Mga Ideya sa Family Home Evening

Kini nga isyu naglangkob og mga artikulo ug mga kalihokan nga mahimong magamit alang sa family home evening.Ang mosunod mao ang pipila ka mga ehemplo.

“Ang Pagpuasa Makapalig-on Kanato sa Espiritwal ug Temporal nga Paagi,” pahina 10: Basaha ang artikulo, mopakigbahin sa mga punto nga gihulagway sa ikaduhang pahina. Ipasabut og maayo nga ang pagpuasa naglakip labaw pa kay sa dili pagkaon—kinahanglan nga kini pagaubanan og pag-ampo, paghatag og pagpamatuod, ug mga halad sa puasa. Mahimo kamo nga mangutana sa mga sakop sa pamilya kon sa unsang paagi nga sila napanalanginan pinaagi sa pagpuasa. Ikonsiderar usab ang pagpakigbahin sa asoy sa Daang Tugon nga makita sa Ester 4.

“Pagsunod sa mga Pagdasig,” pahina 20: Basaha o i-summarize ang sidebar nga “Walo ka mga Katuyoan sa Pagpadayag.” Dayon basaha ang mga istorya sa artikulo sa tinagsa-tagsa ug hisguti ang katuyoan sa pagpadayag diha sa istorya. Awhaga ang mga sakop sa pamilya sa paghatag og pagtagad niining semanaha kon kanus-a ug sa unsang paagi nga ilang bation ang Espiritu. Mahimo kamong mo-follow up sunod semana aron hisgutan unsay ilang nakat-unan.

“Asa Ako Dad-a sa Akong mga Pagpili?” pahina 56: Basaha o i-summarize ang istorya; dayon basaha ang kinutlo ni Presidente Boyd K. Packer. Pahinumdumi ang mga sakop sa pamilya nga kon nakahimo sila og kasaypanan, makapili sila sa pag-usab.

“Ang Leksyon sa Liga sa Gagmayng mga Bata,” pahina 68: Mahimo kamo nga magsugod pinaagi sa pagkanta og “Mga Pamilya Mahimong Manag-uban sa Hangtud” (Songbook sa mga Bata, 98). Basaha ang istorya isip usa ka pamilya. Ngano nga importante man nga kita mopakita og suporta sa mga sakop sa atong pamilya? Sa unsang paagi nga ang inyong pamilya mahimong mas magsuportahanay sa usag usa?

Gugma ug Kahayag sa Family Home Evening

Sa bag-o pa kong nakabig ug nagpuyo sa Colombia, usa ka espesyal kaayo nga pamilya sa akong ward ang midapit kanako sa family home evening. Mao kadto ang kinaunhan nga akong natambongan nga home evening, ug ang diwa sa gugma ug hugot nga pagtuo nga akong nakita nakapahingangha kanako.

Sa dihang ang tanan nagkapundok na, nag-ampo kami ug dayon mipakigbahin sa unsay among nahimo sa miaging semana. Human sa among pag-inistoryahanay, kami adunay kalihokan.

Nga ang suga nakapalong, nagsulat kami og hugpong sa mga pulong sa colored paper nga porma og kasingkasing. Sa dihang kaming tanan nahuman na, among gipasiga ang mga suga ug gipakita ang among gisulat. Ang uban dili kaayo nindot nga pagkahimo, ang uban bati kaayo, ug ang uban sama nako naglisud gayud sa pagsulat; sa akong hunahuna ang akong gisulat mao ang kinabatian sa tanan. Siyempre, ang leksyon klaro kaayo: kon wala kanato ang kahayag sa ebanghelyo sa atong kinabuhi, ang tanan ngitngit tan-awon, dili magkadimao, ug lisud.

Kini nga leksyon mituhop gayud kanako. Ug sa katuigan human nianang adlawa, ako naningkamot gayud og maayo sa pagsiguro nga ang akong kinabuhi nagsubay sa dalan nga puno sa kahayag sa ebanghelyo aron mahimo ko nga ehemplo sa akong mga anak.

Dina del Pilar Maestre, California, USA