miingon siya.

Apan ang site importante usab alang sa mga tawo nga may mga kakulangan ug sa ilang mga pamilya, miingon siya—dili kaayo ang paagi sa pagpahibalo apan ingon nga kapanguhaan sa pag-awhag.

“Kini nga site importante alang sa mga pamilya nga adunay sakop nga may kakulangan tungod sa suporta nga gitanyag niini,” miingon siya. “Makahatag kini kaninyo og panglantaw sa kasinatian ug pagpamatuod sa uban, nga makahatag og mas positibong panan-aw sa umaabut. Tungod niini nga mga hinungdan importante nga kining impormasyon anaa sa lainlaing mga pinulongan.”

Si Elder Keith R. Edwards sa Seventy, nga nagtambag sa Disability Services alang sa Simbahan, miuyon.

“Ang mga miyembro nga may mga kakulangan, ang ilang mga pamilya, ug ang mga caregiver masayud nga kitang tanan nagtinabangay alang sa usa ka katuyoan—‘ang pagpahinabo sa pagka-imortal ug sa kinabuhi nga dayon sa tawo’—ug kana nga katuyoan nagkinahanglan nga kita ‘usa sa kasingkasing ug usa sa hunahuna,’” miingon si Elder Edwards (tan-awa sa Moises 1:39; 7:18). “Ang mga tawo makahibalo ug makasabut kon asa sila mangayo og tabang ug masayud nga kon ang Simbahan sa Ginoo molihok sa saktong paagi, walay usa nga makigbatok sa iyang problema nga mag-inusara.”

Si Fatima Alves sa Portugal, nga may spina bifida, nakahibalo nga ang website nakatabang kaniya nga masayud gayud nga: wala siya mag-inusara.

“Importante nako nga ang Simbahan adunay website aron matabangan ang mga tawo nga may mga kakulangan aron mobati kami nga nahiusa isip mga miyembro sa Simbahan. Makatabang kini nga mahibalo nga ang Simbahan nagpakabana ug adunay tinguha sa pagtabang ug pagsuporta sa mga tawo nga anaa sa espesyal nga mga kahimtang,” miingon siya.

Ang pagpagawas sa site usa sa pipila ka mga paningkamot nga gihimo sa Simbahan aron sa pagtabang sa tanang mga miyembro sa Simbahan, miingon si Elder Edwards.

“Kabahin sa atong ‘mando’ gikan sa Ginoo mao ang paghatag sa ebanghelyo ngadto sa tanan sa pamaagi nga siya makasabut ug makaangkon sa tanang kaayohan niini,” miingon si Elder Edwards. “Matinguhaon kami nga dili mapasagdan ang bisan unsa nga bahin sa mga anak sa Ginoo sa paghatag og makahuluganong mga oportunidad sa ebanghelyo.

“Ang website dili lamang motabang sa indibidwal apan gimugna usab aron sa pagtabang sa mga lider nga mahibalo kon unsaon pagtabang o kon asa sila mangayo og suporta aron sa pagtabang sa mga miyembro nga may mga kakulangan,” mipadayon siya.

Siyempre, ang website wala gihimo aron pulihan ang indibidwal, personal nga pakig-uban tali sa mga miyembro sa Simbahan.

“Sa miaging mga katuigan kita adunay lainlaing mga matang sa kalampusan sa pagdumala sa may espesyal nga mga panginahanglan diha sa Simbahan,” miingon si Elder Edwards. “Dako gayud ang kalampusan sa higayon nga ang mga tawo determinado nga maghimo og kalainan. Ang yawe sa pagtabang sa tanan—aduna man silay kakulangan o wala—mao ang paghigugma kanila ug pagpangayo og giya sa Espiritu sa pagtabang.

“Kitang tanang gimandoan sa paghigugma sa atong silingan sama sa atong kaugalingon (tan-awa sa Mateo 19:19). Ang Simbahan naghatag lamang og laing pamaagi sa pagtabang kanato nga makasabut ug magmalampuson sa atong tinguha sa pagtabang sa buhat sa Ginoo.”

Sa tanang mga pinulongan nga ang site gipublikar, pipila ka mga feature ang giapil:

Lista sa Kakulangan: Kini nga bahin sa site nagtanyag og piho nga impormasyon sa kakulangan sa 10 ka mga kategoriya ug nagtanyag og mga ideya kon unsaon pagtabang ang tawo nga may kakulangan.

Mga Pamilya: Kini nga bahin sa website, nga naglakip sa impormasyon nga gipahiangay alang sa mga sakop sa pamilya nga ang mga anak may mga kakulangan, nagtanyag og mga sugyot alang sa paglig-on sa mga pamilya.

Mga Pangutana ug mga Tubag: Dinhi, ang mga tigbasa makakita og mga tubag sa mga pangutana nga kasagarang ipangutana sa upat ka mga kategoriya: kon unsaon, mga doktrina ug mga palisiya, mga kapanguhaan, ug mga statistic.

Kinatibuk-ang Impormasyon: Kini nga seksyon naghatag og kinatibuk-ang panglantaw sa site ug nagpasabut nga samtang ang mga tawo usahay negatibo og reaksyon sa mga kakulangan, ang pagkat-on kabahin sa sitwasyon sa usa ka tawo makapalambo sa pagsabut ug pagdawat.

Mga Lider ug mga Magtutudlo: Kini nga seksyon sa site nagpahinumdom sa mga lider ug mga magtutudlo sa mga butang nga angayang hinumduman kon makig-uban sa mga miyembro nga may mga kakulangan.

Mga Kasulatan ug mga Kinutlo: Kining koleksyon sa mga kasulatan ug mga pamahayag sa mga propeta gituyo isip kapanguhaan sa pagdasig, paghupay, ug paglaum alang sa mga tawo nga anaa sa lisud nga mga sitwasyon.

Ang Disabilities Site sa Simbahan anaa na karong 2012 sa 10 ka mga pinulongan: Chinese, English, French, German, Italian, Japanese, Korean (gipakita dinhi), Portuguese, Russian, ug Spanish.